Trumpen gobernuak ikasle atzerritarrak matrikulatzea debekatu dio Harvard Unibertsitateari

Donald Trumpen gobernuak ikasle atzerritarrak matrikulatzea debekatu dio Harvard Unibertsitateari.

Erabakia Kristi Noem Segurtasun Nazionaleko idazkariak sinatutako gutun baten bidez jakinarazi dio. Honako hau dio beran: "Harvard Unibertsitatearen Ikasle eta Bisitari Atzerritarren programa bertan behera geratzen dela jakinarazteko idazten dizuet".

"Horrek esan nahi du Harvardek jada ezin dituela ikasle atzerritarrak matrikulatu eta egungo ikasle atzerritarrak transferitu egin behar direla edo legezko estatusa galduko dutela", idatzi du Ameriketako Estatu Batuetako Segurtasun Nazionaleko Departamentuak (DHS, ingelesezko sigletan).

DHSk gaineratu duenez, Unibertsitateak "giro ez segurua sortu du campusean, AEBren aurkako eta terroristen aldeko ekintzaileek pertsonak jazarri eta fisikoki erasotzea ahalbidetu duelako, tartean ikasle judu asko".

"Pribilegio bat da, ez eskubide bat, unibertsitateek ikasle atzerritarrak matrikulatzea eta matrikula ordainketa handiagoak jasotzea, diru-bilketa areagotzeko. Harvardek aukera asko izan ditu zuzen jokatzeko. Uko egin dio", esan du Noemek. "Herrialdeko unibertsitate eta erakunde akademiko guztiei ohartarazteko balio dezala", erantsi du.

The New York Times egunkariaren arabera, Harvardeko matrikula 59.320 dolarrekoa da urte honen amaieran hasiko den ikasturterako, eta kostua 88.000 dolarrekoa izan daiteke ostatua eta janaria barne hartuz gero.

Gainera, nazioarteko ikasleek hezkuntza kostuen proportzio handiagoa ordaindu ohi dute, beste ikasle batzuekin alderatuta, egunkari horrek azaldu duenez.

Harvardeko Unibertsitateak salaketa jarri du jada Trumpen administrazioaren kontra. Massachusettseko auzitegi batean jarritako salaketan, hezkuntza zentroak argudiatu du Gobernuaren erabaki hori AEBko Konstituzioaren "lehen emendakinaren urraketa nabarmena" eta "Harvarden aurkako errepresalia" dela, "erakundea, ikasketa-plana eta irakasleen eta ikasleen ideologia kontrolatzeko eskakizunak" errefusatzeagatik.

Harvardek apirilean jarri zuen Trumpen gobernuaren kontrako lehen salaketa, Administrazioak bertan behera utzitako finantziazio federala (2.600 milioi dolar) berreskuratzeko helburuarekin.

Columbiako Unibertsitatea

Bestalde, Trumpen Administrazioak Eskubide Zibilen Lege Federala urratzea leporatu dio New Yorkeko Columbia Unibertsitateari, "ikasle juduek euren aurkako jarrerei aurre egin behar izan baitiote, eta Unibertsitateak ez du ezer egin".

Osasun eta Giza Zerbitzuen Saileko Eskubide Zibilen Bulegoak ohar baten bidez jakinarazi duenez, AEBko Gobernuak 1964ko Eskubide Zibilen Legearen VI. Titulua urratzea leporatu dio Unibertsitateari. Herrialdeko ospetsuenetako bat da Columbiakoa. Titulu horrek debekatu egiten du funts federalak jasotzen dituzten programa eta jardueretan arraza, kolore eta jatorriagatik diskriminatzea.

Eskubide Zibilen Bulegoaren (OCR) arabera, Columbiako Unibertsitateak "etengabe huts egin du ikasle juduak babesten", 2023ko urriaren 7an Hamasek Israelen aurkako erasoa egin zuenetik egindako "ikerketa baten ondorioak" aipatuz.

"Aurkitu dugunak dokumentatzen du Columbiako Unibertsitateko ikasle juduek 19 hilabete baino gehiago eman dituztela giro desegokia jasaten, eta horrek eragina izan du horien hezkuntzan, segurtasunean eta ongizatean", adierazi du Anthony Archeval Eskubide Zibilen Bulegoko zuzendariak.