Tubacexeko langileek kaleratzerik ez egoteko konponbide adostu bat eskatu dute Bilbon
Tubacexeko langile batzordeak deituta, manifestazio jendetsua eta zaratatsua egin dute Bilbon, Jesusen Bihotza plazatik abiatuta. Tubacex ERErik ez! lelopean egin dute martxa Bizkaiko hiriburuan Aiaraldeko enpresako langileek, senideek, lagunek eta eskualdeko herritarrek, greba mugagabea hasi zutenetik bi hilabete betetzear direnean. 2000 bat manifestarik hartu dute parte.
Lan erregulazioko espedienteak Tubacexeko 129 langileri eragingo die. Langile horiek apirilaren 15ean kaleratzea dago aurreikusita, Eduardo Ibernia enpresa batzordeko presidenteak azaldu duenez.
Kaleratzeen aurkako eta enpleguaren aldeko aldarria Aiaraldetik Bilbora eraman dute langileek, segurtasun neurriak beteta hiru zutabetan antolatu duten martxa batean. Enpresari negoziazio mahaian jesartzeko eta behin behineko neurriak aintzat hartuko dituen konponbide adostu bat bilatzeko eskatzen diote langileek.
Erakundeei industria sarearen suntsiketa gelditzeko ahaleginak egiteko eskatu diete.
Batzordeko presidenteak azaldu duenez, manifestazioarekin Tubacexeko gatazka Bilboko kaleetan "ikustarazi" nahi dute, egoera enpresa guztietara zabaldu baitaiteke. Izan ere, "oraindik behera bota ez dugun lan erreforma bat dago, eta horrek modu errazean lan erregulazioko espediente bat aurkeztea uzten die enpresei, galerak izango dituztela aurreikusten dituztela justifikatuta, Tubacexek egin duen bezala".
Ibemiaren ustez, enpresaren zuzendaritzarekin negoziatzeko tartea geratu beharko litzateke, baina esan du "agian arazoa da haiek ez dutela agertoki hori aintzat hartzen".
Joseba Terrerosek enpresa batzordeko kideak manifestazioan adierazi duenez, "oraingoz animoak goian" dituzte langileek. "Jendea gure atzean dago, eta saiatu behar gara kaleratze horiek saihesten eta hutsean geratzen", esan du Terrerosek.
Tubacexeko langileen aldeko manifestazioa. Argazkia: EFE
Udaletxe atarian bukatu dute manifestazioa, txalo artean. Terrerosek irakurritako manifestuaren arabera, langileek etorkizunean sinesten dute, "Zuzendaritzak ez bezala". "Ez dugu normaltasunera bueltatzeko beste modurik ikusten kaleratutako langile guztiak itzultzen ez badira", adierazi du.
Langileek manifestazioan zehar EITB Mediari adierazi diotenez, borrokan jarraitzeko prest eta indartsu daude, eta "zerbait lortuko dugula" uste dute. Enpresak egindako "mehatxuek", gainera, "indarra" ematen dietela adierazi dute.
Greba mugagabea produkzioan izaten ari den emaitza ere hizpide izan dute. "Gure fabriketan ez da kilogramo bat ere transformatu, eta horrek indarra ematen digu", esan dute langileek.
Tubacexeko langileen martxa. Argazkia: EFE
Manifestarien artean izan dira EH Bilduko zenbait ordezkari politiko, besteak beste, Oskar Matute diputatua, Iker Casanova legebiltzarkidea, Arantza Urkaregi Bizkaiko batzarkidea eta Eba Blanco EAko idazkari nagusia.
95 kaleratze Laudion eta Amurrion
Tubacexek Laudio eta Amurrioko (Araba) fabriketako 95 langile kaleratuko ditu, lan erregulazioko espedientean aurreikusita zeuden 129en aurrean. 22 langile borondatez joan dira eta 12 aurretik erretiratu dira.
Tubacexeko lan-gatazka otsailean hasi zen, enpresak kaleratze handiak iragarri zituenean "arazo estrukturalak" tarteko; petrolioaren eta gasaren krisi "luzeari" pandemiaren ondorioak gehitu zaizkiola eta, "industria berrantolatu eta kostuak murriztu" beharra izan duelako.
Langileen ordezkaritza sozialak, ordea, arazoa "behin-behinekoa" dela dio, eta horregatik "neurriak ere behin-behinekoak" izatea eskatzen du, pandemiaren eraginari aurre egiteko. Langileak greba mugagabean daude joan den otsailaren 15etik. Pasa den martxoaren 9an, gainera, agortutzat eman zituzten negoziazioak, bide judiziala zabalduz.
Albiste gehiago ekonomia
Azkoitiko Juaristi eta Aitek enpresetako langileek bizi duten "egoera jasanezina" salatu dute
Orain urtebete inguru lehertu zen lan-gatazkaren berri emateko, agerraldia egin dute bi enpresetako langileek. Uste dute zuzendaritzak "ezkutuko itxiera plan bat" duela. 130 lanpostu eta hainbat familia "arriskuan" daudela salatu dute.
Lodosako Karey Solanok konkurtsoa egingo du, eta lantegia itxi eta 36 beharginak kaleratuko ditu
Langile gehienak oso aspaldi hasi ziren lanean, eta batez beste 50 urtetik gorakoak dira. CCOOk salatu du oraindik ez dutela abuztuko nomina jaso.
Ostiralean sei hilabete beteko dira Gasteizko lorezainek grebari ekin ziotenetik, eta manifestazioa deitu dute egun horretarako
Gaur goizean Gasteizen egindako prentsaurreko batean, Enviser enpresako langileek "borrokarekin jarraitzeko" asmoa agertu dute, "soldata duinak lortu arte". Gainera, langileak akordiorako prest agertu dira, baina hori lortzeko "Gasteizko Udalaren benetako inplikazioa" beharrezkoa dela uste dute.
Zeintzuk dira BBVAren eskaintza berriaren gakoak?
Josu Ferreiro EHUko irakasleak Radio Euskadin egin duen elkarrizketa batean adierazi duenez, erakundeak Kataluniako bankuko akziodunen zati handi batek eskatzen zuenera egokitu du bere proposamena, lehen eskaintzari uko egin baitzioten, nahikoa ez zelakoan. Ferreirok zehaztu duenez, BBVAk ez du eskudirutan ordainduko, akzio propioetan baizik, eta horrek abantaila fiskala dakarkie akziodunei, zergak gutxiago ordaintzea dakarrelako. Mugimendu horrekin, Carlos Torres Vila buru duen bankuak Sabadellen akzioen merkatuko balioa berdindu du, eta horrek opak aurrera egiteko aukerak areagotu ditu, nahiz eta BBVAri berari kostu handiagoa ekarri. Hobekuntza berri bat egon litekeen galdetuta, ekonomialariak uste du zaila dela: "BBVAk argudiatu zuen Sabadellen akzioak gainbaloratuta zeudela. Orain, alde hori desagertu egin da. Beste eskaintza bat baztertu beharko litzateke, hau izango litzateke azkena", adierazi du. Elkarrizketa Boulevard saioan entzun daiteke, GUAUn, 02:50: 00etatik aurrera (jatorrizkoa, gaztelaniaz).
2026an jarriko da martxan Petronorren eta OCO Technologyren agregakin sintetikoen planta, Bilboko Portuan
Proiektua 2024an hasi zen eraikitzen, eta Europa kontinentalean agregakin sintetikoak fabrikatuko dituen lehen lantegi industriala izango da. Agregakin horiek CO2 gasa harrapatzen dute, bai ekoizpen prozesuan zehar, baita horien bizitza baliagarrian ere.
BBVAk % 10 igo du Sabadell bankua eskuratzeko eskaintza
Carlos Torres BBVAren presidenteak azpimarratu duenez, hobekuntza eginda "aparteko eskaintza" jarri dute Banco Sabadellen akziodunen esku, "balorazio eta prezio historikoarekin, eta bi bankuen batasunarekin sortutako aukera apartan parte hartzeko aukerarekin". Sabadellek, bere aldetik, erantzun du azken eskaintza "jatorrizkoa baino okerragoa" dela.
Maderas de Llodio, greba mugagabean
Langileen batzordeak salatu du enpresak produkzioaren % 40 beste lantegi batzuetara eramateko asmoa duela, eta deslokalizazioak Laudioko eta eskualdeko "lantegiaren etorkizuna arriskuan jartzen" duela.
Multiverse Computingek % 30 handituko du bere lantaldea Donostian
Software kuantikoan eta adimen artifizialean espezializatutako enpresa donostiarrak datorren urtean 60 pertsona kontratatzea aurreikusten du. 4 langile zituztela abiatu zuten konpainia 2019an, eta 260 izango dira laster.
Pentsiodunak Euskadiko hiriburuetan manifestatu dira gutxieneko pentsioak LGSarekin parekatzea eskatzeko
Ehunka pertsonak bat egin dute Gasteizen eta Donostian Euskal Herriko Pentsiodunen Mugimenduak deitutako manifestazioekin; hain zuzen ere, osteguneko Legebiltzarreko bozketan presioa egiteko, gutxieneko pentsioak Lanbide arteko Gutxieneko Soldatarekin (LGS) parekatzea eskatzeko.
Petronorreko enpresa batzordeak enpresaren egoera "tamalgarria" salatu du, eta "presio neurriekin" mehatxu egin du
Plantillako ordezkariek adierazi dute ez direla bete zuzendaritzarekin lortutako akordioak, eta nabarmendu dute "tamalgarria" dela Muskizko findegiko instalazioen egoera.