Zuzenbidezko Estatua errespetatzeko eskatu dio EBk Ankarari

Zuzenbidezko Estatua errespetatzeko eskatu dio EBk Erdoganen Exekutiboari. Kolpe saioa demokrazian atzera egiteko ez baliatzea eskatu dio.

?Zuzenbidezko Estatuak babesa behar du gaur. Herria demokraziatik aldenduko duen pausoentzako aitzakiarik ez dago?, ohartarazi du Federica Mogherini EBko Atzerri Politika eta Segurtasun goi-ordezkariak, ministroen bilerara heldu denean.

Heriotza-zigorra indarrean duen edo berriz ere martxan jartzen duen herrialdeak Europar Batasuneko kide izaterik ez duela gogorarazi dio Europako diplomaziaren buruak Turkiari.

?Heriotza-zigorra barneratuz gero ezin da EBko kide izan; hori oso argi dago?, azaldu du Mogherinik prentsaurrekoan, John Kerry AEBko Estatu idazkariarekin batera.

Purga militar eta politikoa

Recep Tayyip Erdogan Turkiako presidentea purga militar eta politiko oso serioa egiten ari da, ostiraleko estatu-kolpearen ondoren. Dagoeneko 7.500 pertsona baino gehiago atxilotu dituzte, tartean 6.000 militar inguru, 100 polizia, 755 epaile eta fiskal eta 650 herritar.

Azken orduetan, estatu-kolpearen inguruko teoria eta konspirazio ugari agertu dira komunikabideetan. Kolpearen bultzatzailea Fetula Gulen klerikoa izan dela adierazi du Erdoganek.

Hala, Fetula Gulen klerikoa entregatzeko eskatuko dio Turkiako Gobernuak Washingtoni. Elizgizona kale egindako estatu-kolpearen atzean dagoela uste du Ankarak, Al Arabiya telebista-kateak jakitera eman duenez.

Bitartean, Gulenek Erdogani egotzi dio erantzukizuna. ?Estradizio eskaerak ez nau kezkatzen?, esan du klerikoak Saylorsburgen (Pennsylvania, AEB).

Bilera Bruselan

Turkiako egoera aztertu dute EBko Atzerri ministroek eta John Kerry AEBko Estatu idazkariak gaurko bileran.

Kolpeaz harago, Erdoganek matxinatuen aurka hartu dituen neurriak aztertu dituzte buruzagiek, eta baita Bruselak eta Washingtonek aurrerantzean Turkiarekin izango duten jarrera ere.

Erdogan, negarrez, biktimen hiletan. Argazkia: EFE

Heriotza-zigorra

Estatu-kolpeko arduradunak jazartzeko, Turkiak Europan heriotza-zigorra inposatzea onartuko ez duela ohartarazi du Sebastian Kurz Austriako Atzerri ministroak Kurier egunkarian.

Ankarak estatu-kolpea ?garbiketa bidegabeak? egiteko erabil dezakeela ohartarazi du Kurzek. Gaia Atzerri ministroen bileran aztertuko dutela ziurtatu du buruzagiak.

Horretaz ari zela, Binali Yildirim lehen ministroak heriotza-zigorra indarrean jartzea planteatu zuela gogorarazi du Kurzek. Agintariaren ahotan, ?guztiz onartezina da?, Austriak arbuiatzen duen ?zigor krudel eta ankerra?.