EBk uko egin dio Ormuzera aktibo militarrak bidaltzeari, berea ez den gerra bat delako

Europar Batasuneko Atzerri ministroek astelehen honetan errefusatu dute Ormuzeko itsasartean ‘Aspides’ itsas misioaren agintaldia luzatzeko aukera. 

“Hau ez da Europaren gerra”, adierazi du Kaja Kallasek, EBko Kanpo Arazoetarako eta Segurtasunerako goi ordezkariak, Europar Batasuneko ministroen kontseiluaren amaieran emandako prentsaurrekoan. “Guk ez dugu gerra hau hasi, eta helburu politikoak ez daude argi”, azpimarratu du.

Nolanahi ere, Estoniako politikariak onartu du “Europaren interesak zuzenean jokoan” daudela gatazka horretan, eta Iran “munduko ekonomiaren aurkako gerra” egiten ari dela orain.

Bestalde, Donald Trump AEBko presidenteak nazioarteko aliatuen “gogo falta” kritikatu du Ormuzeko itsasartean misio militar “txiki” batean inplikatzeko orduan. Era berean, NATOko kideei egindako kritikak errepikatu eta Washingtonek proposatutako operazioan ez parte hartzea gaitzetsi ditu, AEBko Armadak “40 urtez” babesa eman duenean.

Etxe Zurian egindako hitzaldi batean, Trumpek berriro berretsi du nazioarteko kideek Ormuzeko itsasartea desblokeatuko duen hedapen militar batean parte hartu behar dutela. “Beste nazio batzuei biziki gomendatzen diegu, haien ekonomiak itsasartearen menpe baitaude, gurea baino askoz gehiago. Guk gure petrolioaren % 1 baino gutxiago lortzen dugu itsasartetik, eta herrialde batzuek askoz gehiago lortzen dute”, azpimarratu du.