Quim Torrak 'Kataluniako errepublika' aldarrikatu du bere inbestidura saioan

12:00etan hasi da Quim Torra JxCatek Generalitateko presidentegaiaren inbestidura saioa Kataluniako Parlamentuan. Roger Torrent Parlamentuko presidenteak Torraren hautagaitza proposatu du, eta ondoren, Quim Torra berak hartu du hitza. Ordubete inguruz bere programaren gakoak aurkeztu ditu eta 13:00ak aldera amaitu du interbentzioa. Etenaldi bat egin dute, eta 15:00etan hasi dira erantzuten talde parlamentarioak.

Carles Puigdemont goraipatuz hasi du hitzaldia Quim Torrak: "Nik ez nuke gaur hemen egon behar inbestidura hitzaldi hau egiten, Kataluniako presidente legitimoak egon beharko luke", "gure presidentea Puigdemont da" esan du. "Gure erantzuna beti berbera izango da, gauza bera esaten jarraituko dugu, eta azkenean, inbestitu egingo dugu" gaineratu du.

Ildo berean, "urriaren 1eko mandatuari leiala izan" eta "errepublika izango den Estatu independientea eraikiko" duela agindu du.

Mariano Rajoy Espainiako presidenteari elkarrizketarako prest dagoela esan dio, "betorik gabe" eta "gobernutik gobernura hitz eginez", eta bide batez, kargu hartu dio Felipe VI erregeari Kataluniako auzian izan duen jarreragatik: "Begira maiestate, preso politikoak, erbesteratuak, eta ehunka herritar ikerketapean ditugu independentzia bezalako proiektu demokratiko bat defendatzeagatik; U-1ean eta A21ean bozkatu genuen, baina ez dira hauteskundeen emaitzak errespetatzen. Horrela ez maiestate" esan dio.

Quim Torrak ingelesez ere egin du hitzaldiaren zati bat, Jean-Claude Juncker Europar Batasuneko presidenteari ere elkarrizketa eta bitartekaritza eskatzeko, Kataluniarentzat "irtenbide politiko bat aurkitze aldera".

JxCateko hautagaiak iragarri duenez, presidente hautatzen badute, legegintzaldi honetako lehentasunetako bat instituzioak eta herritarrek parte hartuko luketen prozesu konstituziogile bat bultzatzea izango da, Kataluniako Errepublika eratzeko: "Gure instituzioen lehengoratzetik Konstituzio proiektua idazteak suposatuko lukeen demokraziaren berreskuratzeraino". Prozesu konstituziogile horrek eztabaida handia ekarriko duela aurreikusten du, kataluniako herritarrek erabakiko dutelako nolakoa izan behar den etorkizuneko Katalunia, instituzio zein ekonomia mailan. "Nori eman dakioke beldurra gure herria ahal den erradikaltasun handienetik eraikitzeak?" galdetu du.

Bestalde, eskerrak eman dizkie Artur Mas presidente ohiari eta haren kontseilari izan zirenei, A9ko kontsulta egiteagatik, eta txaloka hartu dituzte hitz horiek JxCateko parlamentariek, Mas berak irribarre egiten zuen bitartean. 155. artikulua indarrea dagoen honetan, interbenituta dagoen Generalitatea ere Masen kontrako demandara atxiki da. Torrak esan du bera presidente izendatzen badute, erretiratu egingo duela Generalitataren akusazioa.

Gaurko bozketan ez dute presidente izendatuko, printzipioz

Ez da aurreikusten, dena dela, Quim Torra gaur inbestitzea; CUPek abstenitu egingo dela iragarri duenez, ez baitu lortuko lehen bozketan presidente izendatzeko beharko lukeen gehiengo absolutua.

Hala, lehen saio honetan ez balu gehiengo absoluturik lortuko, asteleheneko bigarren saiora joango lirateke. Bigarren saioa horretan Torrak nahikoa luke gehiengo soila presidente ateratzeko.

Hori bai, bigarren bozketa horretan gehiengo soilez inbestitzeko, JxCat eta ERCren 66 aldeko botoez gain, CUPeko ordezkariak abstenitzea beharko luke.

Hain zuzen ere bihar bilduko da CUPen kontseilu politikoa astelehenean abstenitu edo ez erabakitzeko.

Laugarren hautagaia

JxCatek presidente izendatzeko aurkezten duen laugarren hautagaia da, Carles Puigdemont, Jordi Sanchez eta Jordi Turullekin saiatu ostean.