Aurreikusitakoa baino trafiko-hazkunde handiagoa ari dira erregistratzen euskal errepideak uda honetan

Udako Irteera-Itzulera Operazio Bereziaren balantzea egin du Eusko Jaurlaritzak operazio horren ekuatorean, eta nabarmendu duenez, aurreikusitakoa baino trafiko-hazkunde handiagoa erregistratu dituzte euskal errepideek operazioaren lehen hilabete honetan. 

Estibaliz Olabarri Eusko Jaurlaritzako Trafiko zuzendariak larunbat honetan emandako datuen arabera, gora egin du Frantziatik eta Europako gainerako herrialdeetatik Portugalera eta Afrika iparraldera doazen ibiligailuen kopuruak. Uda honetan, nazioarteko trafikoa % 4,5 hazi da 2024arekin alderatuta; % 3,8ko igoera aurreikusten zen. Bestalde, barne-trafikoan % 3ko hazkundea espero zen baina % 3,5eraino hazi da. Barne-trafikoaren bolumen handiena, batez ere A-8 autobidean, Kantabriarekiko lurralde-mugan erregistratu da, eta asteburuetan. 

Auto kopuruak gora egin badu ere, Olabarrik azpimarratu duenez zirkulazioa "arin samar" igarotzen ari da, auto-ilara andirik eta gorabehera nabarmenik gabe. 

Data garrantzitsuak

Irteera operazioan, nazioarteko zirkulazioan dauden ibilgailuen fluxurik handiena euskal errepideetan asteburu honetan (uztailaren 25, 26 eta 27an) eta hurrengo asteburuan (abuztuaren  1, 2 eta 3an) erregistratuko da. Egun kritiko hauetan guztietan, Trafiko Zuzendaritzak seinaleztapen bereziak jarriko ditu martxan trafikoaren arintasuna bermatzeko eta bide-segurtasuneko arriskuak minimizatzeko, honako gune estrategiko hauetan: AP-1 autobideko irteeran eta N-622 errepideko lotunean, Etxebarri-Ibiñan, Gasteizko noranzkoan, eta N-622 eta A-1 errepideen arteko lotunean, Gasteizen, Burgos/Madrilerako noranzkoan.

Eta Itzulera Operazioan, datarik kritikoenak abuztuko azken bi asteburu luzeak izango dira, ostegunetik igandera, oporretako itzulera askoz modu mailakatuagoan egiten baita, hau da, abuztuaren 21etik 24ra eta 28tik 31ra. Egun horietan, seinaleztapen-dispositibo berezia jarriko da Armiñongo lotunean, AP-1 autobidearen eta A-1 autobidearen arteko lotunean, Gasteizko noranzkoan. Puntu horretan, konoen eta seinale berezien bidez, A-1eko hiru erreietako bat lagako zaie AP-1etik modu masiboan sartzen diren ibilgailuei, segurtasunez eta 80 km/h-ko abiadura egonkorrean sartzea bermatzeko.

Bost hildako, hilabetean

Ekainaren 27an Irteera Operazioa hasi zenetik bost pertsona hil dira EAEko errepidetan izandako istripuetan. Hildakoak bi motor-gidari (57 urteko emakume bat Biakzian eta 75 urteko gizon bat Gipuzkoan), trirrindulari bat (53 urteko gizon bat Gipuzkoan) eta bi oinezko (62 urteko gizon bat Gipuzkoan eta 90 urteko emakume bat Gasteizen) izan dira. Iazko uztailean bi izan ziren hildakoak.