Donostiako Udalak uztailean itxiko du San Martin kalea, urtebetez

'Topo'aren trenbide-pasagunearen lanak egiteko, San Martin kalea 2020ko uztailerako osorik ixtea aurreikusi dutela jakinarazi du Donostiako Udalak, eta urtebete izango dela itxita. Hori dela eta, Donostiako Udalaren Mugikortasun eta Garraio Departamentuak plana prestatu du aipatutako mozketak Artzain Onaren parean sortuko dituen eraginei aurre egiteko.

Pilar Arana Mugikortasun eta Garraio zinegotziak aurkeztu du plana, Espazio Publikoaren batzordean egindako agerraldian. Bertan azaldu duenez, "hiru fase izango ditu", eta hainbat aukera aurreikusi dituzte, "bai garraio publikorako eta larrialdietako ibilgailuetarako, bai garraio pribaturako; hala ere, gomendio nagusia da ibilgailu pribatua ez erabiltzea eta hirian zehar garraio publikoan mugitzea".

Lehen fasea

Aranaren hitzetan, Mugikortasun Departamentua plan horren hiru faseetako lehenengoan murgilduta dago duela zenbait astetatik. Horrela, 2020ko urtarrilaren 31ra arte, San Martin kaleak errei bat gutxiago du, eta irekita jarraitzen du ibilgailu pribatuentzat zein garraio publiko eta larrialdietarako ibilgailuentzat.

Era berean, Easora iritsi aurretik ezkerreko erreitik doazen ibilgailuek kale horretara jo beharko dute nahitaez, eta Urbieta kaletik San Martinera bira egitea debekatu dute, oinezkoentzako pasabidearen erabiltzaileen segurtasuna bermatzeko.

Horrez gain, Easoko eta San Martingo lanak abenduaren 21etik urtarrilaren 6ra bitartean geldituko dituzte, inguruko merkatarien Gabonetako kanpainari ahalik eta kalte gutxien eragiteko asmoz.

Bigarren fasea

Otsailaren 1etik aurrera hasiko da bigarren fasea, eta uztailaren 15era arte iraungo du. Denbora tarte horretan, Urbieta eta Hondarribia arteko San Martin kaleak errei bakarra izango du, eta garraio publikoa, larrialdietako ibilgailuak, taxiak eta motoak bakarrik ibili ahal izango dira bertatik.

Fase horretarako, Mugikortasun Departamentuak gomendio hauek egin ditu: Antigua-Amara bidea edo saihesbidea erabili hiriaren mendebaldetik ekialderako joan-etorrietarako; erdialdetik Urbieta kalera iristen diren ibilgailuentzat, berriz, bertan bira egin eta Parke kaleraino joan, hortik Gernikako Arbola pasealekura bira egin ahal izateko.

Gaur egun, bira hori ezin da egin, ibilgailuak Mundaiz zubitik joaten direlako mendeurreneko plazarako norabidean, eta horrek ere eragina izango du, ezingo baitute zuzen jarraitu eta Gernikako Arbolaren pasealekurantz bira egin beharko baitute. Bertan, Araba parkearen eta Mundaiz zubiaren arteko oinezkoentzako pasabidea kenduko dute.

Halaber, bigarren fase horretan, Artzain Onaren ondoan dauden San Martin kaleko Dbus eta Lurraldebus autobusen geltokiak beste toki batean jarriko dituzte, aurrerago.

Hirugarren fasea

Hirugarren fasean (2020ko uztailaren 15etik 2021eko uztailera), Urbieta eta Hondarribia arteko San Martin kalea erabat itxiko dute. Epe horretan, ibilgailu pribatuen trafikoari jarritako murrizketak aurreko faseko berberak izango dira; garraio publikoa eta larrialdietako ibilgailuak, berriz, Easo kaletik Askatasunaren hiribideraino desbideratuko dituzte, eta bertan kokatuko dituzte San Martinen kenduko dituzten geltokiak.

Obrak egiten dituzten bitartean, oinezkoen zirkulazioak ez du ia eraginik izango, baina Loiola kaleko oinezkoen pasabidea laster kenduko dute, eta, ondorioz, oinezkoek arkuen azpitik ibili beharko dute, bai Urbiarantz joateko, bai Hondarribia kalerantz joateko.

Gainera, bigarren eta hirugarren faseetan, Artzain Onaren espaloiaren zati bati eragingo diote lanek, baina Katedralaren aurreko pasabidea eta bertara sartzeko bidea bermatuta egongo dira.

Oinezkoak

Obrak bukatu arte, oinezkoen zirkulazioak ia ez du aldaketarik izango. Hala ere, Loiola kaleko oinezkoen pasabidea laster kenduko dute, eta horrek arkuen azpitik ibiltzera behartuko du, bai Urbietarantz joateko, bai Hondarribia kalerantz joateko. Espaloiaren bidegurutzea ondo egingo da Urbieta ondoan edo Hondarribia ondoan.