Martxoan hasiko dira Ertzaintzako lan-eskaintza publikoko azterketak, 150 plaza betetzeko

Bingen Zupiria Segurtasun sailburuak asteazken honetan iragarri duenez, datorren martxoan hasiko dira Ertzaintzaren 35. promozioko lan-eskaintzarako probak. Promozio horrek 150 plaza eskaintzen ditu oinarrizko eskalako agenteentzat, eta abenduaren 23an amaitzen da izena emateko epea.

Eskaintza hori aurreko promozioko 463 plaza hutsak betetzeko deitu zen, eta plaza horietatik 270 geratu dira bete gabe; izan ere, 3.609 hautagaien % 90ek ez zituzten proba teorikoak eta psikoteknikoak gainditu.

150 plazak gehitu daitezke, aurreko 463 plazetara iritsi arte. Aurrekoaren lehen azterketetan 380 oposiziogile baino gehiago izan ziren, eta proba fisikoak, medikoak eta elkarrizketa pertsonala egin behar zaizkie, prozesua amaitu barik dago eta.

Behin izena emateko epea amaituta, "martxoan hasiko litzateke hurrengo fasea", hau da, azterketak, iragarri du Zupiriak Ertzaintzaren 2025-2028 Enplegu Planaren aurkezpenean. Joan den uztailean onartu zen Ertzaintzaren negoziazio-mahaian, Erne, ESAN eta Sipe sindikatuen laguntzarekin, eta, azaroan, Gobernu Kontseiluan.

Gainera, Gobernu Kontseiluak astearte honetan onartu duen eta 2026an garatzea helburu duen euskal administrazioaren eta erakunde publikoen 2025eko lan-eskaintza publikoen egutegian hainbat eskaintza publiko daude, horien artean 430 ertzaingaientzako, nahiz eta Segurtasun Sailak oraindik ez duen iragarri noiz deituko duen zehazki.

Sailburuak adierazi du Enplegu Planaren helburua dela 2028an Ertzaintzan 8.000 lagun izatea hautaketa- eta sustapen-prozesu batzuen bidez, nahiz eta ekintza horien emaitzetako batzuk 2030era arte luzatuko diren.

Gaur egun, 700 langile inguruko defizita du plantillak. 2024 urtearen amaieran 2.300 lanpostu baino gehiago zeuden titularrik gabe, eta 1.300 karrerako funtzionario baino gehiago ez zeuden behin betiko atxikita, sailburuak azaldu duenez.

Egoera horri irtenbideak ematen joateko, igoerarako eta espezializaziorako deialdiak ere egingo dira, beheko kategorietan lanpostu hutsak sortzeko, LEPetan plazak atera ahal izateko. Prozesu horiek aurreikusitako erretiroekin koordinatuko dira.

Era berean, Lanpostuen Zerrenda berrantolatuko da, gaur egungo espezialitateak berrikusita, eta berriak sartuko dira, azaldu du Zupiriak, eta Arkautiko Polizia eta Larrialdietako Euskal Akademia berrituko da, instalazioak handitzeko, irakasle gehiago izateko eta eduki berriak sortzeko.

Bigarren fasean, Enplegu Planaren oinarria sistemaren jasangarritasuna izango da.

2026an Enplegu Planak 23,6 milioi euroko aurrekontua izango du, eta ostegun honetan onartu behar du Arkautiko Kontseilu Errektoreak.

Lan-eskaintza deitzeaz gain, intendente, komisario, komisariorde, ofizial, ofizialorde eta agente lehenaren lanpostuetara igotzeko prozesuak deituko dira, eta espezializazioak egingo dira bide-segurtasunean, ikerketa kriminalean, babesean, lehergailuen desaktibazioan, brigada mugikorrean, besteak beste, agenteen oinarrizko plazak sortzeko.