Drogen kontsumoak behera egin du EAEko ikasleen artean, baina oso maila altuetan jarraitzen du

Euskal Autonomia Erkidegoko Bigarren Hezkuntzako ikasleen artean drogen kontsumoak behera egin duen arren, oso maila altuetan jarraitzen du; halere, azken hilabetean, kokainaren kontsumoa azken 15 urteetako minimoetara iritsi da. Gainera, 12 eta 22 urte bitarteko ikasleen erdiak baino gehiagok (% 54,6) adierazi du alkohola kontsumitu duela azken urtean, eta ia % 30ek, tabakoa, Euskal Autonomia Erkidegoko Bigarren Hezkuntzako Drogen Erabilerari buruzko Inkestaren arabera.

Deustuko Unibertsitateak astearte honetan aurkeztu ditu Drogak eta Eskola: Euskal Autonomia Erkidegoko Bigarren Hezkuntzako Drogen Erabilerari buruzko Inkestaren emaitzak. Inkesta horretan barne hartu dituzte nerabezarotik (12 urte) lehenengo gaztarora (18/22 urte) bitarteko ikasleak.

Droga-mendetasunen Deustuko Institutuak 1981-82 ikasturtetik egiten du inkesta hori, eta institutu horren eta Eusko Jaurlaritzako Osasun Sailaren arteko lankidetzaren emaitza da, Osasun Publikoaren eta Adikzioen Zuzendaritzaren bitartez.

Azken edizio honek eman duen daturik adierazgarriena da legezko eta legez kanpoko drogen kontsumoak maximo historikoetatik beherantz doazela (2006an goia jo zuen), 2011ko eta 2017ko neurketetan ikusitako joera berretsiz, eta kontsumo-maiztasun guztietan baliozkoa izanik.

Oro har, datuek baieztatzen dute azken 12 hilabeteetan ikasleen ehuneko handienak kontsumitu dituen adikzio-potentziala duten substantziak adin nagusikoen artean erosketa zilegia izaten jarraitzen dutela.

Lehenik eta behin, alkohola eta tabakoa kontsumitzen dutela dioten pertsonen proportzioa oso altua da oraindik. Inkestatutako biztanleen erdiak baino gehiagok (% 54,6k) adierazi du alkohola kontsumitu duela azken urtean, eta ia % 30ek, tabakoa.

Marihuana hirugarren postuan dago, % 17,4ko prebalentziarekin (kontsumitzen duela adierazten duen biztanleriaren proportzioa), eta ondoren, errezetak dituzten hipnosedanteak daude, % 7raino iristen baitira.

Gainerako substantziek prebalentzia txikiagoak dituzte. Kokaina % 2,2koa da; anfetaminak, % 1,8koa; estasia, % 2,2koa; arnastekoak, % 1,4koa; eta aztertutako gainerako substantzien kontsumoa % 1etik beherakoa da.

Ludopatia eta jokoaren abusua

Diru bidezko joko eta apustuen praktikei dagokienez, jokoaren prebalentzia murriztu egin da azken urtean 2017ko datuekin alderatuta, covid-19aren pandemiaren kontrolari lotutako murrizketa sozialengatik (2022aren hasierara arte iraun dute).

Alde handia dago sexuaren arabera: gizonek gehiago jokatzen dute emakumeek baino, eta prebalentzia handitu egiten da adinaren arabera.

Ikasleek azken urtean gehien erabili dituztenak dira txanpon-makinak (% 13,6), kirol apustuak (% 13) eta diruz egindako karta jokoak (% 12,6), eta neurri txikiagoan, baita online jokoak (% 7,4) ere.

Joko-prebalentzia orokorrek behera egin duten arren, ikasleen % 4,3 arrisku egoeran dago, eta % 5,7 jokalari problematikoak izan daitezke.