Erakunde eta ordezkari politikoek, euskal gizartearekin batera, agur esan diote Carlos Garaikoetxeari Ajuria Enean

Carlos Garaikoetxearen gorpua goizeko hamarrak jo barik zeudela iritsi da Ajuria Enera, Iruñetik, bere jaioterritik. Goiz osoan zehar, erakundeek, ordezkari politikoek eta, oro har, euskal gizarteak agur esan diote Euskal Herrian giltzarri izan zen figurari. Hil kapera lau orduz egon da zabalik, demokraziako lehen lehendakariari agur esateko. 

Zerraldoa ikurrinaz estalia iritsi da autoan, eta Jaurlaritzako sei ertzainek hartu dute soinean. Txistulari bandak Euskadiko ereserki ofiziala, Eusko Abendaren Ereserkia, jo ostean, barrura sartu dute hilkutxa. 

Minutu batzuk lehenago, Garaikoetxearen alargun Sagrario Mina eta hiru semeak iritsi dira Ajuria Enera, eta jauregira sartzeko eskaileretan zain geratu dira, zerraldoa noiz iritsiko, Imanol Pradales lehendakaria lagun zutela.

Hilkutxa Ajuria Eneko areto nagusian sartu eta bertan ezarri dute hil-kapera. Hilkutxaren oinetan loreak eta makila bat jarri dira, eta Garaikoetxearen hil-kapera 10:15ean ireki da jendearentzat.

Une horretatik aurrera, joan-etorriak ez du etenik izan; erakundeetako ordezkariek, politikariek, eta, oro har, euskal gizarteak, guztiek nahi izan dute Garaikoetxeari agur egin. Egungo Eusko Jaurlaritzako kideak eta Eusko Legebiltzarreko Mahaia izan dira sartzen lehenak, Bakartxo Tejeria presidentea buru zutela.

Iñigo Urkullu, Juan Jose Ibarretxe eta Patxi Lopez lehendakariak ere bertan izan dira. Urkullu eta Ibarretxe elkarrekin sartu dira hil-kaperan. Irtendakoan komunikabideei egindako adierazpenetan, Urkulluk adierazi du "sinesmen eta balio sendoko gizona" izan zela, "baita lehendakari gisa ere".

"Lehendakaria, hizki handiz", horrela gogoratu du Juan Jose Ibarretxe lehendakariak Garaikoetxea. 

Patxi Lopezek adierazi du Garaikoetxea gaur egun oso beharrezkoa litzatekeen politikari horietakoa izan zela, bere “printzipioen defentsa irmoagatik, baina errespetu instituzional handiarekin eta hezkuntza handiarekin”, beti “argudioez” eta “inoiz ez irainez”.

Alderdi guztietako buruak eta ordezkariak, Vox salbu, Ajuria Enean izan dira, eta aho batez nabarmendu dute Garaikoetxeak egungo Euskadiren eraikuntzan izandako garrantzia.

EAJtik, Aitor Esteban presidenteak nabarmendu du Garaikoetxeak garai “zail eta distiratsu” bati aurre egin behar izan ziola, eta euskal autogobernuaren oinarriak ezarri zituela. Arnaldo Otegi EH Bilduren idazkari orokorrak, berriz, nabarmendu du “ezohiko garaietan ezohiko gauzak” egin zituen belaunaldi batekoa izan zela.

Bestalde, Eneko Andueza euskal sozialisten buruak “jaiotzen hasi zen Euskadiren sinbolo” gisa deskribatu du. PPtik, Laura Garridok azpimarratu du Garaikoetxeak garai “transzendental” batean izan zuen papera, non elkarrizketa eta adostasuna lehenetsi ziren. Eta Richar Vaquero Podemos Euskadiko idazkari nagusiak, berriz, demokraziarako trantsizioaren "funtsezko" figura izan zela esan du.

Halaber, hil-kapera bisitatu dute Joseba Egibar EAJren Legebiltzarreko bozeramaile ohiak, hiru ahaldun nagusiek, eta Arantxa Tapia Sabino Arana Fundazioko presidenteak, baita sindikatuetako buruek ere.

Jordi Turull JxCateko idazkari nagusia ere bertan izan da, eta Garaikoetxea "Katalunian oso estimatua eta maitatua" izan zela gogoratu du. 

Eusko Alkartasunako kide eta kargudun ohiek ere Garaikoetxearen familiagandik hurbil egon nahi izan dute, Eba Blanco egungo idazkari nagusia eta Peio Urizar, Unai Ziarreta eta Gorka Knorr, besteak beste.

Politikaz harago, kultur etea kirol munduko hainbat lagun ere joan zaizkio Garaikoetxeari agur esatera, hala nola Jose Angel Iribar, Athleticen atezain ohia, eta lehendakaria “oso politikari garrantzitsua” eta “oso pertsona ona” izan zela nabarmendu du.

Andres Urrutia euskaltzainburuak eskerrak eman dizkio lehendakariari "euskararen alde egindako lanagatik" eta Euskaltzaindiaren "aurrerapenagatik", eta Joserramon Bengoetxea EHUko errektoreak ere ez du hitzordura hutsik egin.

Donostiako Fernando Prado eta Gasteizko Juan Carlos Elizalde gotzainak ere izan dira bertan, eta agur horrekin bat egin dute baita Euskal Herriko herritar askok ere, eta errespetua eta maitasuna adierazi diete lehendakariari eta haren familiari.

14:00etan itxi dute Carlos Garaikoetxearen hil-kapera, eta arratsaldean lurperatuko dute, Iruñean, bere jaioterrian.