2.000 milioi euroko inpaktu metatuarekin egin du 20 urteko ibilbidea BEC erakustazokak
2004an sortu zenetik, Euskal Autonomia Erkidegoaren Barne Produktu Gordinean (BPG) 2.000 milioi euroko inpaktu metatuarekin, hiru lurraldeen garapen sozioekonomikoan eta kanpo proiekzioan "ekarpen esanguratsua" egitea aitortu dio bere buruari Bilbao Exhibition Centrek (BEC), ekitaldien industrian "nazioarteko erreferente gisa" kokatuta dagoela esanez.
20 urte bete zituen Bilbao Exhibition Centrerrek (BEC) apirilean, eta bi hamarkadotako ibilbidearen balantzea egin du gaur, baita hurrengo urteei begirako asmoak azaldu ere. 3.200 ekitaldi, 20 milioi bisitari eta 296,6 milioi euro EAEko ogasunetara. Datuok nabarmentzen dira urteurreneko argazkian.
2024ari dagokionez, zabaldutako oharrak dio "jarduera handiko" urtea izan zela, 280 ekitaldi eta 226,9 milioi euroko inpaktuarekin. Orotara, 843.800 bisitari jaso zituen erakustazokak eta 4.348 enplegu sortu ziren. Horrek guztiak, 44,3 milioi euro baino gehiagoko zerga-bilketa eragin zuen.
Azoken eta erakusketen arloan, besteak beste, Makina Erremintaren Nazioarteko Biurtekoa eta WindEuropen hirugarren edizioa azpimarratu dituzte balantzean. Halaber, kultur ekitaldiei dagokienez, urteurreneko urteari amaiera emateko Bryan Adamsek Bizkaia Arenan egindako "kontzertu arrakastatsua" aipatu du BECen zuzendaritzak, eta horrekin batera, Remember Paradise, Perrealo, ElRow, I Love Reggaeton, Love the 90's, Black Works Fetival, Nerbioi Punk Fest eta Ravage Fest jaialdiak.
Bestalde, euskal kulturarekin eta euskararekin duen "konpromisoari" eusten diola berretsi du BECek gaur igorritako idatzian, eta ZeidFest Gaztea, Makusi Jaia eta Ura Bere Bidean egitasmoak kokatu ditu helburu horren barruan.
Hurrengo urteotara begira, "eraldaketa digitala" eta "ingurune lokalaren eta globalaren jasangarritasunarekiko konpromisoa indartzea" dira erakustazokaren helburuetako bi. "Baikor" ekin dio 2025 urteari, eta publiko zein sektore guztiei bideratutako "askotariko programazioa" agindu du.
Albiste gehiago ekonomia
Azkoitiko Juaristi eta Aitek enpresetako langileek bizi duten "egoera jasanezina" salatu dute
Orain urtebete inguru lehertu zen lan-gatazkaren berri emateko, agerraldia egin dute bi enpresetako langileek. Uste dute zuzendaritzak "ezkutuko itxiera plan bat" duela. 130 lanpostu eta hainbat familia "arriskuan" daudela salatu dute.
Lodosako Karey Solanok konkurtsoa egingo du, eta lantegia itxi eta 36 beharginak kaleratuko ditu
Langile gehienak oso aspaldi hasi ziren lanean, eta batez beste 50 urtetik gorakoak dira. CCOOk salatu du oraindik ez dutela abuztuko nomina jaso.
Ostiralean sei hilabete beteko dira Gasteizko lorezainek grebari ekin ziotenetik, eta manifestazioa deitu dute egun horretarako
Gaur goizean Gasteizen egindako prentsaurreko batean, Enviser enpresako langileek "borrokarekin jarraitzeko" asmoa agertu dute, "soldata duinak lortu arte". Gainera, langileak akordiorako prest agertu dira, baina hori lortzeko "Gasteizko Udalaren benetako inplikazioa" beharrezkoa dela uste dute.
Zeintzuk dira BBVAren eskaintza berriaren gakoak?
Josu Ferreiro EHUko irakasleak Radio Euskadin egin duen elkarrizketa batean adierazi duenez, erakundeak Kataluniako bankuko akziodunen zati handi batek eskatzen zuenera egokitu du bere proposamena, lehen eskaintzari uko egin baitzioten, nahikoa ez zelakoan. Ferreirok zehaztu duenez, BBVAk ez du eskudirutan ordainduko, akzio propioetan baizik, eta horrek abantaila fiskala dakarkie akziodunei, zergak gutxiago ordaintzea dakarrelako. Mugimendu horrekin, Carlos Torres Vila buru duen bankuak Sabadellen akzioen merkatuko balioa berdindu du, eta horrek opak aurrera egiteko aukerak areagotu ditu, nahiz eta BBVAri berari kostu handiagoa ekarri. Hobekuntza berri bat egon litekeen galdetuta, ekonomialariak uste du zaila dela: "BBVAk argudiatu zuen Sabadellen akzioak gainbaloratuta zeudela. Orain, alde hori desagertu egin da. Beste eskaintza bat baztertu beharko litzateke, hau izango litzateke azkena", adierazi du. Elkarrizketa Boulevard saioan entzun daiteke, GUAUn, 02:50: 00etatik aurrera (jatorrizkoa, gaztelaniaz).
2026an jarriko da martxan Petronorren eta OCO Technologyren agregakin sintetikoen planta, Bilboko Portuan
Proiektua 2024an hasi zen eraikitzen, eta Europa kontinentalean agregakin sintetikoak fabrikatuko dituen lehen lantegi industriala izango da. Agregakin horiek CO2 gasa harrapatzen dute, bai ekoizpen prozesuan zehar, baita horien bizitza baliagarrian ere.
BBVAk % 10 igo du Sabadell bankua eskuratzeko eskaintza
Carlos Torres BBVAren presidenteak azpimarratu duenez, hobekuntza eginda "aparteko eskaintza" jarri dute Banco Sabadellen akziodunen esku, "balorazio eta prezio historikoarekin, eta bi bankuen batasunarekin sortutako aukera apartan parte hartzeko aukerarekin". Sabadellek, bere aldetik, erantzun du azken eskaintza "jatorrizkoa baino okerragoa" dela.
Maderas de Llodio, greba mugagabean
Langileen batzordeak salatu du enpresak produkzioaren % 40 beste lantegi batzuetara eramateko asmoa duela, eta deslokalizazioak Laudioko eta eskualdeko "lantegiaren etorkizuna arriskuan jartzen" duela.
Multiverse Computingek % 30 handituko du bere lantaldea Donostian
Software kuantikoan eta adimen artifizialean espezializatutako enpresa donostiarrak datorren urtean 60 pertsona kontratatzea aurreikusten du. 4 langile zituztela abiatu zuten konpainia 2019an, eta 260 izango dira laster.
Pentsiodunak Euskadiko hiriburuetan manifestatu dira gutxieneko pentsioak LGSarekin parekatzea eskatzeko
Ehunka pertsonak bat egin dute Gasteizen eta Donostian Euskal Herriko Pentsiodunen Mugimenduak deitutako manifestazioekin; hain zuzen ere, osteguneko Legebiltzarreko bozketan presioa egiteko, gutxieneko pentsioak Lanbide arteko Gutxieneko Soldatarekin (LGS) parekatzea eskatzeko.
Petronorreko enpresa batzordeak enpresaren egoera "tamalgarria" salatu du, eta "presio neurriekin" mehatxu egin du
Plantillako ordezkariek adierazi dute ez direla bete zuzendaritzarekin lortutako akordioak, eta nabarmendu dute "tamalgarria" dela Muskizko findegiko instalazioen egoera.