Epaileak Abalos eta Koldo Garcia deitu ditu berriro

Leopoldo Puente Auzitegi Goreneko magistratuak Jose Luis Abalos ministro ohia deklaratzera deitu du urriaren 15erako, Guardia Zibilaren Unitate Zentral Operatiboak PSOEko buruzagi ohiak egindako 95.437 euroko "ordainketak" antzeman berritan.

Epaileak Abalosen aholkulari izan zen Koldo Garcia ere deitu du urriaren 16rako, Guardia Zibilak atzeman baitu orduan haren emaztea zenarekin batera Abalosen gastuak ordaintzeko erabiltzen zen diruaren "zaintzaile eta kudeatzaile" zela Garcia. 

Astelehen honetan kaleratutako autoak dakarrenez, instrukzio-epaileak uste du UCOren txostenak agerian uzten dituela Abalosi eta haren aholkulari ohiari buruzko prozeduran jasota zeuden "kriminalitate zantzuak".

Instruktoreak "zantzu sendoak" ikusten ditu bien ondareen artean "elkargune garrantzitsuak egon daitezkeela" esateko. Haren ustez, Koldok "Abalosi egokitzen omen zitzaizkion ordainketak bere gain hartu omen zituen maiz", hala nola "seme-alaba baten elikadura-pentsioa, etxeko langilearen nominak, lagunei egindako opariak, higiezin baten hipoteka-kuotak, bidaiak eta beste gastu pertsonal batzuk", horien guztien batura "zenbateko nabarmen handia" izanik. 

Hala ere, Puenteren idatziak aditzera ematen duenez, "Abalosen banku-kontuen azterketatik ez da ondorioztatzen Garciaren aldeko kontrapartidarik dagoenik gastu horiek konpentsatzeko, zeregin horiek bigarren horren erantzukizunetik erabat kanpo" egon arren, eta, beraz, ondorioztatzen du Koldok ordainketa horiek egiten zituela, orduko ministroaren "onurarako" eta "inolako ordain espliziturik gabe"; edo, bestela, "Abalosek, aurreratutako zenbateko horiek  eskudirutan edo nolabait itzultzen zizkiola".

Puentek uste du, Abalosek zituen "diru-sarrera erregularrak" eta benetan zituen gastuak ikusita, "diru-sarrera iturri irregularren bat izan zezakeela, eskudirutan, legez kanpo". Zantzu hori sostengatuko lukeen beste hipotesia da hirugarren batek edo batzuek Garciari dirua ematen zietela Abalos eta biei, eta horrek, ondoren, "modu batera edo bestera, gastuen zati handi bat bere gain" hartzen zuela. 

"Ildo beretik doa Polizia Unitateak aurkeztutako txostenean jasotakoa: Abalosi dagokion banku informazioa kontsultatu ondoren, Abalosek 2018tik 2023ra arte ez zuen bere banku kontuetatik kutxazainetan atera (ordura arte gertatu ohi zenaren eta 2024tik aurrera berriro gertatu zenaren aldean)", gaineratu du instruktoreak.

Haren ustez, zantzu horiek guztiak ez datoz bat Abalosek epaitegian egindako adierazpenekin; izan ere, Koldorekin zuen harremanari buruz esan zuen ez zela "ministro batek aholkulari batekin izan zezakeen ohiko harremanetik haragokoa, azken horrek etxeko enkargu batzuk bere gain hartu arren", eta horien artean beren-beregi aipatu zuen "ministroarentzako tabako bila joatea edo botikak erostea".

"Azken batean", laburbiltzen du magistratuak, "Koldo eta Abalosen ondareen artean komunikazio-metodo ez gardenak izan zitzaketen, eta hainbat jatorritako diru-sarrera irregularrak eta opakoak jaso ahal izan zituzten, egozten zaizkien ustezko arau-hauste penal larrien ondorioz".

Hori dela eta, egoki ikusten du berriro deklaratzera deitzea, UCOk argitaratutako informazio berriaz gain, "jarduketetan dauden elementuei buruz" azalpenak eman ditzaten; ondoren, "bidezkoa dena adostuko da", dio epaileak.