Etorkinen kontrako sarekadak salatu dituzte Los Angelesen, eta Gobernuak Guardia Nazionalarekin erantzun du

AEBko Gobernuak iragarri du Guardia Nazionaleko 2.000 kide zabalduko dituela Los Angelesen, Immigrazioaren eta Aduanen Kontrolerako Zerbitzuak (ICE) ostiralean egin zituen sarekaden aurka egiten ari diren protestei aurre egiteko.

"Trump presidenteak agindu presidentzial bat sinatu du Guardia Nazionaleko 2.000 kide martxan jartzeko, okerrera egin duen anarkiari aurre egite aldera", esan du Karoline Leavitt Etxe Zuriko bozeramaileak X sare sozialean.

"Gavin Newsom Kaliforniako gobernadoreak eta Karen Bass Los Angeleseko alkateak ezin badute euren lana egin, eta denok dakigu ezin dutela, Gobernu federalak esku hartu beharko du eta istiluen eta arpilatzeen arazoa konpondu, behar den bezala", adierazi du Trumpek Truth Social sare sozialean.

Era beren, Tom Homanek, etorkinen iritsiera kontrolatzeaz arduratzen denak, 'mugetako tsarra' ezizenaz ezagutzen dutenak, esan du jada mobilizatu dutela Guardia Nazionala. "Jende honi aurre egin behar diogu, eta legea betearaziko dugu", adierazi du Fox News telebista-katean egindako elkarrizketa batean.

Ostiralean ICEk egindako sarekaden aurrean, manifestari andana atera zen kalera Poliziaren jarduera salatzera, eta atxilotuak zeuden zentroa inguratu zuten.

Homanek justifikatu egin du agenteen jokabidea, eta atxilotuak "jende gaiztoa" direla azpimarratu du.

Kaliforniako gobernadoreak, berriz, kritikatu egin ditu ICEren atxiloketak. "Atxiloketa kuota arbitrario bat betetzeko Kalifornia osoan egiten ari diren etengabeko sarekada kaotikoak arduragabeak eta ankerrak dira", salatu du.

Tricia McLaughlin Segurtasun Nazionaleko idazkariordearen hitzetan, atxilotuen zentroaren inguruan mila pertsona elkartu dira eta kalte materialak egin dituzte.

"Deitoragarriak dira manifestariak segurtasun indarren aurka Los Angelesen egiten ari diren eraso oldarkorrak, eta Bass alkateak eta Newsom gobernadoreak eteteko eskatu beharko lukete. ICEko gizon-emakumeek arriskuan jartzen dituzte euren bizitzak herritar estatubatuarren bizitzak defendatzeko", esan du McLaughlinek ohar batean.

Era berean, horren esanetan, ICEk azken astean 2.000 pertsona atzerritar inguru atxilotu ditu egunero, Trumpen Administrazioak immigrazioaren aurka hartu dituen neurrien baitan.