Azovstal eskuratzearekin Errusiaren esku geratu da Mariupol, eta hura defendatzeari uko egin dio Ukrainak

Amaitu da Mariupoleko borroka. Ukrainak "amaitutzat jo" du Azovstaleko altzairutegiaren defentsa eta, horrekin batera, Mariupol hiri osoarena, herrialdearen hego-ekialdean.

Kapitulua ixteko, bestelako hitzak erabili ditu Errusiak. Horrentzat "amore eman dute" altzairutegian bi hilabete baino gehiago eman dituzten 264 militar ukrainarrek.  Kremlinek gerrako presotzat jotzen ditu soldadu horiek; hala ere, ziurtatu du "nazioarteko legeekin bat datorren" tratua jasoko dutela, hala adierazi du Dmitri Peskov Errusiako Presidentetzako bozeramaileak.

83 egun igaro dira Errusia Ukraina inbaditzen hasi zenetik, eta aldi horretan Azovstal erresistentzia ukrainarraren sinbolo bihurtu da.

Ukrainako Armadako Estatu Nagusiak astearte honetan esan duenez, Azovstaleko altzairutegian Errusiako indar militarrei aurre egin dieten soldaduek "euren misioa bete dute", 200 militar baino gehiago inguru ebakuatzea lortu ondoren. Lantegiaren barruan jendea ote dagoen zalantza dago, Ukraina baiezkoan dago. 

Azovstalen gotortuta dauden borrokalarien "bizitzak salbatzeko" lanak jarraituko duela adierazi du gaur Ukrainak, eta "gerrako preso errusiarrekin trukatzeko" itxaropena agertu du.

Viatxeslav Volodin Parlamentuko presidenteak, baina, esan du ezin direla trukatu. Izan ere, bere esanetan, "kriminal naziak", Azov batailoi nazionalistako kideei erreferentzia eginez, "gerrako kriminalak dira eta dena egin behar dugu Justiziaren aurrean erantzun dezaten".

Leonid Slutski diputatu ultranazionalista errusiarra haratago joan da, eta Azoveko borrokalariek -ultranazionalistak haiek ere- heriotza-zigorra merezi dutela uste du eta "Errusiak heriotza zigorraren aplikazioan duen luzamenduan salbuespena" egin beharko lukeela haiekin. Errusiak 1996an jarri zuen indarrean luzamendu hori, Europako Kontseiluan sartzearekin bat.

Negoziaziorik ez

Errusiako Gobernuak onartu duenez, gaur egun ez dago Ukrainako agintariekin gerra-tentsioak murrizteko inolako negoziaziorik, Moskuren arabera, Kievek ez baitu ia emaitza praktikorik eman ez duen elkarrizketarako konpromisorik erakutsi.

Andrei Rudenko Errusiako Atzerri ministrordeak baieztatu duenez, "elkarrizketek ez dute jarraitzen". "Are gehiago, Ukraina atera egin da prozesutik", esan du TASS albiste-agentziak bildutako foro batean.

Moskuk Kievi leporatu dio bere proposamenei ez erantzutea, eta Vladimir Putin Errusiako presidenteak berak Sauli Niinisto Finlandiako presidentearekin berriki izandako elkarrizketa batean hari adierazi zionez, Ukrainako agintariek "ez dute inolako interesik" bakea lortzeko.

Gaitzespenak elkarrekikoak dira, Ukrainako Gobernuak ere Errusiakoaren aurka antzeko adierazpenak egin baititu. Izan ere, Volodimir Zelenski Ukrainako presidenteak behin baino gehiagotan proposatu du Putinekin aurrez aurre egotea, hark ez du, ordea, biezkorik eman.

Bi aldeen arteko negoziazioak duela hilabete eta erdi gelditu ziren, Mariupoleko borrokak gogortu eta Buchako irudiak argitara atera zirenean.

Bi herrialdeetako ordezkarien arteko aurrez aurreko elkarrizketen azken txanda Istanbulen izan zen, martxoaren 29an.

Bilera horren ondoren, aldeek aurrerapen txikiak iragarri zituzten, baina ondorengo asteetan nabarmendu zuten bien ikuspuntuak ez ziren oraindik bateragarriak. Hartu-emanek bideokonferentzia formatuan jarraitu zuten.

Maiatzaren 9an, Valdímir Medinski Errusiako negoziazio-buruak ziurtatu zuen negoziazioek bere horretan jarraitzen zutela, eta "ez zirela gelditu". Gaur kontrakoa da albiste. 

Erasoak Txernihiv-en eta Lviv-en

Bien bitartean, jarduera militarrek ez dute etenik, azken orduetan Errusiarenak izan dira eraso gehienak eta Ukrainarenak kontraerasoak. Gutxienez 8 pertsona hil eta beste 12 zauritu dira astearte goizaldean Errusiako Armadak Txernihiv eskualdean, Ukraina iparraldean eta Kievetik gertu, misilekin egindako aire-eraso baten ondorioz.

Sumy eskualdean ere, herrialdearen ipar-ekialdean, errusiarrek Errusiarekin muga egiten duten hainbat herriren aurkako erasoak egin dituzte gaur, Ukrainako "iparraldeko" Komando Operatiboak Facebooken argitaratu duenez.

Errusiako Indar Armatuek "Kalibr" gurutzadura luzeko misilak erabilita AEBk eta Europar Batasunak Ukrainara bidalitako armamentua eta gerra-ekipamendua suntsitu dute, Errusiako Defentsa Ministerioak gaur jakinarazi duenez. Igor Konashenkov Defentsako bozeramailearen arabera, Donbassera bidaltzeko prestatutako armak ziren.

Mendebaldearen balizko armamentu-etorrera geldiarazteko ahaleginean, Errusiako Armadak Merefako tren-geltokiko azpiestazio elektriko bat suntsitu du, Kharkov eskualdean, eta, ondorioz, eragotzi egin du norabide horretako tren elektrikoen funtzionamendua; erasoek, dena den, ez dute biktimarik eragin.