'X hil da' eta 'Instrumental' lanentzat, Zilarrezko Euskadi sariak

"X hil da” Alaine Agirreren eleberriak eta “Instrumental” James Rhodes pianistaren autofikzio lanak irabazi dituzte Zilarrezko Euskadi sariak. Gipuzkoako Liburu-denden Elkarteak ematen dizkiete golardo horiek “merezi zuten oihartzuna izan ez zuten lanei”.

Agirreren (Bermeo, 1990) bigarren eleberria da “X hil da”; aurretik ere umeentzako zenbait lan egindakoa da idazlea, hala nola “Letra txarra daukat eta zer” eta “Txokolatezkoa izan nahi nuen”. Maiatzaren 6an, Literaktum jaialdiaren barruan, Koldo Mitxelena Kulturunean (KMK) izango da Agirre.

Maite denaren galeraren aurrean sortzen den beldurrari begiratzen dio “X hil da”k, eta, istorio “sinple” baten bidez, pasio sentimenduan sakontzen du, Arantzegik azaldu duenez, “bariazio musikalen eskema baten bidez etengabe gai beraren inguruan bueltaka ibiliz”.

Saria emateko, “idazkeraren edertasuna, prosaren erritmoa eta narrazioari darion errealismoa” hartu dute kontuan. “Obsesio bati buruzko liburu bat da, modu obsesiboan kontatua. Idazkeraren gaztetasuna harrigarri gertatu da, halaber, literatur tekniken erabileragatik eta liburuak lortzen duen intentsitateagatik”.

Gaztelaniaz, “Instrumental”, James Rhodesen liburua, saritu dute, “prosa zuzen eta gordin baina aldi berean hurbil eta jostagarriagatik. Argitalpenak erakusten duen ausardiagatik. Darion umoreagatik eta hobetu-nahiaren eta erresilientziaren eredu delako. Eta kultura –kasu honetan, musika– bizimodu batekin lotzeagatik, bizitzan zehar gertatzen diren egoera dramatiko eta zailetarako salbabide gisa aurkezteagatik. Liburuak ez baitu inor hotz uzten”.

Literaktum

Literaktum jaialdia maiatzaren 3tik 14ra bitarte izango da, eta berorren egitarauaren barruan dago bi idazleoi saria emateko ekitaldia. Bederatzi egunotan, hitza izango da ardatza hirian, eta bai literatura hutsezko sorkariei bai musikatik, argazkitik, ilustraziotik sortzen diren beste sorkari batzuei bide emango diete antolatzaileek.