Ikastetxeek eta Metroak itxita jarraituko dute gaur Bruselan

Arrisku-egoera aztertu ostean, Bruselan ezarritako alerta-maila gorenari (4) eustea erabaki dute Belgikako agintariek. Herrialdearen gainerakoan, ordea, alertak 3. mailakoa izaten jarraituko du.

Gauzak horrela, gaur, astelehena, Brusela eskualdeko ikastetxeek, unibertsitateek eta Metroak itxita jarraituko dute, gaur bezala, Charles Michel Belgikako lehen ministroak iragarri duenez, Parisko atentatuen gisakoak Bruselan ere izateko arriskua handia baita.

"Parisen izandako atentatu antzekoen beldur gaude", azaldu du Michelek Segurtasunerako Batzorde Nazionalaren batzarraren amaieran eskainitako prentsaurrekoan, "litekeena da merkataritza-guneen, garraioen edo jendez gainezka dauden espazio publikoen aurkako erasoak izatea".

Lehen ministroak aitortu duenez, itxiera horrek enpresen "bizitza profesionala eta ekonomikoa zailduko du", baina "ulerkor izateko" eskatu du, Gobernuak duen "informazioan oinarrituta baitago erabakia". Astelehen honetan mehatxu-maila aztertuko dute berriro.

"Normaltasunera ahalik eta lasterren itzuli ahal izateko dena egiten ari gara", gaineratu du gobernuburuak.

Bruselako Metroa. Argazkia: EFE

Hori guztia dela eta, ahal dela, jende kontzentrazio handiak saihestea, agintarien informazio ofizialak jarraitzea eta "zurrumurruak zabaltzea" saihestea gomendatu die Gobernuak Brusela eta inguruetako bizilagunei.

Dendak, museoak, zinema-aretoak, kontzertu-aretoak, kirolguneak eta bestelako aisialdirako guneak itxita egon dira asteburuan Bruselan. Gainera, Bruselako Metroa ere itxita egon da.

Hirugarren kamikazea identifikatu dute

Joan den azaroaren 13an Saint Denis estadioaren aurka eraso egin zuen hirugarren kamikazea identifikatu du Frantziako Polizia Nazionalak, eta haren argazkia zabaldu du Twitterren bidez horren gaineko informazio biltzeko asmoz. Lagun horren inguruko informaziorik duenak 197 telefonora deitzeko eskatu du Poliziak.

Hainbat komunikabideren aburuz, lagun hori Grezian izan zen joan den urriaren 3an, Leros uhartean, hain zuzen ere, Parisko atentuetako beste terroristetako batekin. Bigarren lagun hori identifikatu gabe dago oraindik, baina horren argazkia joan den asteartean zabaldu zuen Poliziak.

Saint Denis estadioaren hirugarren kamikazea, Poliziak zabaldu duenez. Argazkia: EFE

Bi ustezko terroristen bila

Gutxienez, ustezko bi terroristen bila ari da Belgikako Polizia. Le Soir Belgikako egunkariak ikerketako iturriak aipatuz berri eman duenez, horietako batek Parisko atentatuetan erabilitakoen gisako lehergaiak eta armak izan ditzake.

Gainera, Belgikako Polizia Federalen indar bereziek lau lagun atxilotu zituzten larunbatean Bruselako Grand Sablon auzo historikoan, inguruetan ibilgailu susmagarria omen zena atzeman ondoren.

Lehergaiak dituzten hamar pertsona Belgikan erasoak egiteko asmotan dabiltza, hedabideen arabera

Antza, arma eta lehergai mordoa duten dozena bat lagun Bruselan eta Flandrian aldi berean erasoak egiteko asmotan dabiltza, La Libre Belgique egunkariak France Info irrati katea aipatuz argitaratu duenez. 

Iturri horren arabera, Parisen azaroaren 13an izandako atentatuen antzerakoak prestatzen egon daitezkeen dozena bat lagun ikertzen ari da Belgikako Polizia. Aipaturiko pertsona horiek armak, lehergaiak eta bonbak omen dituzte esku artean.

Armadak eta Poliziak Bruselako kaleak hartu dituzte. Argazkia: EFE

24 orduz luzatu diote atxiloketa, jihadistei etxea alokatu zien gizonari

Aste honetako Saint-Deniseko polizia operazioaren ondotik, behin-behineko atxiloaldian dagoen Jawad Bendaoud gizonezkoari atxiloketa 24 orduz luzatzea erabaki dute, Frantziako hedabideek berri eman dutenez.

Haren atxiloaldia asteartera arte luza daiteke, eta hortik aurrera, magistratu baten erabakiz soilik luza daiteke atxiloaldia, baldin eta berehalako eraso terrorista baten arriskua badago.

Aste honetako Saint-Deniseko polizia operazioan, Bendaoudek kazetarien aurrean adierazi zuen ez zituela haren etxebizitzan bizi zirenak ezagutzen eta lagun bati mesede bat egiteko sartu zituela etxean.

Aste honetako Saint Deniseko polizia operazioa. Argazkia: EiTB

Belgikar bat atxilotuta, Parisko atentatuekin zerikusia duelakoan

Turkiako Poliziak Ahmed Dahmani herritar belgikarra hartu du atxilo, Parisko atentatuetan parte hartu zuelakoan, Hürriyet kazetak jakinarazi duenez.

Dahmanik 26 urte ditu eta jatorri marokoarrekoa da. Poliziaren arabera, Frantziatik Turkia hegoaldera, Antalyara bidaiatu zuen, ustez Siriara ihes egiteko asmoz, baina Manavgaten hartu dute atxilo beste bi lagunekin batera.

Antalyako aireportura iritsi eta berehala zelatatu du Poliziak ustezko ekintzailea. Handik ekialdera, Manavgatera. joan da atxilotua, eta bost izarreko hotel batean eman du gaua.

Siriako 23 eta 29 urteko bi bizilagunekin batera auto batean bidaiatzen ari zela atxilotu du Polizia belgikarrak Dahmani. Pasaporte faltsuak eta dirua zeramatzaten, ustez Siriara joateko. Epailearen aurrera eraman dituzte hiru atxilotuak eta badaezpadako espetxealdia agindu du honek.

Dahmani Estatu Islamikoaren ustezko kidea dela eta Parisen atentatuak egiteko lekuak aztertzen aritu zela argitaratu du Hürriyet egunkariak.