Hirugarren hauteskundeak hirugarren urtez jarraian Portugalen, eta gobernagarritasunak kolokan jarraitzen du

Portugalek hirugarren hauteskunde eguna du gaurkoa hirugarren urtez jarraian, eta gobernatzeko ezintasunaren itzalak hor jarraitzen du, inkestek ez baitute aldaketa handirik aurreikusten aurreko hauteskunde aurreratuen aldean. Luis Montenegro lehen ministro kontserbadoreak bere familiako negozioekin interes gatazkak izan ditzakeela eta, konfiantza mozioa aurkeztu zuen, eta gainditu ez zuenez, hauteskundeak errepikatu dituzte berriro.

Aste honetan argitaratutako inkesten arabera, Montenegrok (Aliantza Demokratikoa AD) aurrena jarraitzen du, botoen % 32 jasoko baititu, 2024an baino zertxobait gehiago, baina lehengo gobernagarritasun arazo berbera izango luke, aliantzak aldatzen ez badira; izan ere, sozialistek botoen % 26-28 lortuko omen dituzte.

Azken hauteskundeen onuradun nagusia Chega eskuin-muturreko alderdia izan zen, hirugarren alderdi gisa sendotu baitzen. Montenegrok irmo dio baztertu egiten duela Chegarekin itunak egitea, gehiengo egonkorrik eduki ez arren, baina liberalekin lor dezake oraingoan egonkortasun hori.

Hori horrela, Marcelo Rebelo de Sousa presidenteak bozketan parte hartzeko deia egin die herritarrei, Portugalen egonkortasuna ez ezik, Europarena ere dagoelako jokoan. "Mundua dagoen bezala dago, ez dago erraz, duela urtebete baino zailago dago", esan zuen aurreko igandean, aurrez botoa eman zuenean.

Hautagaiek egonkortasuna bermatuko liekeen adinako babesik lortzen ez badute, Rebelo de Sousak gogorarazi du gutxienez urtebete igaro beharko dela hauteskundeak berriro deitzeko, Asanblea ezin delako desegin presidentearen agintaldiaren azken sei hilabeteetan.

Ezegonkortasun politikoa gorabehera, Portugal egonkor dago ekonomikoki 2016tik. Hala ere, herritarren artean, soldata txikiak eta etxebizitza lortzeko zailtasunak BPGaren % 2ko igoerak baino garrantzia handiagoa dute.

Zergatik aurreratu dira hauteskundeak?

Montenegrok konfiantza galdea egin zion Asanbleari, ikerketa batzorde bat osatzeko egin zioten mehatxuaren ostean, prentsan bere senideekin lotutako negozioen eta Gobernuaren arteko loturak argitaratu ostean; galdu zuenez, Rebelo de Sousak hauteskundeak aurreratu zituen.

Montenegro Antonio Costa lehen ministro ohiari eragiten zion ustezko ustelkeria kasu batengatik iritsi zen boterera.

Jokaldi arriskutsua izan da hauteskunde aurrerapenarena, baina neurrizkoa, Portugalen inork ez zuelako hauteskundeetara joan nahi. Sozialistek porrot gogorra jaso zuten 2024ko martxoan, eta Chegak boto-emaileak gal ditzake, Montenegroren mesedetan.

Etxebizitza, osasuna eta ustelkeria

Montenegrok bere programarekin jarraitzen uzteko eskatu die hautesleei, besteak beste, zergak murrizteko, osasun-sistema hobetzeko eta migrazio-politika gogortzeko. Azken puntu horrekin Chegako boto-emaileak erakartzen saiatzea egotzi diote.

Montenegrori eskuin-muturraren botoak eskuratzen saiatzea egozten dioten bitartean, Pedro Nuno Santos sozialistari bere diskurtsoa moderatzea leporatzen diote, zentroko boto-emaileak erakartzeko.

Sozialistek 2024ko hauteskundeetan lortu zituzten botoak berriro eskuratzea espero dute, hau da, botoen % 26-28 inguru, eta gainerako alderdi ezkertiarrak urrun geratuko zaizkio.

Buruzagi sozialistak itzalaldia aprobetxatu du, besteak beste, Montenegrok krisi handiei aurre egiteko duen ezintasuna salatzeko. "Agintea eta lasaitasuna falta izan ziren", kritikatu zuen.

Santosek osasun-sistema indartzea hitzeman du, medikuak eta bestelako osasun-langileak kontratatuz eta odontologia eta buruko osasuna sare publikoan sartuz. Era berean, zerga-murrizketa promestu die 35 urtetik beherakoei, eta, Montenegrok bezala, etxebizitza gehiago eraikitzearen aldekoa da, prezioak jaisteko.