Nafarroako Erribera da gaur arretagune: Ega eta Ebro larrialdi aurreko egoeran daude uholde arriskuagatik
Bi ibai horien emariak gertutik ari dira zaintzen Andosilla eta Castejon parean; izan ere, Ebroko Konfederazio Hidrografikoaren esanetan, arratsaldean harrapatuko du Ebrok bere maila gorena. Gainera, bigarren mailako bost errepide daude itxita, ibaiek gainezka egin baitute.
Oriana ekaitzak dozenaka gorabehera eragin ditu Euskal Herri luze-zabalean azken orduetan, eta ibaiak gainezka egitear doaz puntu askotan, baina okerrena pasatu dela dirudi. Gaurko, euri gutxiago espero da, eta, horrekin batera, ibaien emariak behera egingo du.
Hala ere, uholde arriskua kezka iturri izango dira gaur Erriberan, bi ibai, Ega eta Ebro, oso hazita baitoaz. Nafarroako Gobernuak emandako datuen arabera, Ega 3,96 metrora heldu da Andosilla parean, eta emaria segundoko 230,60 metro kubikokoa da; Ebrok, berriz, 6,78 metroko altuera harrapatu du, eta ur-emaria segundoko 1.688 metro kubikokoa da.
Nafarroako gainerako ibaien egoera ohikoa da. Hala, Argaren kasuan, 0 larrialdi maila bertan behera utzi dute goizean.
Dena dela, Foru Erkidegoko bigarren mailako bost errepide itxita daude, uholdeengatik.
Iruñean, zarratuta dago NA-30 errepidea, Landabengo industrialderako sarbidea. NA-6140 errepidea (Tafalla-Miranda Arga) ere itxita dago 11. kilometrotik aurrera. Egak gainezka egin du Arbeitza parean, eta, ondorioz, itxita dago NA-7454 errepidea. Urak hartuta daude, halaber, NA-2410 errepidea (Sakana), 12. kilometrotik aurrera, eta NA-2316 errepidea (Zulueta). Gainera, A-15eko eskuineko erreia itxita dago 124. kilometrotik aurrera, errepidea egoera txarrean baitago.
Euskal Autonomia Erkidegoan, Zadorra da arretagune bakarra, baina bart maila horira jaitsi da Abetxukun (Gasteiz).
Euskalmeten datuen arabera, atzo metro koadroko ia 73 litro pilatu ziren Otxandioko estazio meteorologikoan (Bizkaia), 64 Urkiolan (Abadiño, Bizkaia) eta 58 Bidania Goiatzen (Gipuzkoa).
Zure interesekoa izan daiteke
Iruinkokoak hankaz gora jarri ditu Alde Zaharreko kaleak
Euskal inauterietako ekitaldia egin dute berriro gaur Iruñeko Alde Zaharreko kaleetan.
Irunen ustez lapurreta saiakera egin eta bere burua uretara bota duen gizon baten bila ari dira Bidasoa ibaian
Gertakaria bart jazo da, Gipuzkoako udalerrian. Herritar batek bi gizon ikusi ditu ibilgailuak garbitzeko gune batean lapurreta egiten, eta ertzainak heldu direnean, horietako batek uretara egin du salto; bestea, 31 urteko gizasemea, atxilotu egin dute.
Gizon baten bila ari dira Irunen, Bidasoa ibaira erori ostean
Irunen uretara erori den gizon baten bila ari dira igande goizean larrialdietarako zerbitzuak. Bidasoa ibaiak emari handia du, azken egunotako prezipitazio handiengatik.
Haur Minbiziaren Eguna da gaur, adingabeei erasaten dien gaixotasunaren larriaz ohartarazteko eguna
Osakidetzak 60-70 minbizi kasu berri diagnostikatzen ditu urtero 19 urtetik beherakoen artean; Nafarroan, 20 bat kasu artatzen dituzte. Haur minbiziadunen familien elkarteek hainbat jarduera egingo dituzte gaur gaixotasuna bistaratzeko eta kontzientziak pizteko.
Eguraldiak ez du mozorroen festa zapuztu, eta askok aterpea bilatu dute inauteriez gozatzeko
Denboralearen eraginez aldaketak egin behar izan dituzte hainbat tokitan, baina herritar asko inauterietan parte hartzera atera dira kalera.
Bilboko eta Donostiako konpartsen larunbat arratsaldeko desfileak bertan behera, denboraleagatik
Euri eta haizea dela eta, Bilboko Udalak bertan behera utzi ditu larunbat honetako hainbat ekitaldi baina gaueko desfileari eustea erabaki dute. Donostian, hasi eta gutxira erabaki dute desfilea bertan behera uztea.
Uribarri Ganboako urtegia husten hasi dira, bere edukieraren % 86ra iritsi ostean
17:30ean hasi dira Bilbo eta Gasteiz urez hornitzen dituen urtegia husten. Hain zuzen ere, segunduko 15 metro kubo ur botatzen ari da Zadorra ibaira.
Atzerapenak izan dira Laudio eta Ugao arteko tren zerbitzuan, zuhaitz bat trenbidera erori delako
Adifek jakinarazi duenez, gutxienez 30 minutuko atzerapenak izan dira arratsaldean.
Zuhaitz eroriak, lur-jausiak eta ur-putzuak EAEko errepideetan, denboralearen ondorioz
Bigarren mailako errepide askotan, luizi txikiak izan dira eta ur-putzuak sortu dira nonahi. Legution, Kanpezun eta Astegietan ur putzu handiak daudela ohartarazi du Ertzaintzak, eta N-634 errepidean kontuz gidatzea gomendatu du, luizi batek arazoak sortu dituelako zirkulazioan, Zarautz eta Getaria artean.