Bero zakarra Hego Euskal Herrian: 36 ºC-tik gora Laudion, eta 37 ºC, Nafarroan

Bero-bolada gailendu da gaur, astelehena, Hego Euskal Herrian, eta 34ºC-tik gorako tenperaturak izan dira lurraldeko toki askotan, adibidez: 36,7 ºC  Laudion, 34,8 ºC Igorren, 34,7 ºC Balmasedan, 34,2 ºC Alegrian, eta 34 ºC Agurainen, Euskalmetek jakinarazi duenez. Halaber, 33,2 ºC izan dira Oñatin, eta 30,1 ºC, Behobian.

Termometroak 37 ºC-ra hurbildu dira arratsaldeko lehen orduan Aiaran, Araban. Aurreikusi bezala, tenperaturarik altuenak Bizkaiko eta Gipuzkoako barnealdean eta Arabako ipar-mendebaldean erregistratu dira.

Euskadiko maximoa Laudioko Gardea estazioan eman da, non merkurioa 36,9 ºCra iritsi den. Saratxon, Amurrion, 36,1 ºCra iritsi da termometroa. Eremu horretatik kanpo, Agurain 36,8 ºCra iritsi da, eta Zanbrana 36ra; Gasteizek 34 ºC izan ditu gehienez.

Bizkaian tenperatura altuenak lurraldearen barnealdean izan dira: 36 ºC Igorren, 35,9 ºC Orozkon eta 35,3 ºC Balmasedan.

Egoera oso desberdina izan da kostaldean, tenperatura askoz leunagoak izan baitira, hala nola Bermeon 26,1 ºC eta Galea lurmuturrean 24,7 ºC. Zorrotzan, Bilbon, 31 ºCra iritsi dira.

Antzeko egoera gertatu da Gipuzkoan: 35,4 ºC Urkulun, 35,3 ºC Estandan, 35,1 ºC Alegian eta 34,5 ºC Oñatin. Miramonen, Donostian, termometroak 29,2 ºCra iritsi dira, eta Zarautzen 25,6 ºCko maximoan izan dira.

Uneotan indarrean da muturreko tenperatura oso altuengatik ezarritako abisu horia; izan ere, termometroek batez ere Euskadiko barnealdean eta Ebroko ardatzean egin dute gora. Maximoak 34 ºC-koak izan dira Kantauri isurialdean, 35ºC-koak trantsizio-eremuan, eta 36ºC-koak, Arabako hegoaldean. 

Aitzitik, kostaldean epelxeagoak izaten ari dira, eta 28ºC-ko tenperatura maximoak izan dira gaur. Zerua oskarbi dago, baina goizean behe-lainoak eta goi-hodei batzuk izan dira. Ekialdeko haizeak iparrera egin du arratsaldean, eta barnealdeko zenbait gunetan beroa leuntzen lagundu du.

Nafarroan, beroa are handiagoa da: Lizarran 37 ºC izan dira, Iruñean eta Tuteran 36 ºC, eta Erronkarin, 35 ºC. Tenperatura minimoek nahiko leunak izaten jarraitu duten arren, giro lehorra eta hodei gutxiko zeruak nagusitu dira.

Osakidetzak lau pertsona artatu ditu

Osakidetzako Larrialdi Zerbitzuak lau pertsona artatu ditu astelehen honetako 19:00ak arte Euskal Autonomia Erkidegoan, tenperatura altuen ondorioz. Horietako bat anbulantzietan eraman dute ospitalera, eta gainerakoak lekuan bertan edo telefonoz artatu dituzte.

Eusko Jaurlaritzako Osasun Sailak ohar batean adierazi duenez, bi kasu Gipuzkoan izan dira, eta horietako bat ospitalera eraman behar izan dute; bat Bizkaian eta bestea Araban.

Tenperatura altuak jasan dituztenen profila 55 eta 75 urte bitarteko pertsonena izan da, eta horien sintomarik nabarmenenak zorabioak eta nekea izan dira.

Atsedenaldi txiki bat 

Astearteak atsedenaldi txiki bat ekarriko du, eta maximoak jaitsi egingo dira, bereziki iparraldean. Euskal Autonomia Erkidegoan, tenperaturak 24-28 ºC artean ibiliko dira. 

Egunaren amaieran fronte ahul batek hodeiak eta zirimiria utziko ditu euskal kostaldean, baina barnealdean zerua oskarbi egongo da. Iruñean 28 ºC-ra jaitsiko da tenperatura, eta Lizarran, 30 ºC-ra. Hala ere, Nafarroako hegoaldean sargoriak eutsiko dio; Tuteran minimoak oso altuak izango dira, eta maximoak, 33 gradukoak.

Eguraldiaren iragarpenen arabera, giroak freskotzera egingo du, tarte batez. Asteazkenetik aurrera, tenperaturak gora egingo du Nafarroan, eta maximoak 40 gradura iritsiko dira Lizarran, eta 39ra Iruñean eta Tuteran.