2030erako Turismo Plan Estrategikoak Gipuzkoaren eta lurraldean bizi diren pertsonen zaintza du ardatz

Gipuzkoako 2023erako Turismo Plan Estrategikoa aurkeztu du ostegun honetan Azahara Dominguez Mugikortasun, Turismo eta Lurralde Antolaketako diputatuak. 'Zatoz eta zaindu' lelopean, Gipuzkoaren eta lurraldean bizi diren pertsonen zaintzan jartzen du arreta planak. 

Dominguezek Donostiako Arima hotelean egin den ekitaldi batean aurkeztu du plan berri hau. Turismo sektoreko eta erakundeetako ordezkari ugari izan dira bertan.

Diputatuaren hitzetan, 'Zatoz eta zaindu' eslogana "Euskadin egin den kanpaina turistiko indartsu eta arrakastatsuenetako baten bilakaera da: 'Zatoz eta konta ezazu'-rena, alegia. Lelo hark aro bat markatu zuen , eta gaur beste bati ekin nahi diogu. Turistek etortzen jarraitzea nahi dugu, bisitatzea, gure edertasunaz eta aberastasunaz gozatzea, baina baita hura zaintzea eta errespetatzea ere", nabarmendu du diputatuak.

Dominguezek gogorarazi du turismoa BPGren % 8,4 dela eta 40.000 familia baino gehiago enplegatzen dituela Gipuzkoan. "Baina hori kudeatu egin behar da, hemen bizi garenon eta gozatzera datozenen arteko bizikidetza osasuntsua lortzeko", defendatu du.

Era berean, "kalitatezko enplegu-aukera iraunkorrak sortzearen" alde agertu da; izan ere, "turismoa motor ekonomikoa izan daiteke, baina ongizaterako motor izango bada, sortzen duen enplegua egonkorra, bidezkoa eta aitortua izan behar da". 

Bost ardatz estrategiko

Bestalde, Libe Otegui Turismoko zuzendariak zehaztu du Plan Estrategiko honek bost ardatz estrategiko dituela. Lehenengoa sektorearen lehiakortasuna da, berrikuntzatik, jasangarritasunetik eta berdintasunetik abiatuta. "Funtsezkoa da Gipuzkoak sektore indartsua, ondo prestatua eta berritzailea izatea, jasangarritasunaren alde egingo duena etorkizuneko motor gisa, horrela bakarrik sortuko baititu kalitatezko enplegu-aukerak", adierazi du.

Bigarren ardatza "abegikortasuna eta enpatia turistikoa" da. Oteguik adierazi duenez, "gure lurraldearen jasangarritasuna eta iraunkortasun turistikoa bermatzeko modu bakarra elkarbizitzan, errespetuan eta elkar aberasten duen turismo bat izatea da". 

Sustapen estrategikoaren eta profesionalaren esparruan, Planaren apustua da estrategia selektibo baten bidez lan egitea, merkatu estrategiko eta target espezifikoetan, "Gipuzkoa kalitatezko eta ez kantitateko helmuga gisa kokatzea lehenetsiz". Era berean, profesionaletik profesionalerako sustapenaren alde egin nahi dute, "balio erantsi handiko turistak bermatzeko modurik onena delakoan".

Mugikortasunaren ardatzak lurraldea "modu erosoan, pertsona guztientzat eskuragarri eta oztoporik gabe" ezagutzera ematea du xede, garraio publikoaren sarearen bidez. Azkenik, Planak, koordinazioa eta kolaborazioa bilatu nahi du, "gobernantza partekatuaren" aldeko apustua egiten du, "plangintza koherentea eta eskualde bakoitzari egokitua, turismoaren garapena orekatua eta bidezkoa izan dadin".