Massa eta Mileiren artean nork irabaziko duen, erabakitzear

Hauteskunde eguna izan dute igandean Argentinan eta ordu gutxi barru jakingo da nor izango den hurrengo presidentea. Sergio Massa ofizialistak eta Javier Milei eskuin muturreko hautagaiak puntu gutxiko aldea dute inkesta guztietan. Bi aukerek pasioa zein gorrotoa pizten dute neurri berean eta tentsio handiko asteak bizi izan dira.

35,8 milioi argentinar zeuden botoa ematera deituta eta herritarren %78k eman du botoa hauteslekuak itxi arte (22:00ak Euskal Herrian).

Behin hauteslekuak itxita, botoak zenbatzen ari dira orain. Lehen emaitzak gauerditik aurrera iritsiko dira.

Massak "itxaropenerako" eta "adostasunerako" deia egin du

Sergio Massa Union por la Patria alderdiaren Argentinako presidente izateko hautagaiak Buenos Airesko Tigre hiriko 34. eskolan eman du botoa.

Azken diktadura militarra (1976-1983) amaitu ondoren, 40 urtez demokrazia izan dela ospatzen ari diren unean unean iritsi da hitzordua nabarmendu du eta "itxaropenerako" zein "adostasunerako" deia egin du.

"Datozen lau urteetan zein herrialde izango dugun definituko da gaur. Horregatik hauteskunde-prozesuan parte hartzen dugun guztiok erantzukizunez jokatu behar dugu", gaineratu du.

Milei ultraeskuindarra "lasai" dago, ofizialismoaren "kanpaina zikina" salatu duen arren

Javier Milei La Libertad Avanza alderdi ultraeskuindarraren burua "lasai" eta "pozik" agertu da botoa ematera joan denean, aurkariak "beldurraren kanpaina" egin duela salatu duen arren. "Oso pozik gaude. Izugarrizko lana egin dugu, nahiz eta beldurraren kanpaina eta kanpaina zikina egin diguten", esan die Mileik Almagro auzoan zain zituen kazetariei.

Beltzez jantzita, larruzko kazadora batekin, txalo artean hartu dute jarraitzaileek "askatasuna", "presidentea" eta "kasta beldur da" oihukatzen zioten bitartean.

Etxe Arrosara iristen dena edozein izanda ere, egoera ekonomiko konplexua aurkituko du: inflazioak berriro maximo historikoak gaindituko ditu eta enegarren finantza-krisia iristear da.