Landa-eremuko emakumeak omendu dituzte Emakundek eta euskal gizarteak

Arabako Landa Eremuko Emakumeen Sareak eta Hitzez baserriko emakumeen elkarteak jaso dute Berdintasunerako Emakunde saria astearte honetan. Iñigo Urkullu lehendakariak parte hartu du ekitaldian, non zabaldu duen esker ona landa-eremuan bizi diren emakume guztiei; izan ere, berorren euskarria dira, Urkulluren esanetan.

"Badakigu askotan ez dutela esker onik jaso", nabarmendu du lehendakariak Donostiako Kursaal zentroan; hain zuzen, bertan eman dituzte sariak.

Ekitaldia egin aurretik, goizean, Euskadiko hainbat emakume-elkarte bildu dira jardunaldi bat egiteko; Izaskun Landaida Emakundeko presidentearen hitzetan, aipatu elkarteak ezinbestekoak izan dira emakumea ahalduntzeko. Urkullu ere ildo horretan joan da; lehendakariak goraipatu du emakume-elkarteen bizitasuna: "Plataforma bat eskaintzen dute parte hartzeko, eta aukera ematen diote gizarteari emakumeen ahotsa entzuteko eta kontuan izateko".

"Emakumeak ahaldundu direlako, eta asoziazionismoari esker, landa-eremuko emakumeek ekarpenak egin dizkiozue Emakume Nekazarien Estatutuari; lege hori aitzindaria da aitorpen profesionala eta gizarte-estimazioa lortzeko borrokan, eta baliabide erabilgarria da eskubide profesional, sozial eta fiskalak praktikan gauzatzeko", aseguratu du.

Ekarpena, handiagoa ere

Hala ere, azpimarratu ere azpimarratu du landa-eremuko emakumeen ekarpena "nekazari-sektoreaz harago" doala; izan ere, "herriak hobetzen ere lagundu dute, bai eta berorien gizarte-kohesioan eta garapen ekonomikoan". "Nabarmendu nahi dugu nolako lana egin duzuen eredu iraunkorragoa erdiesteko eraldaketan. Zuen lanak eta konpromisoak ekarri dute herrietako bizitza-kalitatea hobetzea, bizitza ematea, alegia", adierazi du.

Azken finean, Urkulluren arabera, "Emakundek ematen dituen sari hauek erakusten dute nola berdintasuna beharrezkoa den, ez bakarrik justizia sozialagatik, baizik eta ongizate eta ezagutza handiagoa dakartzatelako, eta, hortaz, gizartearentzako onuragarria da".

Elkarte hauek Emakunde Saria jaso dute zeren eta lan bikaina egin duten emakumeen eskubideen alde eta berdintasuna lortzeko bidean. Sariaren xedea da nabarmentzea berdintasunaren aldeko lan handia egin duten pertsonak edo elkarteak. Golardoak 14.400 euro ematen ditu.

Hitzez elkartea 2007an sortu zuten bost emakumek, Urola Kostan, eta Arabako elkarteak, aldiz, 1999an hasi zuen ibilbidea.