Pertsona migratzaileen ezohiko erregularizazioa onartu du Espainiako Gobernuak

Espainiako Gobernuak migratzaileen ezohiko erregularizazioa onartu du, Ministroen Kontseiluan, PSOEk eta Podemosek akordioa iragarri eta biharamunean.

Ezohiko erregularizazio prozesuak milioi erdi pertsonari baino gehiagori mesede egin diezaieke, Podemosen estimazioen arabera. 

Erregulazio eskaera egin ahal izateko hainbat baldintza bete beharko dira: 2025eko abenduaren 31 baino lehen Espainiako Estatuan bizitzea, gutxienez bost hilabete bertan bizi izana eta aurrekari penalik ez izatea. 

Espainian gutxienez bost hilabetez bizi izan direla erakusteko, errolda agiria, medikuen txostenak, argindar, gas edo ur kontratuak, alokairu kontratuak, jaioterrira bidalitako diruaren frogagiriak eta garraio txartelak aurkeztu ahal izango dituzte, besteak beste. 

Eskaera tramiterako onartu orduko, automatikoki bertan behera geldituko da pertsona migratzailea bere sorterrira itzularazteko prozedura. Eskaera onartuz gero, urtebeteko bizileku baimena jasoko dute eta epe hori amaitutakoan, Espainiako Atzerritarren Legeak ezarritako ohiko baimena eskatu ahalko dute.

Ezohiko erregularizazio prozesua errege dekretu bidez onartuko du Espainiako Gobernuak, prozedura azkarraren bidez, eta, hortaz, ez du Diputatuen Kongresuak onartu beharko. 

Erreakzioak

Espainian bizi diren pertsona horien bizimodua "duintzeko" prozesua da martxan jarri dutena, Elma Saiz Gizarte Segurantza eta Migrazio ministroaren arabera. 

Ester Muñoz PPren bozeramaileak, aldiz, legez kanpokotzat jo du erregularizazio masiboa deritzona. 

Vox pauso bat harago joan da, eta iragarri du Auzitegi Gorenera joko duela neurriaren aurka egiteko.