Bizkaia "mugan" dago adingabe atzerritarrak hartzeko, eta "plangintza" eskatu dio Estatuari

Bizkaiko ahaldun nagusi Elixabete Etxanobek ohartarazi du lurraldera bakarrik iristen diren adingabe atzerritarrak hartzeko baliabideak "muga-mugan" daudela. Hori dela eta, Espainiako Gobernuari "kontingentzia plan bat" eskatu dio "krisi humanitario horren aurrean", arreta egokia eman ahal izateko.

Politika Orokorreko saioa egiten ari dira Gernikako Batzar Etxean, eta berton egin du eskaera Etxanobek. Hitzaldian, Bizkaiko egungo egoeraren "argazkia" egin du foru erakundeko buruzagiak. Horren hitzetan, "Bizkaian ondo bizi gara, baina "badaude arazoak, kezkak eta hobetzekoak". 

Bidaiderik gabe Espainiako Estatura heldutako atzerritar adingabeen auziaz, Etxanobek gogorarazi du foru erakundeak "konpromiso sendoa" duela, "inoren kargura ez dauden adingabe atzerritarrei arreta onena emateko eta gure gizartean integratzen laguntzeko", baina ohartarazi du "16 foru zentroak eta horiek artatzen dituzten profesionalak mugan daudela".

"Adingabe horiei arreta emateko sistemak ez du gehiago ematen", eta, horregatik, ahaldun nagusiak "Estatu osoan inoren kargura ez dauden adingabe atzerritarrak hartzeko arrazoizko plangintza bat" eskatu du, "bestela bideraezina baita gizarte- eta hezkuntza-programak garatzea", ohartarazi du.

Bizkaiak "urte asko" daramatza horrelako programekin, eta "esperientziak esan digu pena merezi duela, kasu arrakastatsu asko lortu baitira pertsona horiek gure gizartean erabat integratzen lortzeko", gaineratu du.

Lurralde horrek adingabe horiei arreta emateko baliabideak handitzen ditu urtero, eta, hala ere, "Bizkaiko adingabeen zentroek gainokupazioa jasaten dute gaur egun, eta zailtasun handiak dituzte azpiegitura egokiak izateko eta beharrezko prestakuntza eta esperientzia duten profesional guztiak edukitzeko".

Hori dela eta, "plangintza hobea" eskatu dio Estatuari, "jarduera arauturik ez egoteak adingabeak kontrolik gabe iristea baitakar", eta lurraldeak ezin du hori bere gain hartu.

"Krisi humanitario horrek kontingentzia-plan bat behar du, definitutako protokoloekin, txostenekin, ebaluazio- eta finantzaketa-adierazleekin, eta baita eskumena duten erakunde guztiek beren erantzukizunak bere gain hartzea eta ez saihestea ere", adierazi du.

Guggenheim Urdaibai proiektua

Beste gai batzuk ere jorratu ditu Etxanobek, tartean Busturialdean eraiki asmo den Guggenheim museoaren proiektua. Nabarmendu duenez, herritarren iritzia entzungo du, eta argi utzi du foru erakundeak ez duela "Busturialdea kaltetu dezakeen ezertxo ere egingo". 

Etxanoberen esanetan, "ingurune naturala babestea eta inguru horretan aberastasuna sortzea marra gorria dira Aldundiarentzat". 

Beste proiektu handi bat hizpide, ahaldun nagusiak azaldu du Jaurlaritzak Metro Bilbaoko 4. linearen —erdigunea Irala, Errekalde eta Zorrotza auzoekin lotzekoa— inguruko trazadura berriaren proposamena aztertzen ari dela. Etxanobek uste du proiektua ezin dela gehiago "luzatu", eta zehaztu du proposamena "teknikoki zein ekonomikoki" aztertu behar dutela aurrena.