Nerbioi eta Cadagua ibaiek gainezka egin dute Basaurin, Balmasedan, Sodupen, Zallan eta Gueñesen
Asteburuko euri denboraleak Bizkaia jo du gogorren. Gauerditik egunsentira bitartean 42 litro pilatu dira Balmasedan, lurraldearen mendebaldean, eta Galindo inguruan (Barakaldo eta Sestao artean) ordubetean 20 litro metatu dira metro koadroko.
Cadagua ibaiak gainezka egin du azken orduetako euriteen ondorioz, eta uholde txikiak eragin ditu Balmasedan, Sodupen, Zallan, Arangurenen eta Gueñesen (Bizkaia). Basaurin ere gertatu da, Nerbioi ibaiak gainezka egin ostean.
Zorrotzan, Cadagua eta Ibaizabal ibaiak elkartzen diren tokian, 15 auto inguru ur azpian geratu dira Clara Campoamor kaleko tunelaren inguruan. Askotan urpetzen den gunea da, ibaiaren mailan dagoelako. Auzo bereko beste bi kale ere hartu ditu urak: Marino Archer eta Arsenalbidea.
Olabeaga auzora sartzeko bideetan ere arazoak izan dira, ur-putzuak tarteko. Horrez gain, lehen orduan, Plaza Berriko aparkalekuko sarbidea itxita egon da tarte batez, estoldak jausitako ura bideratzeko ahalmenik izan ez duelako.
Guztira, 55 esku-hartze egin dituzte Larrialdi zerbitzuek Bilbon.
Alonsotegin Cadagua ibaia indartsu jaitsi da eta uholde batzuk ere eragin ditu.
Era berean, ur-putzuen ondorioz, Renferen Muskiz eta Barakaldo arteko linearen zirkulazioa eten behar izan dute, eta zerbitzua autobusez egiten ari dira, konpainiak jakinarazi duenez.
Barakaldon, El Regatoko ikastetxeak bertan behera utzi ditu eskolak, Castaños errekak gainezka egin eta zentrora joateko errepidea ur azpian utzi duelako. Ikastetxeko zuzendaritzak argitu duenez, bihar berrekingo diote jarduerari.
Zuazo, Gurutzeta, Retuerto eta Lutxana auzoetan ere arazoak izan dira urak hainbat garaje hartu dituelako.
Trafikoari dagokionez, itxita jarraitzen du Kareaga ingurua (N-634), Max Center parean, ur-putzuak direla eta.
Bestalde, Bizkaiko Foru Aldundiak jakinarazi duenez, laster zabalduko dute BI-625 errepidea (Urduña eta Bilbo lotzen dituena); lur-jausia izan da goizaldean eta bidea garbitzen amaitu behar dute.
Bestalde, BI-636 errepidea, Balmaseda parean (La Encartada museo parean), itxita dago oraindik, baina espero dute errei bat irekitzea laster.
Gueñesko Udalak ohar bidez jakinarazi duenez, Cadagua ibaiak arazo ugari eragin ditu herrian eta inguruetan. Ibaiak gainezka egin du Anieta inguruan Santxosolon; Allende Zelaian eta Elubarrin, Sodupen; Iorgiko Erriberan, Askatasunan eta Ibarran Quadran eta Zaramilloko Eretza kalean.
Euriteek arazo ugari eragin dituzte errepideetan ere, eta BI-365 errepidea eta bidegorria itxita daude Sodupe eta La Quadra artean, Las Jarretas parean. Bestetik, Sologutxitik Lambarrirako bidea eta Artxube eta Santxosolo artekoa eta Ubide bidea ere itxita daude.
Hobera egingo du, arratsaldean
Goizak aurrera egin ahala, behera egiten ari da uraren maila puntu askotan. Eguraldiaren iragarpenaren arabera, denboralearen okerrena pasatu da dagoeneko. Hemendik aurrera kalteak neurtzeko eta kaltetutako inguruak garbitu eta leheneratzeko garaia da.
Albiste gehiago gizartea
"Hemen ez dago duintasunik eta laguntza behar dugu"
50 migratzailek asteak daramatzate Donostiako Amara auzoan kale gorrian lo egiten, asilo-eskaeraren erantzunaren zain. Gehienak Malitik iritsi dira gurera, bertako gerratik ihesi eta Frantziak kanporatu ostean.
Vuelingek bertan behera utzi ditu Bilboko aireportuan lur hartu behar zuten bost hegaldi
Bost hegazkin horiek Bilbotik egin behar zituzten irteerak ere bertan behera geratu dira.
Polemika Arrigorriagan, Udalak Vulkano orkestra jaietako programatik kanpoan utzi ondoren, "taldeko emakumeak hipersexualizatzeagatik"
Vulkano orkestrak zazpi aldiz jo du Arrigorriagan, baina aurten ez du joko Udalaren ustekabeko erabakiaren ondoren. Orkestrak, ohar baten bidez, adierazi du taldeko emakumeek libreki aukeratzen dituztela jantziak. Erabakiak polemika handia eragin du herritarren artean.
Arabako Foru Aldundiak 11.000 euroko isuna jarri dio aita bati Gasteizen arbitro bati eta entrenatzaile bati eraso egiten saiatzeagatik
Foru erakundeak halako zehazpen-proposamena abiatzen duen bigarren aldia da, eta, ziurtatu duenez, "irmo" jokatuko du aurrerantzean ere, "gertakariak garrantzitsuak eta larriak direlako".
Bertan behera utzi dute haur, gazte eta familientzako egitaraua Iruñean, baina gaueko kontzertuei eta su artifizialei eutsiko diete
Bertan behera geratu dira Menudas Fiestas, Birjolastu Juego Rejuego, Kirolari Sport Kids eta Foru plazako Gazte Eremuko programazioa. Hiriko auzoetan egitekoak ziren jarduerak ere bertan behera geratu dira, baita Ardantzeta Dantza Taldearen emanaldia ere.
50 gazte migratzaile inguru Amarako kaleetan lo egiten ari dira, asilo-eskaeraren erantzunaren zain dauden bitartean
Frantziako agintariek kanporatu egin dituzte, asiloa Espainiako Estatuan eskatu behar dutela argudiatuta; hori dela eta, Donostiako Udalak izapideak azkartzeko eskatu dio Espainiako Gobernuari.
Ertzaintzak gizon bat atxilotu du Orioko haur-patio batetik gertu, exhibizionismoa egotzita
Asteartean gertatu zen, uztailaren 8an, 16:00ak aldera, gizonezkoa adingabe batzuk zeuden esparrura sartzeko hesiaren ondoan zegoela.
Bi adingabe inputatu dituzte Corellan, AP-68 autobidera harriak jaurtitzeagatik
Gutxienez lau ibilgailuk kalte handiak jasan zituzten: kamioi batek eta hiru autok. Ekaineko azken egunetan egin zituzten erasoak, guztiak gauez.
Voloteak eskainiko ditu Forondatik Madril eta Bartzelonarako hegaldiak, azaroaren 1etik aurrera
Urtean 135 hegaldi eskaini beharko ditu Foronda Madrilekin eta Bartzelonarekin lotzeko.
Baionako jaietan Aturri ibaian desagertutako pertsona baten bila ari dira
02:45 aldera desagertu omen da, jai-eremutik kilometro batera. Suhiltzaileak eta bi urpekari bertaratu dira, eta droneak ere baliatu dituzte hura bilatzeko lanetan.