Ukrainak onartu egin du 30 eguneko su-eten proposamena, eta AEBk laguntza militarra emango dio berriro

Ukrainak onartu egin du Errusiarekin 30 eguneko su-etena egitea, AEBk proposatu bezala, eta orain Washingonek Moskuri helaraziko dio proposamena.

Ukrainako eta AEBko goi-ordezkariek bederatzi orduko bilera egin dute gaur Saudi Arabian, gerraren amaiera negoziatzeko.

Bi herrialdeek agiri bateratu batean iragarri dutenez, AEBk laguntza eta informazio militarra emango dio berriro Kievi.

"Ukrainak adierazi du AEBren proposamena onartzeko prest dagoela. Printzipioz, 30 eguneko su-etenari berehala ekin beharko lioke, aldeen arteko adostasunarekin luzatu daitekeena, eta Errusiako Federazioak onartu eta ezartzearen mende dago", irakur daiteke adierazpen bateratuan. "Errusiaren elkarrekikotasuna bakea lortzeko erabakigarria da", jakinaraziko dio AEBk Errusiari.

Ohar bateratuak, proposatutako su-etenean, neurri humanitarioak hartzearen garrantzia ere azpimarratzen du, hala nola "gerrako presoen trukea, atxilotutako zibilak askatzea" eta errusiarren kontrolpean dauden lurraldeetara edo Errusiara "indarrez eramandako haur ukrainarrak itzultzea".

Bi ordezkaritzek, gainera, Errusiarekin bake prozesu bat aurrera eramateko negoziatzaileak izendatzea erabaki dute.

Gainera, Ukrainako baliabide naturalak ustiatzeko akordioa "lehenbailehen" sinatzeko konpromisoa hartu dute Washingtonek eta Kievek. Adierazpenaren arabera, gainera, Ukrainak Europa bake prozesuan parte hartzea eskatu du bileran.

Marco Rubio AEBko estatu-idazkariak espero du Errusiak proposamena onartzea, eta hala ez bada, jakingo da nor den "bakerako oztopoa".

AEBko diplomaziaren buruak adierazi duenez, errusiarrek egin dezaketen "borondate oneko keinurik onena ukrainarrek tiroak eta borrokak gelditzeko eta negoziazio mahaira iristeko egin duten eskaintzari baietz esatea da".

Hala ere, Rubiok argitu du Kremlinek ez duela erantzuteko "epemugarik", baina lehenbailehen izatea espero du.

Ukrainako presidenteak, Volodimir Zelenskik, baieztatu du bere herrialdeak proposamena onartu duela, eta AEBri eskatu dio Vladimir Putin Kremlineko buruzagia konbentzitzea su-eten hori ere onar dezan.

"Ukrainak proposamen hau onartzen du. Positiboa dela uste dugu. Urrats hori emateko prest gaude", azpimarratu du Zelenskik bere sare sozialetan zabaldutako bideo batean. Ukrainako presidenteak gaineratu du AEBk "Errusia konbentzitu" behar duela, gauza bera egin dezan.

Hilabeteko balizko su-eten horretan Kievek, bere bazkideekin batera, "bake sendoa" eta "segurtasun berme iraunkorrak" lortzeko beharrezkoak diren "lanerako dokumentuak" prestatuko dituela erantsi du Zelenskik.

Ukrainako presidenteak eskerrak eman dizkio AEBko buruzagiari. Zelenskik adierazi du Donald Trump AEBko presidenteak bakea lortzeko jarrera "konstruktiboa" agertu duela, eta Washingtonek Ukrainara armak eta inteligentzia informazioa berriro bidaltzeko hartutako erabakiaren garrantzia nabarmendu du. Bere aldetik, Trumpek adierazi du Ukrainako presidentea Etxe Zurira itzultzeko gonbidatuta dagoela, azken bileran izandako liskarra gainditutzat jota.

Antonio Costa Europar Batasunaren Atzerri Politikarako goi-ordezkariak adierazi duenez, Brusela prest dago etorkizuneko negoziazioetan "bere egitekoa egiteko".

"Pozik hartu ditugu Jiddatik Ameriketako Estatu Batuen eta Ukrainaren arteko elkarrizketen gainean gaur jaso ditugun albisteak, su-etenerako akordio baten proposamena eta Inteligentzia trukeari eta Estatu Batuetako segurtasun arloko laguntzari berrekiteko proposamena barne", adierazi du Costak sare sozialetan.

Portugalgo lehen ministro ohiaren ustez, albiste hau "aurrerapauso positiboa" da, eta, gainera, "Ukrainarentzat bidezko bake iraunkorra lortzeko urratsa" izan daiteke. "Pilota Errusiaren teilatuan dago orain", gaineratu du EBko diplomaziaren arduradun nagusiak.