Espainiako Gobernuak Konstituzioa erreformatzeko proposatuko du abortua eskubide gisa sartzeko

Espainiako Gobernuak Konstituzioa erreformatzea proposatuko du abortatzeko eskubidea bertan sartzeko, "emakumeen askatasuna eta autonomia sendotzeko", Gobernuko iturriek jakitera eman dutenez.

Gobernuaren iragarpena Madrilgo Udaleko Osoko Bilkurak, PPren eta Voxen botoekin, Santiago Abascalen alderdiaren ekimen bat onartu ostean egin da. Ekimen horrek haurdunaldia etetea eskatzen duten emakumeei 'abortuaren osteko traumari' buruzko informazioa ematekoa eskatzen zuen.

Erantzun gisa, Sanchezen gobernuak ostiral honetan jakinarazi duenez, haurdunaldia eten nahi duten emakumeek "informazio faltsua edo ebidentzia zientifikorik gabekoa jasotzea" eragotziko du, eta Konstituzioaren erreforma hori bultzatuko du.

"Sexu- eta ugalketa-eskubideen aurkako erasoaldiaren testuinguru globalean, Espainiak beste pauso bat eman du emakumeen askatasuna eta euren bizitzei buruz erabakitzeko autonomia finkatzeko", gaineratu dute.

Horretarako, Gobernuak Konstituzioa aldatzeko prozedura arrunta bultzatuko du; nahikoa izango da, beraz, gehiengo kualifikatu bat onartua izateko.

"PPk ultraeskuinarekin bat egitea erabaki du. Beraiek ikusiko dute zer egiten duten. Baina ez emakumeen askatasunen eta eskubideen kontura", argitaratu du Pedro Sanchez Espainiako Gobernuko presidenteak X sare sozialean.

"Gobernu honekin, eskubide sozialetan, atzerapausorik bat ere ez", gaineratu du.

Horregatik, "haurdunaldia eten nahi duten emakumeei informazio faltsua edo engainagarria ematea eragotziko du Gobernuak, 825/2010 Errege Dekretua aldatzetik hasita".

Eta proposamen bat eramango du Parlamentura "haurdunaldia borondatez eteteko eskubidea konstituzionalizatzeko, Auzitegi Konstituzionalaren jurisprudentziaren ildotik", gaineratu du Gobernuko presidenteak argitaratutako mezuan.

Pedro Sanchezen Gobernuaren proposamenarekin, Espainia munduko bigarren herrialdea izango litzateke abortatzeko eskubidea bere Konstituzioan jasotzen, 2024an Frantziak egindako bidearen ondotik. Gobernuaren arabera, helburua da "emakumeen eskubideak mehatxatzen dituen edozein atzerapausori aurre egitea".

Gobernuko iturriek zehaztu dutenez, erreformak ezarriko du abortuaren arloan ematen den informazio guztiak "oinarri zientifiko objektiboa" izan behar duela eta "nazioarteko erakundeen estandarrek" babesten dutela, hala nola Osasunaren Mundu Erakundeak (OME) eta Amerikako Psikiatria Elkarteak (APA). "Oinarri zientifikorik gabeko teoriek, abortuaren osteko sindromea kasu, ez lukete lekurik izango sailkapen horietan", ohartarazi du Gobernuak.

Neurriarekin Gobernuak azpimarratu duenez, "emakumeen eskubideak mehatxatzen dituen etorkizuneko edozein atzerapen-saiakerari aurre egiten dio". 

Halaber, gogorarazi dute Konstituzio Auzitegiak berak maiatzaren 9ko 44/2023 epaian aitortu zuela haurdunaldia borondatez etetea emakumeen "funtsezko eskubide" gisa. 

Gauzak horrela, "Espainiako Gobernuak bide guztiak jorratzen jarraituko du, beren eskubidea askatasunez baliatu nahi duten emakumeek edonolako presioak jasan ez ditzaten. Horrela, gure herrialdeak emakumeen eskubideen eta askatasunen defentsan nazioarteko erreferente izaten jarraituko" duela nabarmendu dute.