Donostiak eta Wroclawek elkarrekin jo dute Hendrixen 'Hey Joe' kanta

Poloniako musikaz, gitarrek protagonismo berezia dutela, eta gastronomiaz gozatzeko parada izan da egun guztian zehar Donostiako Kursaaleko terrazan, Donostia 2016 Europako Kultur Hiriburutzaren Zubideak egitasmoaren baitan.

Egun guztian zehar musikak euskal kultura eta poloniarra lotu ditu. Thanks Jimi jaialdia urtero ospatzen da Wroclaw hirian eta Jimi Hendrix musikari ospetsuaren inguruan eratzen da. Urtero Guiness marka hausten saiatzen dira, ahalik eta pertsona gehien gitarra jotzeko bilduta.

Donostiak, Wroclawi laguntza eskaini dio oraingo honetan eta, sinbolikoki bada ere, ekimenarekin bat egingo du. Donostian ere Jimi Hendrixen "Hey Joe" abestia jo dute, baina ez dute abestu; hain zuzen ere, kantu horren letrak ez duelako bat egiten hiriburutzaren baloreekin.

Hori dela eta, Donostia 2016k gitarra jotzen dakitenei Kursaaleko terrazara inguratzeko deia egin die arratsaldeko hiruretan. Ondoren, entsegu bat egin dute eta lauetan izan da emanaldia. Donostiako eta Wroclaweko musikariek batera jo dute eta pantaila erraldoi baten bidez bat egingo dute.

Programazioa

10:00etan eman zaio hasiera festibalari Karbido taldearen eskutik. Poloniako tradizioa eta folklorea ditu inspirazio-iturri laukote horrek, baina argi utzi dute soinu garaikide bat eskaini nahi dutela, beren jatorria baztertu gabe betiere. Karbidok oso proposamen ausarta ekarriko du guregana, egurrezko mahai bat izango da haien instrumentu nagusia eta beraz, performance berritzaile eta harrigarri bat izango dugula gauza segurua da. Taldeak, bigarren emankizun bat emango du 12:45ean.

Ordu berean, 10:00etan, etxeko txikitxoek beren gitarra propioak sortu ahal izango dituzte Turukutupa taldearen laguntzarekin. Horretaz gain, birziklatutako materialekin eraikitako Reciclonk musika-instalazio dibertigarriarekin jolasteko aukera ere izango dute.

11:00etan, Bente Kahan bakarlariak eta Male Instrumenty taldeak kontzertu ibiltari bat eman dute Alderdi Eder eta Kursaal artean. Bente Kahanek bere folka eskaini digu berriz ere 13:30ean Urumea terrazan.

12:00etan, neska-mutilek eta haien familiek rock izarrak direla sentitu dute Txiki Rock kontzertu dibertigarriarekin. Rock musikaren abesti arrakastatsuenak jo dituzte eta jarduerak proposatu dizkiete kantu bakoitzarekin.

14:15ean, Urrezko Pua lehiaketaren edizio berezi batek gitarrista onenenetako batzuk entzuteko aukera eman digu, eta 16:30ean, Jimi Hendrixen omenezko kontzertua hasi da Foxie Leires taldearen eskutik.

16:00etan gitarristen topaketa izan da. Donostia eta Wroclaw konektatu egin dira pantaila erraldoi baten bidez eta bi hirietako gitarristek batera jo dute. Wroclaw hiriko erronka horri beste sei hiri batu zaizkio, Dresden, Vilnius, Praga, Mosku, Minsk eta Oberhausen.

18:30ean Joseba Irazokiren bertako rock kontzertua izan da.

20:00etan, Kursaaleko Urumeako terrazan, amaiera eman zaio jaialdiari Neony dance-rock taldearekin. Talde gazte horren karrerak ziztu bizian egin du gora. Zortzi urtetan, Neony Poloniako musikaren abangoardian ipini da bere erritmo dantzagarriekin.

Eta hau guztia gutxi ez balitz, Food Think Tank kolektibo poloniarrak beren herrialdeko gastronomia dastatzeko aukera eskaini dute, Urumea terrazan jarri dituzten bi foodtrucken bitartez.