Gipuzkoako hondartza-denboraldia ekainaren 15ean hasiko da eta normaltasuna izango du berritasun nagusi

Gipuzkoako hondartzen udako denboraldia ekainaren 15ean hasiko da ofizialki, eta irailaren 15era arte iraungo du. Azken bi urtetan hainbat murrizketa izan ondoren, uda honetan normaltasuna izango da berrikuntza nagusia. Gaur Zarautzen egin duten irekiera ekitaldian, Jose Ignacio Asensio Ingurumeneko diputatuak nabarmendu duenez, "normaltasun-uda baterako itzulera inauguratu dugu, eta modu arduratsu eta iraunkorrean gozatzera bultzatuko dugu". 

Ingurumeneko Foru Departamentuak 1,5 milioi euro bideratuko ditu aurten hondartzen garbiketa, bideometria sarea, Nik Hondartzak aplikazioaren eguneratzea, sentsibilizazio kanpaina eta salbamendu zerbitzua estaltzeko.

Nik Hondartzak, hobetua

Aurtengo berritasun nagusiei dagokienez, Ingurumen diputatuak adierazi du Hondartzen Mahaian adostutakoari jarraiki, pandemia garaian aforoak kontrolatzeko martxan jarri zen Nik Hondartzak aplikazioa mantenduko dela. Hala ere, covid-19aren ondoriozko aforo murrizketarik aurreikusten ez denez, okupazioa markatzeko semaforo-sistema beharrean, termometro bat ipiniko da, hareatzen okupazio-adierazle gisa jardun dezan.

Bainatzeko debekuaren alerta mantendu egiten da, eta, horrez gain, erabiltzaileei itsasoaren baldintzei, olatuen ezaugarriei, mareei eta puntu arriskutsuei buruzko informazioa ematen zaie, bainuaren segurtasuna zaintzeko.

Nik Hondartzak aplikazioan, nobedade gisa, hondartza bakoitzera nola iritsi azaltzen duen botoi bat gehituko da, garraio publikoa lehenetsiko duena, Mugikortasun Jasangarriaren botoi baten bidez, Google Mapsekin lotura eginez.

Sentsibilizazio kanpaina

Bestalde, aurten berriz ere sentsibilizazio kanpainei ekingo zaie hondartzetan. Emausekin eta Elikagaien Bankuarekin lankidetzan, "Elkartasun olatuak" izeneko kanpaina ibiltari bat diseinatu da; Volkswagen furgoneta bat 8 udalerritan eta 9 hondartzatan barrena ibiliko da. Kanpaina ekainaren 9tik abuztuaren 2ra egongo da martxan, puntu bakoitzean astebetez, Zarautzen hasita ekainaren 9an.

Sentsibilizazio kanpainak bi helburu izango ditu: batetik, zakarrontziak ondo erabil daitezen sustatzea eta herritarrak hondakinak gaika bereizi eta biltzearen inguruan sentsibilizatzea, haur jokoen, mintegien eta pegatinen bidez. Begoña Cabaleiro, Emaús Fundazioko Komunikazio Arduradunak dioenez, "kontsumo arduratsua, berrerabilpena, birziklapena eta ekonomia zirkularra ez dira ahaztu behar udan. Modu jasangarrian berdin berdin goza daiteke. Hondartzara bizikletaz joan gaitezke, bertako eta denboraldiko produktuak eraman ditzakegu bertan jateko, iturriko ura kantinplora batean eramanez, eta erabilera bakarreko produktuak ez erabiltzen".

Bestalde, Elikagaien Bankurako elikagaiak bilduko dira, egungo egoera sozioekonomikoaren ondorioz geroz eta pertsona gehiago baitaude beharrean. Elikagaien Bankuak azpimarratu du bereziki elikagai hauek beharko liratekeela: olioa, arrain kontserbak (atun latak, sardinak, etab.), arroza, pasta eta, dilista lehorrak. Carlos Martinezek, Bankuko presidenteordeak, berretsi du beharrak handitu egin direla onuradunen kopurua handitu delako. «Gure ustez, bi arrazoirengatik handitu da onuradunen kopurua: Ukrainako gerrak desplazatutako pertsonak ugaritu direlako eta oinarrizko produktuen prezioa igo delako; horrek eragin bikoitza du Bankuan, merkatuan erosten dituen produktuen prezioaren balioa ere handitu egin baita».