Odol-delituengatik zigortu zituzten EH Bilduko zazpi hautagaiek uko egingo diote kargua hartzeari

Bere garaian odol-delituengatik zigortu zituzten EH Bilduko zazpi hautagaiek uko egingo diote zinegotzi kargua hartzeari, maiatzaren 28ko hauteskundeetan hautatuak izanez gero. Erabakia "elkarbizitza eta bakearen alde" hartu dutela adierazi dute naiz.eus agerkarira bidali duten idatzi batean. Maiatzaren 28ko udal eta foru hauteskundeetarako EH Bilduren zerrendetan hainbat deliturengatik kondenatutako 44 kide agertzeak sortu zuen iskanbilaren aurrean hartu dute erabakia zazpi hautagai horiek.

Covite elkarteak salatu zuen hedabideen aurrean EH Bilduren zerrendetan zigortutako hautagaiak agertzen zirela. Gaur, horien erabakiaren berri izan ondoren, "albiste ona" dela adierazi dute, baina zerrenda horietan "ETArekin harremana izan duten beste 37 zigortu" daude gogoratu dute, eta horiek erabaki bera ez hartzea salatu dute.

Arnaldo Otegi EH Bilduko koordinatzaile nagusiak agerraldia egin du gaur 12:00etan Donostiako egoitzan, Mahai Politikoko kideak alboan zituela. Otegik, bertan, uko egin dutenen jarrera "txalotu" eta "elkarbizitza demokratikorako konpromisoa" berretsi du.

Jose Antonio Torre Altonaga, Asier Uribarri Benito, Lander Maruri Basagoiti, Begoña Uzkudun Etxenagusia, Jose Ramon Rojo Gonzalez, Juan Carlos Arriaga Martinez eta Agustin Muiños Diaz dira EH Bilduren zerrendetan agertzen diren eta (hautatuak izanez gero) zinegotzi kargua ez hartzea erabaki duten zazpi hautagaiak.

Zabaldu duten jakinarazpenean, "ETAko biktimei eta gatazka honen ondorioz sufritu duten pertsona guztiei" zuzendu dizkiete euren hitzak, eta "gure hitzekin eta ekintzekin, dagoeneko egindakoaz gainera, min gehiago ez eragiteko konpromisoa" hartu dute. "Ez dugu gure iraganeko militantzia ukatuko, ezta haren gaineko ardurari uko egingo", ziurtatu dute. Hala ere, azpimarratu dute "hasieratik" hartu zutela parte "duela hamarkada bat ezker abertzaleak egin zuen estrategiaren aldaketan", eta "zalantzarik gabe, hark hasitako bide politiko eta demokratikoen aldeko apustuari" eusten diotela.

Zazpi hautagai horiek "Urriaren 18ko Deklarazioarekin bat" egiten dutela adierazi dute, "aurreko konfrontazio zikloari modu autokritikoan begiratzen" diolako. "Ez dugu iraganik gabeko etorkizunik nahi, baino ez dugu ontzat emango sektore erreakzionarioek gure herriarekin egin nahi dutena: etorkizunik gabeko iragan batera kondenatzea", azaldu dute.

Idatzian salatu dutenez, "azken egunetan interes partidistak eta elektoralistak gailendu dira, eta horrek ez du inolako zerikusirik elkarbizitza eta bakea eraikitzearekin; piztu den polemikaren helburua EH Bilduri kalte egitea izan da, besterik ez". Azkenik, EH Bilduren proiektu politikoak "Euskal Herriarentzat itxaropenez betetako etorkizuna" ekarriko duela adierazi dute. Horien iritzian, "sektore askotako pertsona anitzak erakarri dituen proiektua da, baita, garai batean, zuzenean gure aurka zeuden eta gure ekintzak kondenatzen zituzten pertsona asko ere".

Coviteren erantzuna

Consuelo Ordoñez Covite elkarteko presidenteak erabaki horren berri jasotakoan adierazi du "garaipen bat" dela. "Ez da demokraziaren garaipena", zehaztu du, "moral falta hau salatu zuen Covite bezalako biktimen elkarte txiki baten garaipena baizik". "Egindako lanaren ondorioz, hiltzaileak bizitza publikotik baztertu" izanak "poztu" egin duela gaineratu du.

Hala ere, "hiltzaileen kasuak mingarrienak baziren ere", zerrenda horietan "ETAko kide gisa talde terroristaren krimenak egiten lagundu zuten" beste 37 hautagai daudela nabarmendu du, eta, "hautatzen badituzte, ez dute euren kargua hartzeko inolako zalantzarik egingo", salatu du.

Ordoñezek "ETA gune publikoetatik atera" dezala eskatu dio ezker abertzaleari, "ez soilik hauteskude zerrendetatik, baita kaleetatik ere; utz dezatela ETA goraipatzeari pintadekin, pankartekin eta abarrekin". "Hori egin arte eta ETAren ibilbide terrorista gaitzetsi arte, ez dute bakearen eta elkarbizitzaren alde erabakiak hartzen dituztela esateko legitimitaterik", gehitu du.