Tiroketa Tolosan: Hiltzaileak kamera bat zeraman soinean

Claude Guéant Frantziako Barne ministroak onartu du ez dela ikerketan asko aurreratu, baina lekuko batek hiltzailea kamera batekin ikusi zuela azaldu du.

"Lepotik zintzilik kamera bat omen zuen, ez dakit egindakoa grabatu zuen ala ez, baina aparatu horrekin ikusi zuten", esan du "Europe 1" irrati katean Barne ministroak. Hiltzailea "bihotz gabekoa" eta "krudela" dela esan du gaur Frantziako Barne ministroak.

Sarraskia astelehen honetan Tolosako (Frantzia) eskola judu batean gertatu da,lau pertsona (irakasle bat eta 5, 6 eta 7 urteko hiru ikasle) tirokatuta hil dituztenean. Azken asteotan Tolosan bertan eta Montauban hirian erail dituzten hiru militarren kontrako erasoetan erabilitako ''arma eta motozikleta bera'' erabili dituzte oraingoan ere, Nicolas Sarkozy Frantziako presidenteak baieztatu duenez.

Tolosako eskolako krimenak ''motibazio antisemita argia'' izan du, Sarkozyren hitzetan, eta Frantziako Tolosan terrorismoaren kontrako plana maila gorenera igotzea erabaki du presidenteak, bi aste baino gutxiagoko tartean inguruetan izan diren erasoen ondorioz. Erasotzailea harrapatzeko, ''erabilgarri dituzten bitarteko guztiak'' martxan jarri dituztela esan du Sarkozyk, Eliseon egin duen agerraldian.''Higuingarria izan da'', gaineratu du.

"Gobernuak hiltzailea aurkitzeko baliabide guztiak erabiliko ditu", berretsi du baita ere Alain Jupé Atzerri ministroak "France 2" telebista katean. "Aurkituko dugu, justiziaren aurrera eramango dugu eta zigorra jasoko du", esan du Juppék. Ikerketak martxan jarraitzen duela adierazi du, baina ez du aurrerapenik eman nahi izan.

Hauteskunde kanpaina bertan behera utzi izana "normala" dela esan du eta ez ohiko egoera horrek gutxienez asteazkenera arte iraungo duela berretsi du, izan ere, orduan egingo dituzte lehengo astean Tolosan eta Montaubanen hildako hiru militarren hileta elizkizunak.

François Bayrou hautagaia kritikatu du Juppék, gertaera hauek indarkeriaren areagotzearekin lotu dituelako: "Ez atera probetxurik horrelako drama batetik, ez du hauteskunde kanpainarekin zerikusirik".

"Libération" egunkariaren arabera, ikertzaileek bi hipotesi dituzte eskuartean: lehena, hiltzailea militar ultraeskuindar bat izatea, eta bigarrena, integrismo islamiarrarekin lotutako norbait.

Sarkozyk Pariseko eskola batean egingo duten minutu bateko isilunean parte hartuko du goizean. Ondoren, ordezkari judutarrak eta musulmanak hartuko ditu Eliseo jauregian.

"Lau hildakoen gorpuak Israelera eramango ditugu, Jerusalemen lurperatzeko", berretsi du Gilles Bernheim Frantziako errabino handiak.

Joan den asteko tiroketekin harremana

Alerta igo eta gero, Tolosako agintariek armak edukitzeko baimena eman diete udaltzainei.

Sarkozyk berak baieztatu egin du asteleheneko hilketak harreman zuzena duela joan den astean Frantziako Tolosan eta Montaubanen izandako tiroketekin. Izan ere, eskola juduan erabili duten armetako bat joan den astean Tolosan bertan eta Montauban hirian hainbat militar hiltzeko erabili zena da, ikerketako iturriek aurreratu dutenez. Joan den asteko tiroketetan zein gaurkoan ere motozikleta bera erabili zuen hiltzaileak, iturri horiek beraiek argitu dutenez. Le Parisien egunkariak kaleratu duenez, motorra Tolosan bertan (Frantzia) lapurtu zuten. Hildako militarretatik bi magrebtar jatorriko frantziarrak ziren, eta karibetar jatorrikoa hirugarrena.

Ikertzaileek ez dute baztertu eskolan egin duten tiroketa eta aurreko asteotan izan diren militarren erailketak atentatu terrorista bakar baten parte izatea, Le Point egunkariak argitaratu duenez. Argitalpen horrek kaleratutako datuen arabera, hiru militar neonazi frantziar ikertzen ari da Polizia, gertakariarekin lotura dutelakoan. Hiru militar horiek Montaubango ingeniari paraxutisten 17. erregimentuko kideak ziren eta 2008an svastika bat zuen bandera batekin eta nazien agurra egiten agertu ziren argazki batean.

'Le Point'ek jakinarazi duenez, hiru militar horiek azken tiroketetan parte hartu duen erasotzailearen profilarekin bat egiten dute. Hain justu, lekukoek adierazitakoaren arabera, erasotzailea gizon gihartsua zen, tatuajeak zituen eta beltzez jantzita zihoan.

Jamel Benserhir militar ohiak adierazi duenez, hiru gizon horien berri eman zien bere nagusiei Armadan ari zenean neonazi jokabidea zutelako. Salaketa horren ondoren atzeman zitzaien arestian aipatutako argazkia, La Dépche du Midi eta Le Canard Enchané' komunikabideek jakinarazi dutenez.

Benserhiren salaketaren ondotik, Michel Esparza 17 erregimentuko paraxutisten komandanteak salaketa jarri zuen hiru soldaduen aurka. Gertakariak onartu eta zigortu egin zituzten orduan.

Sarkozyren hauteskunde kanpaina, bertan behera

Nicolas Sarkozyk bere hauteskunde kanpaina bertan behera uztea erabaki du, gutxienez, asteazkenera arte. Litekeena da egun horretan egitea lau pertsonen aldeko hiletak.

Tiroketako biktimak gogoratzeko astelehen honetan Parisko sinagoga batean egin duten ekitaldian ere parte hartu du Nicolas Sarkozy Frantziako estatuko buruak. François Hollande presidentziarako hautagaia eta François Fillon Frantziako lehen ministroa ere bertan egongo dira.