Alvesen absoluzioaren gaineko erreakzioak: "atzerapausoa", "justizia patriarkala" edo "kezkagarria"

Dani Alves absolbitzeko epaiak berehalako erreakzioak eragin ditu politika eta justizia munduan.

Ester Garciak, Dani Alves bortxaketagatik salatu zuen emakumearen abokatuak, futbolaria absolbitzeko erabakia errekurrituko duela iragarri du, eta biktima "oso atsekabetuta eta triste" dagoela azaldu du: "Gertaerak izan ziren bainugelara itzuli balitz bezala sentitu du".

Garciak deitoratu duenez, Alves absolbitzea "emakumeen indarkeriaren aurkako borrokan atzerapausoa da, maila juridikoan zein sozialean", eta horrek sexu-erasoen biktimak salaketa ez jartzera eraman ditzake. 

Bestalde, Ana Redondo Berdintasun ministroak ostiral honetan epaiaren berri izan duenean adierazi duenez, "erabaki judizialekiko errespetua oinarrizko printzipioa" bada ere, ez dator bat Kataluniako Auzitegi Nagusiaren erabakiarekin, eta "legeak sexu-harremanen erdigunean adostasuna jartzen du", azpimarratu du.

"Ezin da emakumeen ahotsa etengabe zalantzan jarri, eta bi ahots daudenean gizonarena izatea gehien balio duena", esan du ministroak. Hori da, hain zuzen ere, bere ustez, "gizarte gisa planteatu behar duguna", jarrera hori "historiara igaro" baita, "bai gizartearentzat, bai araudiarentzat ere", "emakumea esaten ari dena egiazkotzat hartu eta hori errespetatu, babestu eta bermatu" behar dela esaten duelako.

Redondoren arabera, emakumeek "salatzeko aukera izan behar dute" eta "euren ahotsa eta hitza sinesgarria dela jakin behar dute". Hori dela eta, Botere Judizialari "hausnarketa" egiteko eskatu dio, "Espainiako gizarteak aurrera egin baitu".

Irene Montero Berdintasun ministro ohiak honakoa idatzi du X sarean: "Dani Alves absolbitzen duen epaia, biktima sinesgarria ez dela argudiatzen duena, emakumeak babesik gabe uzten dituen indarkeria instituzionalaren eta justizia patriarkalaren adibide argia da, eta NBEk dioen bezala, erasotzaileen zigorgabetasunaren kulturari eusten dio. Behin eta berriz: bai bakarrik da bai".

Rosa Gil Themis Emakume Juristen Elkarteko presidenteak epaileen erabakiaz esan duenez, "balorazioa nahiko etsigarria da. Epai honekin lortu den emaitza erabat negatiboa da, nire ustez, sexu-eraso bat salatzera ausartzen diren emakumeentzat; izan ere, zoritxarrez, epaian nolabait ebaluatzen dena biktimaren sinesgarritasuna da".

Bestalde, "errugabetasun-presuntzioan erabat sinistu arren", horrelako epaiek sexu-indarkeriaren biktimak salatu ala ez zalantza egitera eraman ditzaketela erantsi du. "Horren ondorioz, logikoki, halako egoera bat jasan duten gainerako biktimek zera esaten dute: 'Nora noa ni? Azkenean aztertuko dena ni egiten ari naizena bada, nik egin dudana, nik esan dudana', azaldu du.

Eva Menor Kataluniako Generalitateko Berdintasun eta Feminismo kontseilariaren esanetan, "oso kezkatuta" daude "Justizia Administrazioak, behin eta berriz, zalantzan jartzen duelako biktimaren beraren deklarazioaren sinesgarritasuna".

Dani Alves absolbitu izana "zaplaztekoa" dela esan du Victoria Rosell Genero Indarkeriarako Gobernuaren ordezkari ohi eta magistratuak. Rosellek Radio Euskadiko "Crónica de Euskadi" saioan parte hartu du, eta zigor-epaia baliorik gabe utzi izana epaileak berdintasunean behar bezainbeste prestatuta ez egoteari egotzi dio.