Sindikatuek ez dute baztertu greba gehiago deitzea; Hezkuntzak dio lanuzteekin ez duela negoziatuko

EAEko hezkuntza publiko ez-unibertsitarioko milaka irakasle kalera atera dira gaur, urteko euren zortzigarren greba egunean, euren lan baldintzak hobetzeko eskatzeko.

Steilas, LAB, ELA eta CCOO sindikatuek deitu dute lanuztea —biharko ere egina dago deialdia—, Eusko Jaurlaritzaren Hezkuntza Sailarekin gatazka gaiztotuta dagoen honetan.

Sindikatuen arabera, irakasleen % 75ek egin dute bat deialdiarekin, aurreko lanuzteek izandako jarraipen bertsuarekin. Guztira, 27.000 maisu-maistra zeuden grebara deituta. Hezkuntza Sailaren arabera, aldiz, % 48koa izan da jarraipena.

Lau sindikatuak oso kritiko azaldu dira Hezkuntza Sailaren jarrerarekin, eta greba "desaktibatzeko" trikimailuak egiten ibiltzea leporatu diote. Euren esanetan, Hezkuntza Sailak ez die "gatazka bideratzeko proposamenik helarazi". Are gehiago, ez dute baztertu mobilizazio gehiago deitzea.

Sindikatuek deituta, manifestazioak izan dira Bilbon, Donostian eta Gasteizen, eta Bilbokoa bereziki jendetsua izan da. Gainera, atzo arratsaldetik kanpatuta daude hainbat irakasle Eusko Jaurlaritzak Gasteizen duen egoitzaren aurrean, "Lan hitzarmen duina, orain!" lelopean.

Jaurlaritza: "Negoziazioak lasaitasuna behar du"

Joan den astean bezala, Maria Ubarretxena Eusko Jaurlaritzaren eleduna izan da gaurkoan Hezkuntza Sailaren ahotsa. Gobernu bileraren osteko prentsaurrekoan iragarri duenez, Sailak erabaki du "mobilizazioak amaitu arte itxarongo duela berriro ere negoziazioei heltzeko".

Izan ere, Ubarretxenaren hitzetan, negoziazioek aurrera egiteko "lasaitasuna" behar da. Azpimarratu duenez, Hezkuntza Saila negoziatzeko prest dago, eta horretarako "borondate irmoa" du, baina betiere "lasaitasunetik" egin behar dela deritzo. Horrez gain, haren ustez, "ez gaude lan gatazka baten aurrean, baizik eta gauza garrantzitsuagoa baten aurrean. Gure hezkuntza sistemaz ari gara, ikasleez eta euren familiez, eta eman beharreko zerbitzu publikoaz", nabarmendu du.

Bederatzi greba egun urtarriletik

Sindikatuek eta Jaurlaritzak joan den astelehenean izan zuten azken hartu-emana. Ordu luzez egon ziren bilduta, eta 01:00etan bukatu ziren negoziazioak, akordiorik gabe. Negoziazioen porrotaren ondoren, hiru greba egun egin zituzten irakasleek. Aste honetako greben atarian, bi aldeek are gehiago urrundu dituzte jarrerak elkarrengandik. Aldez aurretik deituta zegoen bilera teknikoa bertan behera uztea leporatu zioten sindikatuek Hezkuntza Sailari, eta horrek erantzun zuen bertan eztabaidatzekoak zirenak "negoziazio mahai nagusian jorratu beharreko gaiak" zirela.

Urtea hastearekin batera lehertu zen gatazka. Sindikatuek 12 greba egun deitu zituzten irakasleen kolektiboaren artean ez ezik, baita Haurreskolak Partzuergoan eta sukaldari eta garbitzaileen artean ere —azken bietan akordioa lortu dute bi aldeek—. Martxoan, beste bost greba egunera deitu dituzte irakasleak. Besteak beste, lan-kargak arintzeko, erretiroa aurreratzeko, erosahalmena berreskuratzeko, enplegua egonkortzeko eta bermatzeko, eta lan-osasuna, euskara eta berdintasuna bermatzeko neurriak aldarrikatu dituzte langileen ordezkariek.