Gazako lurreko operazioa gelditzeko eskatu dio Abasek Israeli

Mahmud Abas Palestinar Aginte Nazionaleko presidenteak Gazan Israelek abian jarri duen lurreko operazioa gelditzeko eskatu die buruzagi israeldarrei. Eraso horrek "egoera okertu" baino ez duela egingo esan du Abasek.

Kairon kazetarien aurrean gaur egindako agerraldian Palestinako presidenteak nabarmendu duenez, Israel azken asteotan Gazan egiten ari den erasoek ez dute "gatazka" konponduko eta "hildako gehiago" eragingo dituzte.

Abdelfatah al Sisi Egiptoko presidentearekin atzo izandako bileraz ere hitz egin du Abasek. Horren esanetan, hitzordu "garrantzitsua" izan zen "Gazaren aurkako erasoa eteteko", Egiptok har ditzakeen neurrien inguruan hitz egin zutelako.

Ziad al Najla Jihad Islamiarreko idazkari nagusiarekin ere bildu da azken orduotan Palestinako presidentea. Talde horrek su-etena deitzeko borondatea izan baduela esan du Palestinako presidenteak. Halaber, Hamas taldea konbentzitzeko eskatu dio Al Najlari Abasek, Egiptok hartuko dituen neurriak babes ditzan.

Jaled Meshal Hamaseko buruarekin bilera hitzartuta izatea ukatu du Abasek, baina ez duela harekin biltzeko inolako arazorik azaldu du. "Ez dut biltzeko arazorik, betiere Egiptoren bitartekaritza onartzen bada eta su-etena ezartzea kontuan hartzen bada", zehaztu du.

Uztailaren 8an Israelek Gazan operazioa abiatu zuenetik, gutxienez 290 zibil palestinar hil dira jada, adinekoak, emakumeak eta haurrak (80 bat) tartean.

Netanyahu: "Aukera guztiak agortu ondoren ekin diogu lurreko erasoari"

Benjamin Netanyahu Israelgo lehen ministroaren erantzuna berehala etorri da. Gazan lurreko erasoari ekitea "gainerako aukera guztiak agortu ondoren" erabaki zutela esan du, eta Hamas taldeari egotzi dio gatazka honetan hildako guztien ardura.

"Egiptok su-etenerako egindako proposamena onartu genuen , eta NBEk eskatutako su-eten humanitarioa ere bai, baina Hamasek tiroka jarraitu zuen",  esan du Netanyahuk. Tel Aviven egin ditu adierazpenok kazetarien aurrean,  Israelgo Defentsa Ministerioren bilera baten ostean.

Erasoa hasterako,  honen ondorioak oso larriak izan zitezkeela jakitun zirela esan du buruzagi israeldarrak.  Bere hitzetan, egoera "bideratzeko" ahaleginetan ari da Israelgo Gobernua, eta nazioarteko hainbat buruzagirekin hitz egin dute azken egunotan.  "Israelek bizi duen egoera jasangaitza" dela nabarmendu du, eta "Hamas talde terroristaren aurka modu arduratsuan" ari direla erantzuten gaineratu du.

Israelen Gazako operazioa defendatu du Obamak

Barack Obama Estatu Batuetako presidenteak "Israelen defendatzeko eskubidea" aldarrikatu du gaur, eta Gazan sartu izana defendatu du. Aliatuari lurralde palestinarreko "biktima zibilak murrizteko" moduan jokatzeko eskatu dio.

Etxe Zurian egindako adierazpenen arabera, Obama Benjamin Netanyahu Israelgo lehen ministroarekin mintzatu da gaur, eta John Kerry Estatu idazkaria bertara bidaliko duela esan dio, su etena lortu ahal izateko. Bien bitartean, abian jarraitzen du Israelgo Ejertzitoaren Gazaren aurkako operazioak, eta jada 290 palestinar hil eta 2.051 zauritu dira.

"Israelen defendatzeko eskubidea irmoki berretsi dut. Inork ez luke onartu behar bere mugen barruan suziriak jaurtitzea, ezta terroristak tuneletatik euren lurretara sartzea ere. Netanyahurekin hizketan ari nintzela, gainera, Tel Aviveko sirenak jotzen hasi dira", gehitu du.

Agintari estatubatuarrak azpimarratu du bai AEB baita bere aliatuak ere "oso arduratuta" daudela "indarkeriaren gorakada" eta "errugabe gehiagoren hilketa" dela eta.

Ban Ki-moon NBEko idazkari nagusia Ekialde Hurbilean izango da larunbat honetan, Jeffrey Feltman NBEko idazkariorde politikoak aurreratu duenez. Israelen eta Palestinaren arteko su-eten bat bultzatzen saiatuko da.