Brenta % 13 jaitsi da, kolpetik, Trumpek Irango erasoak etengo dituela iragartzearekin bat; 100 dolar ingurura itzuli da gero

12:00ak pasatxo zirenean, Brent gordinaren prezioa, Europan erreferentzia dena, % 13 jaitsi da, bat-batean, upeleko 94,5 dolarreraino, Donald Trump AEBko presidenteak Irango zentral elektrikoen eta energia azpiegituraren aurkako eraso militarrak bost egunez atzeratzea agindu duela iragartzearekin bat. 

Buruzagi errepublikanoak Truth Social bere sarean adierazi duenez, bi herrialdeek "elkarrizketa oso onak eta produktiboak" izan dituzte azken bi egunetan, Ekialde Ertaineko liskarrak "erabat konpontzeko" bidean. 

"Aste osoan zehar jarraituko duten elkarrizketa sakon, zehatz eta eraikitzaile horien tonua eta zintzotasuna oinarri hartuta, Gerra Departamentuari —Defentsa Departamentuari erreferentzia eginez— agindu diot Irango zentral elektrikoen eta energia-azpiegituraren aurkako eraso militar guztiak bost egunez atzeratzeko, abian diren bileren eta elkarrizketen arrakasta dela eta", azaldu du.

Trumpek egindako iragarpenak hankaz gora jarri du goiz honetan petrolioaren kotizazioak zeraman goranzko joera; izan ere, 114,43 dolarrera iritsi da gaur upelaren prezioa.

Beherakada handi horren ondoren, ordea, prezioak gora egin du berriro, eta 13:00etan 101 dolarrean zegoen.

Trumpen iragarpena islatu egin da Ibex 35ean, saio erdian lehengoratu eta % 1,08 igo baita, 16.893,9 punturaino.