Eliza Katolikoak kanporatutako gotzainak Klaratarrak babestea onartu du

Pablo de Rojas Sanchez-Francok, Pia Union Sancti Pauli Apostoli delakoaren sortzaileak, Beloradoko (Burgos) eta Urduñako Klaratarren komunitatea bere jurisdikziopean egotea onartu du, Isabel de la Trinidad abadesak Eliza katolikoa utzi eta Erromarekin komunioan ez dagoen erakunde horren tutoretzara igarotzeko eskatu ondoren.

Alde batetik, ama abadesak "jurisdikzio-tutoretza" eskatu du berarentzat, baina baita beste mojentzat ere. Guztira 16 moja dira, Beloradokoen eta Urduñakoen artean.

Eskaera horren aurrean, De Rojasek jakinarazi du onartu egingo dutela mojak Pia Union Sancti Pauli Apostoliren jurisdikziopean egotea.

Isabel de la Trinidadek erlijio-elkarte osoaren izenean sinatutako gutunean Pio XII.a hartzen da baliozko azken aita santu gisa, eta ondorengo aita santuei heresia leporatzen zaie.

Mojetako batek alde egin du komentutik, ez baitago ados De Rojasen jurisdikzioarekin.

Ate itxiko mezak

Web orrian, ustez Beloradoko Santa Klara monasterioko elizan ateak itxita egin ziren bi mezaren irudiak agertzen dira.

Burgosko Artzapezpikutzak adierazi duenez, argazkiak komentuko elizan ospatutako meza batekoak direnaren baieztapena falta da. Horrela balitz, zisma gauzatuko litzateke, Zuzenbide Kanonikoaren Kodeak delitutzat jotzen duena, eta erlijiosoak eskumikatzea eragingo luke.

Oraingoz, Artzapezpikutzak ez du azken erabaki horri heltzeko asmorik, egoerari buelta ematen saiatzeko lanean ari dela adierazi baitu. Bestalde, ez du baieztatutzat ematen meza monasterioan egin denik, ezta moja guztiak egoerarekin ados daudenik ere.

Era berean, ez dietela eskumikatze espedienterik irekiko mojei adierazi dute.

Liskarraren jatorria

Liskar horren jatorrian Beloradoko Isabel de la Trinidad abadesak idatzitako gutun bat dago. Bertan, Urduñako komentua erosiko lukeen ongile bat aurkitu duela adierazten du. Baina, ongile horrek jatorrizko kontratua aldatzeko eskatu zuen, eta Urduñako komentua bere izenean erregistratzea.

Arabako moja eta fraideen arduradunak azaldu duenez, behin baino gehiagotan saiatu zen Beloradoko ama abadesaren azalpenak entzuten, onuraduna Pablo de Rojas gotzain eskumikatua zela jakin zuten arte.

Pablo de Rojasek satanikotzat jotzen du Pio XII.aren ondorengo eliza katoliko osoa. Megalomania kasu argia da, sektetako adituen arabera.

16 mojek ukatu egin dute Vatikanoaren zilegitasuna, eta gizon horren zaintzapean egongo direla ziurtatu dute.

Kasua judizializatuta dago eta Klaratarrek ia bi milioi euro eskatzen dizkiote komentuaren salerosketa eten duen Gasteizko gotzaindegiari.