Atzera kontaketa, 'brexit'ean

Giro ezezkor batean hasiko da astelehen honetan, berriz ere, brexitari buruzko negoziaketa. Hala azaldu du Michel Barnier Europar Batasuneko negoziatzaile buruak. Akordiorik gabeko brexita gero eta hurbilago dagoela dirudi, batzuk eta besteak keinu joko batean sartu baitira, eta, negoziaketak akordiorik gabe amaitzen badira, elkarri porrotaren errua leporatuko baitiete.

Joan den astean Boris Johnson lehen ministro britainiarrak aurkeztutako plana nahiko ez dela eta, aste honetan proposamen horretan zuzenketa aurkezteko eskatu dio Europar Batasunak Johnsoni. Hain zuzen ere, bi Irlanden arteko kontrolak erabat kentzeko eskatu dio. Hau da Bruselak eskatzen duen oinarrizko baldintza. Johnsonen proposamenaren arabera, Ipar Irlandako produktu batzuek Europar Batasuneko merkatu bateratuan jarraituko lukete, baina ez batasuneko aduana ereduan, eta, beraz, mugetako kontrolak ez lirateke erabat desagertuko. Eta hori Bruselak erabat gaitzesten du.

Zuzenketa hauek aste honetan jaso behar ditu Johnsonen planak, urriaren 17ko goi-bileran 27 buruzagiek onar ditzaten. Egun horretarako adostasunik ez badago, urriaren 31n ezinbestekoa izango da brexit gogorra, eta Erresuma Batua Europar Batasunetik kanpo geratuko da.

Brusela txundituta utzi duen agiri batean Boris Johnsonek zioenez, prest dago, urriaren 31rako akordiorik ez balego, brexitaren data atzeratzea eskatzeko. Hain justu, orain arte behin eta berriz esan duenaren aurka. Luzapena eskatzen badu, legez Westminsterko Parlamentuak eman dion agindua beteko luke. Bruselan dauden zurrumurruen arabera, ordea, Johnson Europako buruzagi batzuekin harremanetan jarri da, Viktor Orban Hungariako buruzagiarekin esaterako, luzapen horri  betoa jartzeko eskatuz. Horrela, Johnsonek beste batzuei leporatuko lieke akordiorik gabeko brexitaren erantzukizuna.

Datorren urriaren 31an, Erresuma Batua Europar Batasunetik irten behar da, adostasuna egon edo ez. Egun horretarako hitzarmenik ez badago, Londresek brexita atzeratzea eska dezake. Baina luzapen hori aho batez 27 buruzagiek onartu behar dute. Estatu batek atzera botatzen badu, Europar Batasun osoak botako du atzera brexita atzeratzea, eta Erresuma Batua gauetik goizera Europar Batasunetik kanpo izango da.