Negoziazioa 'seriotasunez eta errespetuz' egitea eskatu dio EAJk PSOEri
Andoni Ortuzar EAJko presidenteak gogor kritikatu du Espainiako Alderdi Sozialista Pedro Sanchezen inbestiduraren harira izaten ari den jarrera, publiko bildu egingo direla esan arren, bi alderdiek elkarrekin hitz egin gabe jarraitzen dutelako. Ildo horretan, negoziazioak "serioa, diskretua eta errespetuzkoa" izan behar duela esan dio PSOEri.
EAJk Zarautzen egin du arratsalde honetan ikasturteko politikoa abiatzeko ekitaldia. Ortuzar haserre agertu da Espainiako Alderdi Sozialistarekin. "Abuztuaren 2an esan zuten deitu egingo zigutela, Sanchezen inbestidura negoziatzeko, baina gaur arte ez dugu deirik jaso", deitoratu du.
Ortuzarrek adierazi du balizko bilerari buruzko informazioa komunikabideen bidez izan dutela. "Lehenengo, hilaren 19an bilduko ginela esaten zuten, gero G-7a hasi aurretik, ondoren goi-bilera amaitu ostean, eta orain iraileko lehen astean bilduko omen gara… baina gure telefonoan ez dago deirik". "Inbestiduran aurrera egitea lortzeko negoziatzeko modu bitxi daukate", erantsi du.
PSOEk atzo jakinarazi zuen 300 neurri biltzen dituen proposamen bat prestatzen ari direla datorren astetik aurrera taldeei aurkeztu eta haien babesa lortzeko asmoz.
"Ezer publiko egin aurretik, ez litzateke hobe izango baietza eman behar omen dugun alderdioi zer pentsatzen dugun eta zer motatako itunak nahi ditugun galdetzea?", galdetu du Ortuzarrek.
EAJko buruzagiaren ustez, PSOEk ez du negoziatzeko borondaterik eta berea inposatu egin nahi du: "Gustatu ala ez, jan egingo duzu, eta hauteskundeetara bagoaz, zurea izango da ardura".
Gauzak horrela, PSOEri mezu zuzena igorri dio: "Gu negoziatzeko prest gaude, baina negoziazioa serioa, diskretua eta aurrean dagoenarekiko errespetuzkoa izan behar da".
Halaber, Ortuzarrek ohartarazi du inbestiduraren ostean ere talde ezberdinen arteko akordioak beharrezkoak izango direla. "Edo, agian, inbestidura gaindituta, Ciudadanosen babesarekin agintzea da haien asmoa, Ciudadanoseko buruzagiak uda honetan isilik daudela kontuan hartuta", esan du.
Dozena bat diputatu gehiago lortzeko asmoz, hauteskundeak errepikatzea "arduragabekeria handia" izango litzatekeela iritzi dio Ortuzarrek. "EAJk ez du beldurrik hauteskundeetara berriro joateko, baina deialdi horrek egoera gehiago nahastuko lukeela pentsatzen dugu", gaineratu du.
Edonola ere, PSOEk deituz gero, bilerara joango direla ziurtatu du Ortuzarrek. "Guk ez dugu ezinezko baldintzarik jarriko mahai gainean, eta gainerako alderdiek ere gauza bera egitea espero dugu", adierazi du.
Pedro Sanchezen inbestiduraz gain, Euskal Autonomia Erkidegoko Aurrekontuak ere izan ditu hizpide Ortuzarrek. EAJko presidenteak onartu du Eusko Jaurlaritzak "erronka handia" daukala aurretik, baina oposizioko talde parlamentarioei ere jarrerak zehazteko eta erabakiak hartzeko unea iritsi zaiela esan die.
Bestalde, EAJk euskal indar politikoei eskua luzatu die "herriaren eta herritarren aldeko itunak" egiteko, "hainbeste kritikatzen dugun Madrileko joko politikoa hemen errepikatzea saihestuz".
Albiste gehiago politika
Kongresuak atzera bota du migrazio eskumena Kataluniako Gobernuaren esku uzteko Juntsek eta PSOEk adostutako lege proposamena
Podemosek lege testuaren aurka bozkatu du PPrekin eta Voxekin batera, "arrazista" dela iritzita. Horiei Sumarreko bi diputatu batu zaizkie, boto diziplina hautsita. Miriam Nogueras Juntseko bozeramaileak muturreko eskuina eta muturreko ezkerra kritikatu ditu Kataluniaren aurkakoak direla iritzita.
Albiste izango dira: EAEko aireportuen kudeaketa, Palestinaren aldeko manifestazioa Zinemaldian, eta NBEren Batzar Orokorra
Gaurkoan Orain-en albiste izango direnen laburpena, bi hitzetan.
Autobus batek Nafarroa eta Gipuzkoa zeharkatuko ditu, Mikel Zabalzaren oroimenez
Gazte nafarra hilik agertu zen Bidasoa ibaian 1985ean, Guardia Zibilak atxilotu eta 20 egunera.
Israeli arma enbargoa ezartzea onartu du Espainiako Gobernuak
Edonola ere, errege dekretuak klausula bat aurreikusten du, eta, horren arabera, salbuespen kasuetan eta Estatuaren interesaren eta interes orokorraren izenean, Ministroen Kontseiluak Israelekin merkataritza harremanak baimendu ahalko ditu.
Goiak Donostiako autobus geltokiko kafetegia lekuz aldatzea proposatu du, itxarongunea handitzeko
Donostiako alkatearen arabera, "garai batean aurreikusi zen gaur egun instalazio hori erabiltzen duten autobus askok, Gasteiz eta Bilbo jatorri-helmuga dutenek, desagertuko zirela 'euskal Y' abiadura handiko trenaren zerbitzua martxan jartzean", baina "asko atzeratzen" ari da. "Ez dakigu zein urtetan erabili ahal izango dugun abiadura handiko trena", deitoratu du.
Eusko Jaurlaritzak adierazi du Txiki eta Otaegi biktimak direla, eta eskatu du urteurrena ez dezatela instrumentalizatu
"'Txiki' eta Otaegi gobernu frankistak fusilatu zituen, biktimak dira, eta giza eskubideen urraketa onartezina jaso zuten, baina urteurren hau ezin da instrumentalizazio gisa erabili", adierazi du Maria Ubarretxena Eusko Jaurlaritzaren bozeramailea gobernu bilareraren osteko prentsaurrekoan.
Jon Goikolea, Arkautiko akademiako zuzendari berria
Goikolea Juan Mari Atutxaren eskuineko eskua izan zen Segurtasun sailburu izan zen urteetan. Miren Dobaranek abuztuan utzi zuen kargua, Amaya Angulo zuzendariordearekin batera. Biek urtebete eskas egin zuten postuan.
"Txiki eta Otaegi ez ziren heroiak ezta martiriak izan": Fernando Buesa Fundazioak eta Covitek fusilamenduen urteurrenean ETA goratzea salatu dute
Bi elkarteek, halaber, ohar bateratu bidez, erakunde publiko, lokal, autonomiko eta estatuko guztiei eskatu diete "pertsona horien omenezko ekitaldiak ez sustatzeko eta ez babesteko".
Pirinio Atlantikoetako Prefeturak Ipar Euskal Herriko lau udal auzitara eraman ditu, Palestinako bandera zabaltzeagatik
Funtzio publikoak jokatu behar duen neutraltasunaz ez jardutea leporatzen die Urruña, Ozaze, Izura eta Itsasuko udalei. Ipar Euskal Herriko beste lau herriko etxek ere zabaldu dute Palestinako bandera, eta ikusteko dago Prefeturak horien aurkako auzibidea hasten duen ala ez.
Imanol Pradales lehendakariak jarrera "irmoagoa eta batuagoa" eskatu dio Europar Batasunari Gazako sarraskiaren aurrean
Gazako sarraskiaren aurrean, Europak “jarrera irmoagoa eta batuagoa” behar duela esan du gaur goizean Imanol Pradales lehendakariak, Europar Batasunak Espainian dituen enbaxadoreei egindako harreran. Tartean, Alemania, Italia, eta Herbehereetako enbaxadoreak zeuden, Palestinako estatua aitortu ez dutenak. Lehendakariak dioenez, jarrera irmoagoa ez izateak “sinesgarritasuna kentzen dio” Europar Batasunari.