Tubos Reunidoseko asanbladak greba amaitzearen alde bozkatu du, baina batzordeak jarraitzearen alde egin du

Amurrion egin den Tubos Reunidos enpresako langileen asanbladan parte hartu duten beharginek ia aho batez —234tik 232k— bozkatu dute egiten ari ziren greba mugagabea amaitzearen alde. Hala ere, langileen batzordeak dagoeneko ohartarazi du grebak jarraitu egingo duela, asanbladak zilegitasunik ez duela iritzi baitio, gutxiengo batek deitua izan dela argudiatuta.

Greba mugagabearen jarraipenari buruz bozkatzeko batzarra egin nahi zuen langile taldeak gaur goizean egin du asanblada, giroa gori-gorian zegoela. Amurrioko plantillako 870 langileetatik 234k hartu dute parte.

Gainerako behargineek ez dute parte hartu; izan ere, hori zen langileen batzordeko gehiengoaren —ELA, LAB eta ESK sindikatuen— jarrera. Sindikatu horiek dira greba mugagabearen deitzaileak, eta bozketa egin gabe grebari eustearen alde daude.

Gaurko asanblada

Asanblada goizeko bederatzi eta erdietan hasi da. Aurretik, tentsio uneak izan dira fabrikako sarreran, batzarrean bozkatzearen aldeko langile taldea bertara sartzen ari zenean.

ELA, LAB eta ESK sindikatuek —batzordean gehiengoa dutenek— deitutako pikete-kontzentrazio bat zain zegoen fabrikako sarrerako zubian. Ertzaintzako istiluen aurkako unitateen eta Amurrioko udaltzaingoaren dispositibo zabal batek banandu ditu bi martxak.

Tubos Reunidos taldeak guztira 1.300 langile inguru ditu, eta 260 milioi eurotik gorako zorra metatuta; horietatik 150 milioi SEPIri dagozkiola uste da. Astelehenean hartzekodunen konkurtsoa eskatu zuen.

Zuzendaritzak ohartarazi du Amurrioko greba mugagabea dela eskaera berriak lortzea eta, ondorioz, diru-sarrerak izatea eragozten duten arrazoietako bat.

“Bozketak ez du zilegitasunik”

Ohar batean, ESK sindikatuak asanblearen "zilegitasuna" zalantzan jarri du, eta "zuzendaritzak bultzatuta" izan dela salatu du. Zehaztu duenez, greba mugagabea "ez da bat-bateko bilera batetik sortu, sindikatuetako ordezkariek eta enpresa-batzordeak legez erregistratutako erabaki kolektibo batetik baizik, Tubos Reunidoseko zuzendaritzak egindako eraso bortitzaren aurrean".

Horren ildotik, greba "enpresako zuzendaritzaren asmoen aurrean, langileak kudeaketa txarraren ordaintzaile egitearen ondorioa" dela berretsi du.

ESK-k esan du "zalantza handiak" dituela "greba-batzordeak sinadurak benetakoak direla egiaztatu gabe deitutako asanblea baten zilegitasunaz". Era berean, "zalantzarik ez duguna da greba legez deituta dagoela eta borroka langileen oinarrizko eskubidea dela", azpimarratu du.

Ildo berean, ELAk ziurtatu du asanbleak ez duela baliorik, eta ukatu egin du "bilera irregular batek greba deialdia eta langileen ordezkaritza esparrua alda ditzakeenik". Era berean, harrituta agertu da asanblearen sustatzaileek enpresaren zuzendaritzak egindako kudeaketari "inolako kritikarik" egin ez diotelako.

Bere ustez, bilerak agerian utzi du "gardentasun falta eta enpresa kudeatzen ari den zuzendaritzaren gabezia". Hala, sindikatuak berretsi du egungo egoeraren erantzukizuna "Tubos Reunidoseko zuzendaritzari eta akziodunei" dagokiela.

Eusko Jaurlaritzaren jarrera

Mikel Jauregi Industria, Trantsizio Energetiko eta Jasangarritasuneko sailburuak ohartarazi du Tubos Reunidos “amiltzear” dagoela, eta adierazi du zorra berregituratzea eta “bake soziala” beharrezkoak direla enpresa bideragarria izan dadin.

Mikel Jauregik, Radio Popular irratiari emandako elkarrizketa batean, esan du Tubos Reunidosek konkurtsoa eskatzea konpainiaren egoera larriaren adierazgarri dela. “Orain kontua da guztiok zer urrats ematen ditugun amildegira hurbiltzeko edo handik urruntzeko”, adierazi du.

Haren ustez, Tubos Reunidosen zorra “jasanezina” da, “enpresak berak balio duena baino bost edo sei aldiz handiagoa”. “Nor sartuko da etxebizitza bat erostera, etxebizitzaren balioa baino bost aldiz handiagoa den hipoteka badu? Inor ez. Beraz, zor hori berregituratu egin behar da”, adierazi du.