Hondarribiko Alarde tradizionalak utzi egin du gatazkari konponbidea emateko elkarrizketa prozesua

Hondarribiko Udalak jakinarazi du Hondarribiko Alardearen Ondarea Sustatzeko Elkarteak (HAOSE, emakumeen partehartzea mugatzen duena) Alardearen inguruko gatazka sozialari konponbidea bilatzeko abiatu zen elkarrizketa prozesua utzi duela. Udalaren esanetan, erabakia “arduratuta” hartu du, prozesuak herriko gatazka historikoari irtenbide partekatu bat eraikitzeko aukera eskaintzen zuelako.

Udalak azaldu duenez, azken hilabeteotan HAOSEk jakinarazi dio bitartekaritza prozesutik “bertan behera gelditzen zela”. Horren ostean, Udalak bilerak egin ditu HAOSErekin eta Jaizkibel Konpainiarekin egoera argitzeko eta hitzarmenetik sortutako elkarrizketa bidea mantentzen saiatzeko. Hala ere, “helburua, beti bezala, elkarrizketari ekitea izango zen, nahiz eta momentuz ez den horrelakorik lortu”.

Elkarrizketa prozesua 2025eko urriaren 2an abiatu zen, Udalak, HAOSEk eta Jaizkibel Konpainiak sinatutako hiru aldeko hitzarmen baten bidez. Akordio haren helburua Alardearen inguruko gatazka sozialari bitartekaritza profesional baten bidez heltzea eta eragileen arteko ulermena sustatzea zen.

Prozesua Baketik Fundazioaren gidaritzapean hasi zen. Udalak gogorarazi du fundazioa hiru aldeek onartutako bitartekari gisa izendatu zutela, eta hasierako fasean lau bilera bilateral egin zirela: bi Udalaren eta Jaizkibelen artean, eta beste bi Udalaren eta HAOSEren artean. Udalaren arabera, “hasierako pausu hauetan aurrerapenak” izan ziren.

Udal Gobernuak nabarmendu du Alardearen inguruko konponbideak “sendoa, iraunkorra eta egonkorra” izan behar duela, eta horretarako ezinbestekotzat jotzen duela eragileen arteko akordioa eta elkarrizketa. Era berean, azpimarratu du prozesua ez dela HAOSEren eta Jaizkibelen arteko harremanetara mugatzen; herritarren parte-hartzea, Bozeramaileen Mahaia, Erakunde arteko Mahaia eta Udaleko Berdintasun Mahaia ere konponbidearen parte direla.

Baketik Fundazioak ere prozesuaren inguruko balorazioa partekatu du. Fundazioaren hitzetan, “esperientziak erakusten digu gatazka egoeretako elkarrizketa-prozesuak ez direla linealak: lana, konpromisoa eta denbora behar dituzte”, eta orain arte egindako urratsek erakutsi dute iraganeko tentsioak gainditzeko borondatea badagoela.

Alardearen bezperan, Hondarribiko Udalak berretsi du gatazka sozialari konponbide partekatu baterako baldintzak eraikitzen jarraituko duela. Horretarako, “lasaitasuna, erantzukizuna eta errespetua” eskatu dizkie herritarrei eta eragile guztiei, eta azken urteotan irekitako elkarrizketa-bideak zaintzeko deia egin du.