Zahar-etxeetako bi langilek positibo eman dute Araban eta zortzik Gipuzkoan

Arabako adinekoen egoitzetako bi langilek positibo eman dute PCR probetan. Oraingoz, bi zentroetako gainerako langile eta erabiltzaileei egin zaien frogetan ez da kutsatutako pertsona gehiago atzeman.

Ramiro Gonzalez Arabako ahaldun nagusiak Diputatuen Kontseiluaren bileraren ostean emandako prentsa agerraldian azaldu duenez, Ariznabarra eta Alberti Etxea dira positiboak atzeman dituzten egoitzak, eta lurraldeko gizarte baliabideetan egoera "kontrolpean" dagoela azpimarratu du.

Gonzalezek hizpide izan ditu baita ere adinekoen egoitzetako erabiltzaileen familiek egindako kexak. Horien arabera, pertsonak kutsatzeko hartutako neurrien ondorioz, bisiten erregimena murriztaileegia da.

Ahaldun nagusiak gogorarazi du azken egunotan malgutu egin direla bisita horien baldintzak, baina beti zuhurtziaz, COVID-19aren aurrean kolektibo "ahulenetako" bat babesteko.

Hala ere, Gonzalezek azaldu du familia gehienek babesa helarazi diotela foru erakundeari, garrantzitsuena "egoiliarren bizimodua" dela uste dutelako. Diputazioak, berriz, adierazi du bisita erregimena pandemiaren bilakaeraren arabera egokituko dela.

Gipuzkoako adinekoen egoitzetan zortzi langilek positibo eman dute, baina erabiltzaile bakar batek ere ez

Gipuzkoako adinekoen egoitzek zortzi positibo izan dituzte beren langileen artean; hau da, aurreko astean baino bi positibo gehiago, eta ez dute kasu positiborik erregistratu erabiltzaileen artean.

Aldundiak eguneratu egin ditu COVID-19ak lurraldeko egoitza-baliabideetan duen eraginari buruzko datuak. Gizarte Politiketako sailak bildutako datuen arabera, gizarteratze sareak kasu positiborik gabe jarraitzen du. Foru erakundeak 54 baliabide ditu eremu horretan, 225 plaza eta 192 etxebizitza guztira.

Adingabeei bideratutako egoitza zerbitzuetan ere ez dago positiborik, PCR testetan positibo eman zuten sei pertsonak sendatu baitira jada. Zerbitzu horiek 400 adingabe artatzen dituzte guztira.

Gizarte Politikako departamentuak aktiboki mantentzen du Zaintza eta Alerta Sistema, Gipuzkoako gizarte zerbitzu eta baliabideetan koronabirusari aurre egiteko, eta horrela "birusaren aurrerapena denbora errealean zaindu eta gizarte baliabideak eta zerbitzuak indartzeko".

Aldundiak osasun neurriak "zehatz-mehatz betetzeko" deia berretsi du, "maskara beti erabiliz, norbere burua babesteko eta besteak COVID-19aren mehatxutik babesteko metodo eraginkor gisa".