Diego Armando Maradonaren heriotzaren inguruko epaiketa baliogabetu dute

Diego Armando Maradonaren heriotzagatik osasun arloko zazpi langileren aurkako epaiketa bertan behera utzi dute auzitegiko gainerako bi epaileek, Julieta Makintach magistratua asteartean baztertu ostean, dokumental batean parte hartzeagatik.

"Makintach epailea auzitik kanpo uztera eraman zuten arrazoiek ahozko epaiketa baliogabetzera bultzatu gaituzte", azaldu du Maximiliano Savarino epaileak. Horrela, duela bi hilabete eta erdi hasitako eta gaur 21. saioa bete duen prozesuaren amaiera erabaki du epaileak.

"Makintach magistratuaren esku-hartzeak prozesua baliogabe utzi du", gaineratu du epaileak, eta baztertutako magistratuaren "objektibotasun eta interes falta" nabarmendu du. Gainera, "epaiketaren garapenean ez du modu inpartzialean esku hartu", erantsi du.

Erabaki horren ondoren, Justiziak beste epaimahai bat aukeratu beharko du, eta hilabeteak beharko ditu horretarako. Epaiketa martxoaren 11n hasi zen, eta gaurkoarekin 21 saio izan dira; 40 lekukok baino gehiagok deklaratu dute, tartean Dalma, Gianinna eta Jana Maradona futbolari ohiaren alabak.

Fiskaltzak eta ia defentsa eta akusazio guztien abokatuek joan den asteartean eskatu zuten epaiketa bertan behera uztea, Makintach epailea baztertu ostean.

Magistratua formalki prozesutik at utzi zuten epaiketari buruzko dokumental batean parte hartu izanaren froga ugari erakutsi ondoren, telesailaren gidoia eta trailerra barne.

Argentinako futbolariaren alabetako batek, Jana Maradona haserre agertu da epaiketa baliogabetu ostean. "Haserre nago, gorroto ditut", adierazi du San Isidroko epaitegietatik irtetean, Buenos Aires probintzian.

Janak ez du ezkutatu kameren aurrean zuen haserrea eta epaiketaren amaieraz kexatu da. Hala ere, itxaropena ez duela galtzen ziurtatu du: "Argi dago nire aitagatik justizia egingo dela", berretsi du.