Ostegunean Putinekin biltzeko prest agertu da Zelenski

Ukrainako presidente Volodimir Zelenskik iragarri du errusiar presidente Vladimir Putinekin bilduko dela ostegunean, aurrez aurre, Istanbulen. Goizaldean Putinek negoziaketak hasteko eskaintza egin du, izan ere; eta, arratsaldean, AEBko presidente Donald Trumpek Zelenskiri eskatu dio onar dezala Errusiaren gonbita.

Ukrainako gerrari azkena emateko orain arte egindako esfortzurik handiena litzateke ostegunekoa.

X sare sozialaren bidez, Zelenskik esan du Ukrainak espero duela astelehenean su-etena hastea, gerrari amaiera emateko oinarri diplomatikoak ezartzeko bidean.

Dena den, erronka onartu, eta Putinekin biltzeko asmoa erakutsi du: "Maiatzaren 12tik aurrera su-eten erabatekoa eta egiaztagarria espero dugu, diplomaziarako oinarri nahikoa egon dadin. Ez du zentzurik hilketak luzatzeak. Eta Putinen zain egongo naiz ostegunean Istanbulen. Errusia aitzakia bila ez ibiltzea espero dut".

Trumpek proposamena "berehala" onartzeko galdegin dio

Aipatu bezala, Trumpek Ukrainari eskatu dio "berehala" onar dezala Putinen proposamena. "Errusiak ez du su-eten akordiorik nahi, aurrez aurre batu nahi du Zelenskirekin odoljarioaren bukaera negoziatzeko", nabarmendu du Truth Social bidez.

"Ukrainak BEREHALA onartu beharko luke proposamena. Behintzat, akordioa posible den ala ez jakingo dute batzar horri esker, eta Putinek adostasunik nahiko ez balu, AEBk eta Europako buruzagiek erantzun bat eman ahal izango lukete", gaineratu du.

Putinek negoziazio zuzenak izatea proposatu dio

Vladimir Putin Errusiako presidenteak ezustekoa eman du igande honetan, Ukrainarekin maiatzaren 15ean Istanbulen negoziazio zuzenak abiatzea proposatu baitu, aldez aurreko baldintzarik gabe, hiru urtetik gora irauten ari den gatazkari irtenbide baketsua bilatzeko helburuarekin.

Proposamena telebistako agerraldi batean egin du Errusiako presidenteak, Kremlinetik. Ordu batzuk geroago, Volodimir Zelenski Ukrainako presidenteak erantzun dio "lehenengo pausoa" dela Errusiak gerraren amaiera planteatzea, baina berretsi du elkarrizketak hasi aurretik su-etena izan behar dela.