Europak lasaitua eta etsia hartu ditu AEBko muga-zergen akordioa dela eta

Europak lasaitasunez baina etsipenez hartu du Donald Trump AEBko presidenteak eta Ursula von der Leyen Europako Batzordearen presidenteak Turnberryn igandean lotutako merkataritza akordioa. Horren arabera, abuztuaren 1etik aurrera Eurpako produktuen gainean % 15eko zerga ezarriko da, eta bi aldeen arteko gerra komertziala saihestu.

Ituna igandean iragarri zuten Trumpek eta Von der Leyenek Eskozian egindako batzarrean. Halaber, akordioan jaso da hainbat produkturi ez zaizkiela muga-zergarik ezarriko eta Europak 750.00 milioi dolar inbertituko dituela AEBko energia erosteko. Gainera, EBk hitzeman du 600.000 milioi dolar baino gehiago inbertitu eta material militarra erosiko duela.

Trumpek berak akordioa txalotu du, esanez "AEBko merkataritzarako egun historikoa" dela, Europar Batasunarekin dituzten harremanak "indartuko" direlako, Howard Lutnick Merkataritza idazkariaren hitzetan.

Erreakzioak

Friedrich Merz Alemaniako kantzilerra izan da akordioari buruz mintzatzen lehena. "Ursula von der Leyen eta Donald Trumpen arteko akordioa txalotzen dut. Ona da Europak eta AEBk akordioa lortu izana, saihestu ditzagun harreman gatazkatsuak", esan du Merzek ohar bidez. Dena dela, kantzilerrak aitortu du nahiago lukeela merkataritza askeagoa izan dadin.

Micheal Martin Irlandako lehen ministroak ondo iritzio dio itunari: "Eskozian lortutako akordioa, dudarik gabe, ongietorria da".  

Bestalde, Bart De Weber Belgikako lehen ministroak "lasaitasunez" hartu du ituna, "baina ospakizunik gabe". "Muga-zergak handituko dira hainbat alorretan, eta funtsezko zenbait auzi ebatzi gabe geratu dira", esan du De Weberrek sare sozialen bidez zabaldutako mezu batean.

Dick Schoof Herbehereetako jarduneko lehen ministroak "funtsezkotzat" jo du akordioa, eta "ahalik eta lasterren" abiatzeko eskatu du. "Akordioak argia emango du, eta oreka merkatuei, baina onena litzateke muga-zergarik ez izatea", aitortu du.

Lehenengo kritikak Frantziako ezkerreko eta ultraeskuineko oposizioko alderdietatik etorri dira. Jean-Luc Melenchon Frantzia Intsumisoa alderdiaren fundatzaileak deitoratu duenez, "Trumpen aurrean denean amore eman dugu, eta 75 urtez ezarritako joko-arauak aldatu".

"Europarentzat, morrontza akordio bat da", salatu du Pierre Jouvet ezker moderatuaren eurodiputatu sozialistak.

Eusko Jaurlaritza

Bestalde, Eusko Jaurlaritzaren arabera, AEBren eta EBren arteko muga-zergen akordioak 350 milioiko gainkostua ekarriko die Euskadiko esportazioei.

Mikel Jauregi Eusko Jaurlaritzako Industria, Trantsizio Energetiko eta Jasangarritasun sailburuaren hitzetan, akordioa "gazi-gozoa" da. Batetik, akordioa positibotzat jo du, merkataritza-gerra saihesten delako. Bestetik, altzairuaren eta aluminioaren muga-zergek % 50koa izaten jarraituko dute, eta, alde horretatik, ez da batere positiboa.

"Pozik gaude automobilgintzako produktuen gaineko muga-zerga % 25etik % 15era jaitsi delako, sektore hori funtsezkoa baita Euskadin; 40.000 lanpostu inguru sortzen ditu", adierazi du Jauregik ohar batean. Altzairuaren eta aluminioaren gaineko muga-zergei dagokionez, "kezkatutako gaude, kalte egiten diolako siderurgiaren sektoreari, eta guretzat estrategikoa da", adierazi du. 

Bestalde, akordioaren inguruan Mikel Irujo Nafarroako Industria kontseilariak adierazi du "Europar Batasunaren aurrean EBk amore eman duen sentsazioa" duela.

AEB-EB itunaren gainean galdetuta, Irujok esan du "zuhurtziaz" erantzun beharra duela, Trumpen eta von der Leyenen arteko akordioaren xehetasunak ezagutzen ez dituelako.

"Minduta aitortu behar dut iragarritakoa ikusita, badirudiela Europar Batasunak amore eman duela AEBren aurrean", azpimarratu du. Izan ere, % 15eko muga-zerga orokorra eta altzairuari eta aluminioari ezarritako % 50eko muga-zergagatik, "uste dugu, berez, ez dela akordio ona". 

Europako burtsak

Europako burtsek % 1 inguruko igoerarekin hartu dute AEBren eta EBren arteko merkataritza-akordioa. Merkatuen irekieran, gehien igo den Europako burtsa Frankfurtekoa da ( % 1,01), ondoren Milan ( % 0,93), Paris ( % 0,70) eta Londres ( % 0,56).

Ibex 35ek, bestalde, % 1eko igoera izan du eta 14.400 puntuetan dabil, AEBren eta EBren arteko akordioaren ondotik.