Euskal langileria kalera atera da Maiatzaren Lehenean

Maiatzaren 1ean, euskal langileria kalera atera da, Langileen Eguna dela-eta sindikatuek egin dituzten hainbat deialditan. 

ELAk Bilbon egin du ekitaldi nagusia, Jesusen Bihotza plazan. Mitxel Lakuntza idazkari nagusiak 1.500 euroko Lanbide arteko Gutxieneko Soldata (LGS) aldarrikatu du bertan, baita kanpoko injerentziarik gabeko Euskal Herria ere, inperialismo eta gerrarik gabekoa. "Jo ta ke, hemen erabaki arte" lelopean, ehunka pertsonak Bizkaiko hiriburuko erdigunea bete dute. 

ELA sindikatuak gutxieneko soldata propioa eskatu du Nafarroan, Iruñean, baita Erorien Monumentua eraistea eta NATO desegitea ere.

Maiatzaren Lehenean, hain zuzen ere Erorien Monumentutik abiatu da  horrek deitutako manifestazioa, ikuspegi "antifaxista" batekin, bertan aldarrikatu duten bezala.

Imanol Pascual Nafarroako ELAko koordinatzaileak 1.500 euroko gutxieneko soldata eskatu du sindikatuaren izenean, eta kritiko agertu da PSNrekin eta Zurekin Nafarroa alderdiekin, martxoan EH Bilduk eta Geroa Baik Nafarroako Parlamentuan aurkeztutako proposamenaren aurka bozkatu baitzuten, PPNrekin eta Voxekin batera.

"Maria Chivite presidenteari eskatzen diogu UGTren eta CCOOren jarrera zentralistetatik aldentzeko eta Nafarroarentzat gutxieneko soldata propioa onartzeko eskumena aldarrikatzeko. Hori lortuz gero, lan merkatuan okerren dauden pertsonei egingo diegu mesede, batez ere migratuei eta emakumeei", adierazi du sindikalistak.

LABek "enplegua, zaintza lanak eta ondasuna banatzeko politikak" eskatu ditu

Palestinako, Kubako eta Venezuelako bandera ugari izan dira ikusgai Donostian, LABek Maiatzaren Lehenean deitutako manifestazioan. Garbiñe Aranburu idazkari nagusiak aberastasuna banatzeko politikak eskatu ditu, eta "gerra kapitalistak eta inperialistak" eta "Pradalesek PSErekin eta Confebaskekin dituen hipotekak" salatu ditu.

Euria iragarrita zegoen arren, eguzkipean abiatu dira Easo plazatik egunka lagun "Etxebizitza eskubidea. Kalitatezko zerbitzu publikoak. Soldata eta pentsio duinak" leloa zeraman pankartaren atzetik. 

Alde Zaharrean, Trinitate plazan amaitu den ekitaldian, Aranburuk "enplegua, zaintza lanak eta ondasunak banatzeko politikak" martxan jarri beharra azpimarratu du, "soldatak eta pentsioak hobetzeko politikak, zerbitzu publikoak eta etxebizitza eskubidea bermatzeko". 

Horren esanetan, LABek ez du onartuko Ekialde Hurbileko gerraren aitzakian lanpostuak galtzea, lan baldintzak okertzea eta bizitza garestitzea.

Imanol Karrera Nafarroako LABeko bozeramaileak esan du beharrezkoa dela 1.500 euroko gutxieneko soldata bermatzea foru erkidegoan, eta ohartarazi du langileak ez daudela prest egungo testuinguru ekonomikoaren eta nazioartekoaren “faktura ordaintzeko”.

Maiatzaren Lehenaren harira Iruñean egin duten mobilizazioan, egoitzen sektoreko langileak zoriondu ditu Nafarroako lehen hitzarmena lortzeagatik; izan ere, azpimarratu duenez, hitzarmen horrek lan baldintzak hobetzen ditu, eta “borrokatzen bada, aurrerapen handiak lor daitezkeela” erakutsi du.

Gainera, nabarmendu du akordio horrek 1.500 euroko gutxieneko soldata finkatzen duela, eta agerian uzten duela “Nafarroan negoziatzeak estatu mailan baino baldintza hobeak ahalbidetzen dituela”.

Erantsi duenez, enpresa energetiko handiek beren etekinak handitzen dituzten bitartean, herritarrek bizitzaren kostua garestitzea eta hezkuntza edo osasuna bezalako zerbitzu publikoen narriadura jasaten dute, eta hori “onartezina” da.

Horren aurrean, “politika propioak”, autogobernu handiagoa eta ekonomiaren kontrol publiko handiagoa eskatu ditu, eta neurri horiek erkidegoan soldata duinak bermatzeko beharrarekin lotu ditu.

CCOO eta UGT elkarrekin doaz eskubideen alde eta lubakien aurka

Etxebizitzaren krisia, gerraren kontrako aldarria eta lan istripuen aurkako borroka izan dira nagusi Euskadiko CCOOk eta UGTk Maiatzaren 1ean egindako mobilizazioetan. Elkarrekin egin dituzen manifestazioetan, etorkinen erregularizazio prozesua ere aldarrikatu dute, "ultraeskuindarren aldarrikapenen aurrean".

"Eskubideak, ez lubakiak. Soldatak, etxebizitza eta demokrazia" lelopean Bilbon egin dutena izan da CCOOren eta UGTren manifestaziorik jendetsuena. 

11:45 aldera hasi da, eta milaka lagun bildu dira Bilboko Kale Nagusian. Bertan entzun diren oihuetako batzuk, hauek: 'Faxismoaren aurka, borroka sindikala', 'Etxebizitza eskubide bat da, ez pribilegio bat', 'Lan istripu gehiago ez', 'Kalera, borrokara, greba orokorrera' eta 'Gora, gora, gora, langileon borroka'.

Mobilizazio anitza Iruñean

CGT-LKN, CNT, ESK, Solidari eta Steilas sindikatuak mobilizatu dira Maiatzaren Lehenean Iruñean, kapitalismoaren eta gerren aurka eta langile klasea ahalduntzearen alde.

Sindikatuekin batera, hainbat kolektibo eta eragile sozialek ere parte hartu dute bertan, hala nola Haritu, BDZ, Plataforma03, Etxauri Bizirik, STOP Macroplantas Biogas plataforma eta AHT Gelditu koordinakundea, eta Errekoleten plazan (Baratxurien plazan) bildu dira, Alde Zaharrean, manifestazioa hasi den lekuan.

Ithri Elbouyafrouri Steilaseko kideak eta Ignacio Donezar CNTkoak "krisi ezberdin eta etengabeen aitzakian pobretze bortitza" pairatzen ari den langile klasearen defentsa irmoa egin dute.

"Bada kapitalismoa deitzen den krisi iraunkor bat, gerrak eta beldurra erabiltzen dituena gu menderatzeko eta pobretzeko. Eta kapitalismoaren, gerren eta beldurraren aurrean, antolaketa, elkar laguntza eta langile klasearen borroka, hori da behar duguna", esan du Elbouyafrourik.