Asintomatikoentzako testak eta diagnostiko azkarretarako sistema ikertzen ari dira

Biozentziak Gipuzkoa Fundazioak aukeratutako proiektuetako bi dira, COVID-19arekin lotutako ikerketak egiteko laguntzen deialdiaren barruan.

Gaixoen kontaktuen jarraipena egiteko plana abian da, kasu berriak atzemateko

Agentziak | Erredakzioa

2020/05/15 - 14:56

Azken eguneratzea

2020/05/15 - 14:56

Gipuzkoako zenbait zentro lanean ari dira koronabirusaren gaixo asintomatikoak edo sintoma oso arinak dituztenak antzemateko testak eta gaixotasuna azkar diagnostikatzeko eskuko sistemak sortzeko.

Biozentziak Gipuzkoa Fundazioak aukeratutako proiektuetako bi dira, COVID-19arekin lotutako ikerketak egiteko apirilean abian jarritako 455.000 euroko laguntzen deialdiaren barruan.

Guztira, lehen 26 proiektu aurkeztu dira, eta aipatutako biak eta beste bi aukeratu dituzte. Beste biak birusa antzemateko sentsore berrien ikerketa eta sintoma arinak dituzten pazienteak etxetik monitorizatzeko sistema dira.

Somaprobes enpresa donostiarrak 150.000 euro jasoko ditu pertsona asintomatikoetan edo sintoma oso arinak dituztenen artean koronabirusa ordubete baino arinago antzemateko. Testa populazio guztiari egingo litzaioke.

Testa ospitaleetan, laborategietan, etxebizitzetan, eskoletan, enpresetan eta aireportuetan erabili ahal izango litzateke eta kutsatuen zenbatekoa hobeto kalkulatzen lagunduko luke.

Diagnostikorako eskuko sistema

Arrasateko Microliquid konpainiak COVID-19a azkar diagnostikatzeko eskuko sistema bat ikertuko du. Microliquid “erreferentea da” minbizia eta arnas aparatuko gaixotasunak diagnostikatzeko “teknologia mikrofluidikoen alorrean”.

Sistema Osakidetzako ospitale eta anbulatorio sareetan balioztatuko dute eta PCRan oinarritutako emaitzak emango ditu 15 minututan. Egungo sistemek bost ordu behar dituzte emaitzak lortzeko.

Beste proiektu batzuk

Al Donostia International Physics Centerri, berriz, 85.000 euro eman dizkiote “Detente” izeneko proiektuaren garapenerako. Proiektu horren helburua birusa antzemateko sentsoreak garatzea da “diagnostiko azkarrerako proben fidagarritasuna indartzeko”.

Hautatutako laugarren proiektuak 70.000 euroko laguntza jasoko du eta Naru Intelligence enpresak aurkeztutako proiektuari egokitu zaio. Proiektua “StepCare” deitzen da eta Adimen Artifizialeko sofwarea da sintoma arinak dituzten gaixoak etxetik monitorizatzeko balioko du.

Albiste gehiago gizartea

Osakidetzak 67 lagun artatu ditu azken 10 egunetan, tenperatura altuen ondorioz

Osasun Sailak jakitera eman duenez, 55 pertsona horietatik 37 ospitaleetara nahiz osasun zentroetara eraman behar izan dituzte. Gipuzkoan jazo dira kasu gehienak (40), eta ekainaren 24, 28 eta 29an izan dira beroarekin lotutako intzidentzia kasu kopururik handienak.

18:00 - 20:00

Bidaiari bat atxilotu dute Loiun, kontrabandoagatik

Atxilotuak 2.550 tabako-pakete zeramatzan fakturatutako ekipajean.

Uztailaren 7an zezenketen aurkako kalejiran parte hartzeko gonbita egin die Iruñea Antitaurina taldeak herritarrei

Txupinazo egunean Udaletxe Plazatik abiatuko den kalejiraren aurkezpena egin du elkarteak astelehen honetan, Iruñean. "Animaliei tratu txarrak ematea" festaren parte izatearen kontra agertu da taldea, eta "herritar gehienak zezenketen aurka" daudela gaineratu du.