Alemaniak Israelen jokabidea kritikatu du lehen aldiz, baina arma-blokeoa baztertu du

Friedrich Merz Alemaniako kantzilerrak gaur aitortu duenez, Israelek ezin du Hamas Palestinako erresistentzia erakundearen aurkako borrokarekin justifikatu Gazako zibilen sufrimendua, eta Benjamin Netanyahuren Gobernua nazioarteko zuzenbidea urratzen ari dela aditzera eman du.

WDR telebistaren Europako Foroan, kantziler berriak esan du "giza tragedia eta hondamendi politikoa" izan dela Israelek goizaldean eskola baten kontrako bonbardaketa. Ikastetxe horretan errefuxiatuak zeuden, eta erasoan Armada sionistak gutxienez 35 pertsona hil ditu; horietako asko, haurrak.

"Orain Israelgo Armada Gazan egiten ari denarekin, benetan ez dut ulertzen zein den helburua. Biztanleria zibila horrela sufriaraztea, azken egunotan gero eta gehiago ikusi den bezala, ezin da justifikatu Hamasen terrorismoaren aurkako borrokarekin", esan du agintariak, publikoaren txaloen aurrean.

Israeli orain arte egindako kritika zorrotzenetako batean, Mertzek ohartarazi du Alemania tentuz ibili behar dela Israeli publikoki kargu hartzeko orduan, baina "nazioarteko zuzenbidearen mugak urratuz gero, Alemaniako kantzilerrak ere badu zer esana".

Israel nazioarteko zuzenbidea urratzen ari dela agerian utzi duen arren, Europar Batasuna "Israelen ondoan" dagoela berretsi du, eta Tel Aviveko Gobernuari "bere lagunik onenak onartzeko prest ez dauden eran" ez jokatzeko eskatu dio.

"Dilema morala"

Johann Wadephul Alemaniako Atzerri ministroak onartu egin du Alemaniak "dilema morala" duela Israelekin zerikusia duen guztiarekin, baina oraingoz baztertu egin du Espainiak planteatzen duen arma-blokeoa, eta berehalako su-etenaren eta Gazan laguntza sartzearen alde egin du.

"Egoera, jakina, dilema politiko eta moral handia da guretzat", onartu du Jose Manuel Albares Espainiako homologoarekin Madrilen egin duen bileraren osteko prentsaurrekoan. Alemaniarentzat Israelen gaia "Estatu gaia" bat dela gogorarazi du, erantzukizun historikoa duelako harekin.

Alemaniako ministroaren ustez, "bada garaia berehalako su-etena izateko", eta Hamasi eta "Israelen lagunei" negoziatzen hasteko eskatu die. Aldi berean, argi utzi du Alemaniak bere esku dagoen beste egingo duela hori lortzeko.