Pelicot auziko epaileak astelehen honetan hasiko dira epaia eztabaidatzen

Hiru hilabete iraun duen epaiketaren ondotik, bihar hasiko dira Pelicot auziko epaileak deliberatzen. Abenduaren 19rako espero da Avignongo Auzitegiaren epaia.

Fiskaltzak 4 eta 20 urte arteko kartzela-zigorrak eskatu ditu Gisele Pelicot bortxatzeaz akusatutako 51 gizonentzat. Webgune batean topatzen zituen erasotzaileak Dominique Pelicot auzipetu nagusiak, eta bideoetan grabatzen zituen bortxaketak. Emazte ohia somniferoz lokartzen zuen, gizon horiek bera konturatu gabe bortxa zezaten.

51 auzipetuek azken hitzak esateko aukera izango dute astelehen honetan, eta ikusi egin beharko da inork ezer esan nahi duen.

Ikusmina handia da Frantzian, eta nazioartean interes mediatiko izugarria piztu du prozesuak; izan ere, ateak zabalik, komunikabideei irekita egin da epaiketa, biktimak, Giselek, hala erabakita. "Lotsa aldez alda dadila", esan zuen erabakia hartu zuenean.

27 eta 74 urte artean dituzte akusatuek, eta lanbide eta klase sozial ezberdinetakoak dira. Egin zutena ez zela bortxaketa izan esatetik egin zutena justifikatzera iritsi dira asko eta asko, senarrak "baimena" eman ziela argudiatuz.

Hain zuzen ere, onespenaren auzia izan da epaiketa honetan mahai gainean jarri den gakoetako bat, eta Frantzian eztabaida bizia piztu da hori bortxaketaren zigor definizioan sartzeko. Legelariak, politikariak eta elkarte feministak ez dira, ordea, erabat ados jartzen puntu horretan.

Bien bitartean, borroka feministaren nazioarteko ikur bihurtu da Gisele Pelicot, gertatu zaionaren ondotik erakutsi duen jarrera eta hausnarketengatik. Miresmena eragin du.

Pelicotarrek hiru seme-alaba izan zituzten: David (50 urte), Caroline (45) eta Florian (38). Ama babestu eta aitaren aurka irmo agertu dira epaiketa osoan.

Kasua

Avignonen irailaren 2tik epaitzen ari diren erasoak 2011ko uztaila eta 2020ko urria bitartean gertatu ziren, Parisko eskualdean lehenik eta Mazan herrian (Frantziako hego-ekialdean) gero, erretiroa hartu eta tokialdatu zirenean.

Dominique Pelicot beste gizon batzuekin harremanetan jartzen zen lineako plataforma batean, eta etxera gonbidatzen zituen, biktimari antsiolitiko dosi handiak eman ondoren. Drogek konorterik gabe uzten zuten emakumea, eta, horri esker, bortxatu egiten zuten, bera konturatu gabe. Hurrengo egunetan, mina eta bestelako sentsazioak izaten zituen, baina ez zekien zer gertatu zitzaion.

2020ko irailean amaitu ziren erasoak. Dominique Pelicot Carpentrasko supermerkatu batean emakume batzuen gonazpiak grabatzeagatik atxilotu zuten, eta haren artxibo informatikoak miatzean, biktimak jasandako bortxaketak agertzen ziren milaka bideo eta argazki aurkitu zituzten ikertzaileek.

Dominique Pelicot, akusatu nagusia, genero-indarkeriako beste bi kasutan ere dago inputatuta: 1991n emakume bat bortxatu eta hiltzeagatik eta 1999an arma zuriz emakume bat bortxatzen saiatzeagatik. DNA probei esker identifikatu zuten.