Osakidetzak eta Osasunbideak maskara erabiltzea eta txertatzea gomendatzen dute, gripe kasuek gora egiten jarraitzen dutelako

Goranzko bidean jarraitzen du gripearen intzidentziak Euskal Autonomia Erkidegoan. Horregatik, Jaurlaritzak txertoa hartzeko eta maskara erabiltzeko aholkatu die berriro herritarrei Eusko Jaurlaritzako Osasun Sailak. "Txertoa jartzea eta maskara erabiltzea dira, gaur egungo testuinguruan, gripearen aurkako prebentzio-tresna egokienak", azpimarratu du. 

Datuei begiratuta, iaz garai honetan baino lau aldiz kasu gehiago erregistratu ditu Osakidetzak. Ospitaleratzeen kopurua, berriz, bost aldiz handiago da. Azken aste honetan, 438,87 gripe kasu atzeman dira 100.000 biztanleko, aurreko astean baino 81 gehiago. 2024ko abenduko bigarren astean intzidentzia 160,24koa zen 100.000 biztanleko. 

Gaur zabaldu ditu datuok Jaurlaritzak, eta ohartarazi du Gabonetako astean jo dezakeela goia epidemiak, goranzko joerari eutsiz gero. 

Kasu gehien, Bizkaian

Lurraldeka, intzidentziak handiagoa izaten jarraitzen du Bizkaian, 506,44 kasurekin, baina Araban ere nabarmen igo da, 445,99 kasurekin: Azken lurralde horretan, joan den asteko intzidentzia 322,27koa zen 100.000 biztanleko. Gipuzkoan, berriz, 330ekoa da. 

Kanpaina hasi zenetik, Osakidetzako ospitale-sarean 9.894 kasu artatu dira, eta, orain arte, 1.086 ospitaleratze izan dira; horietatik 37, Zainketa Intentsiboetako Unitateetan (ZIU). Kopuru hori iaz erregistratutakoa halako bost da. 

Ospitaleetako oheen % 75,73 daude beteta une honetan. Duela bi asteko egoerarekin alderatuta, tasa % 4,27 igo da.

Nafarroa

Osasunbidea Nafarroako Osasun Zerbitzuak 2025-2026 aldirako Neguko Kontingentzia Plana aktibatu du. Plan horren arabera, zerbitzu kritikoetan langileak indartuko dira (batez ere Larrialdietan eta Pediatrian), eta ospitaleetan oheak gehituko dira. Horrez gain, maskara erabiltzea gomendatu die arnas sintomak dituzten pertsona guztiei.

Nafarroako Osasun Publikoaren eta Lan Osasunaren Institutuak argitaratu duen Zaintza Epidemiologikoaren azken buletinean jakinarazten den bezala, arnas birusen intzidentziak goranzko joera du, eta gripe denboraldia aste batzuk aurreratu da 2023arekin eta 2024arekin alderatuta.

Gripearen intzidentzia, Europan

Maskara derrigorrezkoa da Katalunian, ospitaleetan, osasun zentroetan eta egoitzetan sartzeko, azken 15 urteetako gripe kasu gehien hautematen ari direlako eta kasuek gora egiten jarraitzen dutelako. Madrilen ere, maskara jartzea derrigorrezkoa da, intzidentzia azken hiru urteetako handiena da eta. 

Gripea Europa hegoaldeko herrialdeak astintzen ari da bereziki: Frantzia, Alemania, Erresuma Batua eta Italia. Adibidez, Ingalaterran pandemia garaiko neurriak itzuli dira, hezkuntza zentroetan batzarrak eta talde bilerak murriztu, aurrez aurreko jarduera batzuk bertan behera utzi eta gel hidroalkoholikoa erabiltzen dabiltza.

Txertaketa

Oraingoz, EAEko biztanleen laurdenak jarri dute txertoa, eta 60 urtetik gorakoen artean txertoa jarri dutenen kopurua % 55,8koa da. 

Orotara, gripearen aurkako 569.999 txerto jarri dituzte Osakidetzako zentroetan, eta covidaren kontra, 295.681.

Zaharren egoitzetako erabiltzaileei dagokienez, berriz, hamarretik bik baino gehiagok hartu dute txertoa. Haurren kasuan (5 urtetik beherakoak), % 40,6ri jarri zaie gripearen kontrako txertoa.