Brad Pittek Donostia bisitatuko du berriro ere Zinemaldiaren 74. edizioan

Aktore estatubatuarra Gipuzkoako hiriburuan izango da Heart of the Beast filmarekin; Sail Ofizialean proiektatuko da, lehiaketatik kanpo.

Brad Pitt Donostian egon zen 2009an. Argazkia: Donostiako Zinemaldia.

EITB

2026/08/24 - 11:52

Azken eguneratzea

2026/08/24 - 11:52

Donostiako Zinemaldiko Sail Ofizialean Heart of the Beast filma egongo da, David Ayerrek zuzenduta eta Paramount Picturesen eskutik. Lehiaketatik kanpo parte hartuko du, eta Brad Pitt eta Ayer ekarriko ditu Donostiara.

Film programazioan sartuta, Sail Ofizialeko filmen zerrenda osatu egin da. Hala, 74. edizioan, 17 film egongo dira lehian, hiru lehiaketatik kanpo ikusi ahalko dira eta bost Emanaldi Berezi gisa emango dira.

Bestalde, filma dela eta, Pitt Donostiara itzuliko da, 2009an bisita egin ondoren. Urte horretan, Inglourious Basterds filma aurkeztera etorri zen, zuzendari Quentin Tarantinorekin batera.

Cameron Alexanderrek idatzitako eta Ayerrek zuzendutako Heart of the Beast film luzeak Pitt eta zuzendaria berriz elkartu ditu. J.K. Simmons eta Anna Lambe aktoreek ere parte hartu dute, eta Pittek filma ekoitzi du Olivia Hamilton, Marty Bowen eta David Ayerrekin batera. Bestalde, Damien Chazelle da ekoizle exekutiboetako bat.

Heart of the Beast (Piztiaren bihotza)

Zuzendaria: David Ayer (AEB).

Ekoizpen-herrialdea: AEB.

Antzezleak: Brad Pitt, J.K. Simmons, Anna Lambe.

Hegazkin istripu latz batetik bizirik atera ondoren, James Belmont Indar Berezietako ofiziala (Brad Pitt) eta Odin haren gerra-txakurra Alaskako bihotz menderaezinean harrapatuta geratu dira. Natura gupidagabeari aurre egiteko, biek bizirik irauteko gogor borrokatu beharko dute. David Ayer zuzendari txalotuaren eskutik, Heart of the Beast leialtasunari, adoreari eta soldadu batek eta haren lagunik leialenak euren erronka handienean duten lotura hautsiezinari buruzko abentura-thriller bizia da.